 | | | لالو پرساد بہار کی ایک بااثر جماعت راشٹریہ جنتا دل کے سربراہ ہیں |
بہار میں بھارت کے وزیرِ ریلوے لالو پرساد یادو کے سسر اور ساس کو ٹرین پر بغیر ٹکٹ سفر کرتے ہوئے پکڑ لیا گیا۔ شیو پرساد چوہدری اور ان کی اہلیہ بہار کے علاقے ہریجور سے سِون تک ٹرین کے فسٹ کلاس کمپارٹمنٹ میں سفر کر رہے تھے۔ پکڑے جانے پر انہوں نے ٹکٹ چیکر سے کہا کہ انہوں نے’ آج تک کبھی سفر کے لیے ٹکٹ نہیں خریدا‘۔ ریلوے کے عملے نے ٹکٹ نہ ہونے پر انہیں ٹرین سے اتارنے کی کوشش بھی کی تاہم انہوں نے اترنے سے انکار کر دیا۔ موقع پر موجود بی بی سی کے الوک کمار کے مطابق رابڑی دیوی کے والدین ٹکٹ کے حوالے سے مخمصے کا شکار نظر آ رہے تھے۔ الوک کے مطابق انہوں نے بار بار ایسٹ سنٹرل ریلوے کے ٹکٹ چیکر کو یہ بتانے کی کوشش کی کہ انہیں ٹرین پر ہری پور کے سٹیشن ماسٹر نے بذاتِ خود سوار کروایا ہے اور اس لیے انہیں ٹکٹ لینے کی ضرورت ہی نہیں تھی۔ یہ تاحال واضح نہیں کہ ٹکٹ نہ ہونے پر لالو کے سسر اور ساس کو کیا سزا ملے گی جبکہ ریلوے حکام کے مطابق انہیں قوانین کے تحت جرمانہ کیا جائے گا۔ لالو پرساد یادو انڈیا کے سب سے ’رنگین‘ سیاست دان ہیں اور وہ بہار کی ایک بااثر جماعت راشٹریہ جنتا دل کے سربراہ ہیں جو بھارتی اسمبلی میں حکمران کانگریس کی اتحادی ہے۔ | 
’جو دل میں ہو بول دیتا ہوں‘
