منظور اعجاز واشنگٹن، امریکہ

جواب میں صدر بش نےمتعدد دفعہ الزام عائد کیا کہ سینیٹر کیری کا یہ کہنا کہ امریکہ عراق میں غلط وقت پر غلط جنگ لڑ رہا ہے امریکی فوجیوں کی حوصلہ شکنی کرتا ہے۔

سینٹر کیری نےصدر بش کی پالیسیوں کو علیحدگی پسندانہ قرار دیتے ہوئے کہا کہ وہ امریکی خارجہ پالیسی کو بہتر انداز میں چلا سکتے ہیں۔ کچھ مبصرین کا خیال ہے کہ اس مبا حثے میں کوئی امیدوار بھی دوسرے کو چت نہیں کر سکا لیکن اس پر تقریباً اتفاق رائے ہے کہ سینیٹر کیری کو سبقت حاصل رہی۔

صدر بش کو مباحثے کی تیاری کروانے والے سینیٹر جان مکین نے خود اقرار کیا کہ یہ سینیٹر کیری کا پچھلے چھ ہفتوں میں نہایت روشن لمحہ تھا اور انہوں نے اپنے آپ کو بہترین انداز میں پیش کیا۔ بقول سینیٹر جان مکین کے ’جان کیری لتاڑتے ہوئے آئے‘۔

مباحثے سے پسندیدگی کیری: 45 فیصد بش: 36 فیصد بے فیصلہ: 17 فیصد اے بی سی ٹی وی سروے

پاکستانی امریکیوں نے بھی مباحثے کو بہت غور سے سنا ان کی زیادہ تعداد نے سینیٹر کیری کی تعریف کی اور کہا کہ اس مباحثے میں سینیٹر کیری کے بارے میں پیدا ہونے والے بہت سے شکوک دور ہوئے ہیں۔

ورجینیا سے سید فرید حسن کا کہنا ہے کہ سینیٹر کیری کو واضح برتری حاصل تھی۔ لاس اینجلس سے ڈاکٹر عمر علی کے خیال میں کیری بھی پورا سچ بولنے سے قاصر تھے کیونکہ وہ بھی حکمران ٹولے کا حصہ ہیں۔

سان فرانسسکو سے ریپبلکن پارٹی کے حامی ڈاکٹر خواجہ اشرف کی رائے میں سینیٹر کیری مباحثے میں بہت بہتر تھے ان کے خیال میں صدر بش انتہائی کنفیوز تھے۔ سینیٹر کیری کی صدارتی مہم کی پاکستانی اہلکار جناب شاہد خان مباحثے کے بعد بہت پر جوش تھے اور انہوں نے بی بی سی کو بتایا کہ ان کو جو ٹیلیفون کالیں وصول ہو رہی ہیں وہ بہت حوصلہ افزاء ہیں۔

واشنگٹن پوسٹ کی رپورٹ کے مطابق امریکہ کے ’پریس روموں‘ میں سب کا خیال ہے کہ سینیٹر کیری کی ادائیگی بش سے بہت بہتر تھی۔ اخبار کے تبصرہ نگار ہاورڈ کرٹز کا کہنا ہے کہ مباحثے کے فوراً بعد میڈیا کے لئے گئے سروے میں پندرہ فیصد امریکیوں نے کیری کی کارکردگی کو بہتر بتایا۔

نیویارک ٹائمز کے ٹاڈ پروڈن نے لکھا ہے کہ مباحثے کے آخر تک پہنچنے تک سینیٹر کیری نے اپنا مقصد حاصل کر لیا: انہوں نے ثابت کر دیا کہ وہ امریکی فوج کے کمانڈر ان چیف بن سکتے ہیں۔

شکاگو ٹریبون کے مائیکل ٹیکٹ کی رائے ہے کہ مباحثے کے جیتنے اور ہارنے والے کے بارے میں تو ووٹر فیصلہ کریں گے لیکن سینیٹر کیری نے اپنے جیتنے کا ایک اور موقع پیدا کر لیا ہے۔ ایسوسی ایٹڈ پریس کی رپورٹ کے مطابق سروے سینیٹر کیری کو ترجیح دے رہے ہیں۔

ٹی وی چینل اے بی سی کے سروے کے مطابق فلویڈا میں ہونے مباحثے میں پینتالیس فیصد افراد نے جان کیری کی پرفارمنس کو پسند کیا جبکہ چھتیس فی صد افراد کو بش کی پرفارمنس اچھی لگی۔ سترہ فیصد رائے دہندگان نے ابھی تک کیری یا بش کی پرفارمنس کے بارے میں کوئی فیصلہ نہیں کیا۔