وسعت اللہ خان بی بی سی اردو ڈاٹ کام

چکن تکہ مصالحہ: برطانیہ کی ’قومی دش‘۔۔۔

سن دو ہزار ایک میں اس وقت کے برطانوی وزیرِ خارجہ رابن کک نے لندن میں سوشل مارکیٹ فاؤنڈیشن کی تقریب سے خطاب کرتے ہوئے کہا:

’بلاشبہہ چکن تکہ مصالحہ برطانیہ کی قومی ڈش ہے اور یہ اس بات کی علامت ہے کہ اہلِ برطانیہ بیرونی اثرات کو کتنے بہتر طریقے سے قبول کرکے اپنا لیتے ہیں۔‘

کئی ایشیائی گھرانوں نے انڈین فوڈ کے شاندار مستقبل کو بھانپتے ہوئے اب سے کوئی بیس پچیس برس پہلے بنے بنائے انڈین کھانوں، اچار اور تیار مصالحوں کے کام میں ہاتھ ڈالا اور آج برطانیہ میں کروڑوں پاؤنڈ سالانہ کا بزنس کرنے والی متعدد ایسی کمپنیاں ہیں جنکا آغاز کسی گھر کے معمولی باورچی خانے اور گھریلو تراکیب سے ہوا تھا۔

آج یہ صورتحال ہے کہ ریستوران تو ایک طرف رہے صرف سپر مارکیٹس سالانہ ساٹھ ملین پاؤنڈ کا ستر سے زائد اقسام کا انڈین یا ایشین فوڈ اور مصالحے فروخت کرتی ہیں۔ صرف مارکس اینڈ سپنسر کے فوڈ سپر اسٹورز پر ہی ہر ہفتے ستر ٹن سے زائد چکن تکہ مصالحہ بکتا ہے۔

اگر آپ کسی ایشین / انڈین ریسٹورنٹ میں جائیں تو وہاں ہندوستانی ، پاکستانی یا بنگلہ دیشی کم اور یورپی نژاد چہرے جن میں اکثریت نوجوانوں کی ہوگی، زیادہ دکھائی دیں گے۔

کھانے کا آرڈر عموماً پاپڑ یا بیسن لگی تلی ہوئی پیاز المعروف ’انین بھاجی‘ سے شروع ہوتا ہے اور چکن تکہ مصالحہ ، نان اور وندالو تک جاتا ہے۔ مصالحے کی تیزی سے بچنے کے لیے کوبرا، کنگ فشر یا ٹائگر نامی بیئر کی بوتلوں کا سہارا لیا جاتا ہے۔ چکن تکہ مصالحہ کے علاوہ وندالو سفید فام اہلِ برطانیہ کو اتنا پسند ہے کہ انیس سو اٹھانوے کے فٹبال ورلڈ کپ میں شرکت کرنے والی برطانیہ کی قومی فٹبال ٹیم کے غیر سرکاری ترانے کا نام ہی وندالو رکھ دیا گیا۔

’انگریزوں پر ہندوستانی دسترخوان کا جادو چل گیا‘

کھانے کے معاملے میں بنیاد پرست حلقے کا اعتراض یہ ہے کہ انڈین فوڈ کے نام پر اس طرح کے کھانے بھی دستیاب ہیں جن کا انڈین روائیت اور دسترخوان سے دور دور تک تعلق نہیں۔ مثلاً وندالو کو ہی لے لیجئے جو بنیادی طور پر سرکے میں بھگوئے ہوئے گوشت اور آلو کی ڈش ہے جسے لیموں کے رس اور سرخ مرچوں کے ساتھ پکایا جاتا ہے اور اسے پرتگیزی اپنے ساتھ پرتگال سےگوا لائے تھے۔ لیکن اب اسے اہلِ برطانیہ انڈین ڈش سمجھ کر اس کے مزے لیتے ہیں۔ اسی طرح چکن مدراس ، چکن جالفریزی یا ویجیٹیبل قورمے کا نام ہندوستان میں کم لوگ جانتے ہیں لیکن برطانیہ میں اس طرح کے کھانے کو انڈین کہہ کر سادہ لوح گوروں کو بیچا جا رھا ہے۔

لیکن ان خوردنی بنیاد پرستوں کے رد میں جو دلیل دی جاتی ہے وہ یہ ہے کہ ثقافت کی طرح دستر خوان بھی کوئی جامد شے نہیں ہے۔ جب دو کلچر ملنے سے ایک تیسرا کلچر جنم لے سکتا ہے تو یہی کلیہ فوڈ کلچر پر کیوں لاگو نہیں ہوسکتا۔ مثلاً قورمے کا جنم نیپال میں ہوا جہاں یاک کے دودھ میں پکے ہوئے گوشت کو قورمہ کہا جاتا تھا۔ لیکن جب یہی قورمہ مغل ہندوستان میں آیا تو اس کی شکل بالکل بدل گئی۔ اسی طرح شامی کباب اور پلاؤ بنیادی طور پر ترک کھانے ہیں لیکن اب انہیں انڈین فوڈ کا لازمی جزو سمجھا جاتا ہے۔

اگر لاہور کو کڑاہی گوشت کی جنم بھومی سمجھا جاتا ہے تو برمنگھم والے بالٹی گوشت ایجاد کرنے اور سان فرانسسکو کے زانٹے ریستوران والے تندوری چکن اور تندوری سبزیوں سے سجے انڈین پیزا کے موجد ہونے کے دعوی دار ہیں۔

لیکن اس بحث سے قطع نظر آج برطانیہ میں دس ہزار کے لگ بھگ انڈین یا ایشیائی ریستورانوں میں ہر ہفتے ڈھائی ملین لوگ کھانوں سے لطف اندوز ہوتے ہیں۔ یہ برطانوی ان ریستورانوں ، ٹیک اویز ( کھانے پینے کی وہ دوکانیں جن میں آپ بیٹھ کر کھانا نہیں کھاتے بلکہ بندھوا کر لےجاتے ہیں) اور سپر مارکیٹس میں انڈین کھانے پر سالانہ کوئی ڈھائی بلین پاؤنڈ خرچ کرتے ہیں۔ اس وقت دیسی کھانوں کی صنعت سے ستر ہزار کے لگ بھگ لوگوں کا براہ راست اور ڈیڑھ لاکھ لوگوں کا بلاواسطہ روزگار وابستہ ہے۔گویا انڈین فوڈ کی صنعت سے جتنے لوگوں کا روزگار وابستہ ہے وہ برطانوی سٹیل، کوئلے اور جہازسازی کی صنعت میں کام کرنے والوں کی مجموعی تعداد سے بھی زیادہ ہے۔