وسعت اللہ خان بی بی سی اردو ڈاٹ کام

	ٹرین بھارت کی جانب سے واپس پاکستان میں داخل ہوئی تو انجن ڈرائیور اور اسکے دو ساتھی بھی ایک ہی نعرہ لگا رہے تھے جئے الطاف

سٹیشن پر مسلم لیگ کے تین چار جھنڈے الٹے لٹک رہے تھے۔سینکڑوں نوجوان متحدہ قومی موومنٹ کے جھنڈے اٹھائے استقبالیہ سٹال پر بجنے والے نغمے ’مظلوموں کا ساتھی ہے الطاف حسین‘ کی دھن پر رقص کررہے تھے۔

جیسے ہی ٹرین سٹیشن میں داخل ہوئی فضا جئے الطاف سے گونج اٹھی۔ٹرین کو جو انجن کھینچ رہا تھا اس پر سامنے کی جانب سفید کارڈ بورڈ ٹنگا ہوا تھا۔اس پر لکھا تھا ’ الطاف حسین۔نام ہی کافی ہے’۔مرحوم محمد خان جونیجو کی صاحبزادی اور میرپور خاص کی ناظمہ صغری جونیجو نے ایم کیو ایم کے کارکنوں کے جلوس میں ٹرین کا استقبال کیا۔

میرپور خاص کے بعد ٹرین نے زیرو پوائنٹ تک پانچ گھنٹے میں سترہ سٹیشن کراس کیے۔ لیکن راستے بھر گزرتی ٹرین کے استقبال کے لئے ہاتھ ہلانے والے مفلوک الحال مرد، عورتیں اور بچےصرف پاکستان زندہ باد کے نعرے لگا رہے تھے۔بس ایک جگہ کسی نے نعرہ لگایا جئے بھٹو۔

کھوکھرا پار سٹیشن گزرنے کے بعد اچانک ایم کیو ایم کے کارکنوں سے بھری جھنڈوں سے سجی ایک بس اور دوتین لینڈ کروزریں زیرو پوائنٹ تک ٹرین کے ساتھ ساتھ دوڑتی رہیں۔ پچھلے کئی ہفتوں سے رینجر مقامی باشندوں کو بھی کھوکھرا پار سے آگے کسی صورت نہیں جانے دیتے لیکن لگ یوں رہا تھا کہ ایم کیو ایم کے جوش و خروش نے رینجر کی چوکیوں کو بھی بے بس کردیا۔

جیسے ہی ٹرین چالیس برس بعد پاکستان کا سرحدی دروازہ عبور کرکے بفرزون میں داخل ہوئی ریل کی کھڑکیوں سے ایم کیو ایم کے جھنڈے نکل آئے اور جب شام کو ٹرین بھارت کی جانب سے واپس پاکستان میں داخل ہوئی تو انجن ڈرائیور اور اسکے دو ساتھی بھی ایک ہی نعرہ لگا رہے تھے جئے الطاف۔