آر اقبال ورجنیا کی ایک یونیورسٹی میں پاکستانی طالب علم

واشنگٹن میں ایف بی آئی کا صدر دفتر

امریکہ آنے کے بعد میں نے محسوس کیا کہ اس ملک میں زندگی بسر کرنے کے لئے مذہب سے قریب رہنا واحد راستہ ہے۔ میں نے مذہب کے بارے میں مزید جانکاری حاصل کرنی شروع کردی۔ اور جلد ہیں میں نے اسلام اور اسلامی مراکز سے تعلق قائم کرلیے۔

پھر گیارہ ستمبر آیا اور حالات خراب ہوتے چلے گئے۔ لوگ مجھے مضحکہ خیز نظروں سے دیکھنے لگے۔ ہم لوگوں نے حراستوں کی خبریں سنیں۔ کبھی کبھی خوف لگتا تھا۔ لوگوں کو لگتا ہے کہ یہاں کچھ نہیں ہوتا اور زندگی حسین ہے۔ مجھے معلوم ہے کہ میں مسلسل خوف کے عالم میں رہتا ہوں۔

میں جنوری سن دوہزار دو اور فروری دوہزار تین میں برطانیہ اور پاکستان میں اپنے رشتہ داروں سے ملنے گیا۔ جب میں مارچ میں واپس امریکہ آیا تو امریکی تفتیشی محکمۂ ایف بی آئی کے اہلکار مجھ سے پوچھ گچھ کے لئے پہنچے۔

اس کے بعد سے میرے لئے زندگی کی اذیتیں شروع ہوگئیں۔ حکام میرے دفتر بھی پہنچے اور تین گھنٹوں تک پوچھ گچھ کرتے رہے۔ انہوں نے میرے اوپر الزامات لگائے اور ڈرایا، دھمکایا۔ زندگی آسان نہیں تھی۔ اس دن تو وہ لوگ چلے گئے لیکن میری نیند حرام ہوگئی۔ مجھے گرفتار ہونے کا مسلسل خوف تھا۔

اللہ کو معلوم کیا ہورہا تھا۔ وہ میرے پاس ایک دوست کے بارے میں پوچھنے آئے جو گیارہ ستمبر کے بعد لشکر کے ساتھ ٹرینِنگ کے لئے پاکستان گیا تھا۔ اس کے بعد جون دوہزار تین میں اس کے اور اس کے دوسرے دس ساتھیوں کے خلاف الزامات عائد کیے گئے۔ اس وقت وہ سعودی عرب میں تھا۔ اسے سعودی عرب سے گرفتار کرکے امریکہ لایا گیا، صرف دوروز قبل جب اس کی شادی کراچی میں ہونی تھی۔

افسوس کہ یہ مقدمہ اب بھی چل رہا ہے۔ اس نے الزامات قبول کرلیے اور اسے گیارہ سال کے لئے جیل بھیج دیا گیا۔ مجھے ایف بی آئی نے تین بار واشنگٹن بلایا، پوچھ گچھ کے لئے۔ میں مسلسل خوف کے عالم میں رہتا ہوں، بالخصوص اس وقت جب میں امریکہ سے باہر سفر کرتا ہوں۔ میں یہاں گرین کارڈ ہولڈر ہوں۔

مجھے ایک مسلمان کی حیثیت سے زندگی گزارنے سے کوئی افسوس نہیں ہے۔ افسوس امریکہ ہمارے لوگوں کو ناپسند کرتا ہے۔ کچھ لوگوں کو لگتا ہے کہ یہاں زندگی خوشگوار ہے، لیکن ایسا نہیں ہے۔ میں نے اوپر جن گیارہ لوگوں کا ذکر کیا ہے ان پر مقدمہ چل رہا ہے، اس ماہ۔ لیکن ان میں سے چھ افراد نے پہلے ہی اقرار جرم کرلیا ہے۔