وسعت اللہ خان بی بی سی اردو ڈاٹ کام، لندن

جن لوگوں کے پیروں تلے زمین نہ رہنے دی جائے اور سر پہ سے آسمان کا سائبان بھی اتارنے کی کوشش کی جائے۔ایسے لوگوں کا مذاق اڑانا، انہیں گالی دینا اور آس پاس کی تمام خرابیوں کی جڑ قرار دینا ایک آسان سا کام ہے۔

مذاق، گالی اور الزام کا جواب دینے کے لئے تھوڑا سا وقت درکار ہوتا ہے۔ اور جو لوگ پچھلی چار نسلوں سے اپنا سر مسلسل پتھروں سے بچانے میں لگے ہوں ان کے پاس باقی باتوں کا وقت کہاں؟

آئیے اس بات کو ایک اور ڈھنگ سے سمجھنے کی کوشش کی جائے۔

آپ ایک بھرے کنبے کے ساتھ اپنے آبائی گھر میں رہ رہے ہوں۔ ایک دن آپ کے خاندان سے بھی زیادہ بارسوخ خاندان آپ کے گھر پر قبضہ کر لے اور آپ کو مکمل طور پر بےدخل کرنے کی بھی کوشش کرے۔ معاملہ پنچایت میں جائے اور پنچایت یہ فیصلہ دے کہ جو ہونا تھا ہو گیا اب صرف یہی ہو سکتا ہے کہ آپ اسی گھر کے ایک کمرے میں کنبے سمیت منتقل ہو جائیں تا کہ آپ لوگوں کے سر پہ چھت بھی رہے اور یہ خلش بھی نہ ہو کہ یہ گھر آپ سے چھن گیا ہے۔

آپ پنچایت کے دباؤ کے تحت پورے گھر سے دستبردار ہو کر ایک کمرے میں منتقل تو ہو جاتے ہیں لیکن اس کے بعد کیا ہو گا۔

نہ تو آپ کے پاس باورچی خانہ ہے، نہ پچے صحن میں کھیل سکتے ہیں اور نہ ہی باہر آنے جانے کے لیے علیحدہ سے کوئی دروازہ۔

ان حالات میں آپ اور آپ کا خاندان خود کو کتنے دن نفسیاتی مریض بننے سے روک سکتا ہے۔ آپ کو وقت بے وقت مایوسی کے دورے بھی پڑیں گے۔ اپنے گھر پر قابض لوگوں سے ہر دوسرے تیسرے روز کسی نہ کسی بہانے جھگڑا بھی ہوگا۔ مار پٹائی بھی ہوگی اور جب آپ کا باہر زور نہیں چلے گا تو پھر آپس میں معمولی معمولی باتوں پر دست وگریبانی رہے گی اور آپ ایک دوسرے کو نوچ کھانے کو دوڑیں گے۔

ان حالات میں آپ سے اکثر یہ بھی کہا جائے گا کہ آس پڑوس کی نیندیں حرام نہ کرو، رہنا ہے تو سکون سے رہو ورنہ یہ کمرہ بھی چھین لیا جائےگا۔

اب سے چھپن برس پہلے تک فلسطینی بھی اسی طرح کے انسان شمار ہوتے تھے جیسے کوئی اور عرب، ہندوستانی ، چینی یا ایرانی ہوتا ہے۔ لیکن انیس سو اڑتالیس کے بعد ان فلسطینوں کو Sub human یا نیم انسان کےدرجے تک پہنچانےکی بھرپور کوششیں کی گئیں اور آج ان سے کہا جا رہا ہے کہ وہ مہذب لوگوں کی طرح رہنا سیکھیں۔