ریحانہ بستی والا ممبئی

ریاست مہاراشٹر میں زیادہ تر ڈانس بار ممبئی میں ہیں

ڈانس بار بند ہونے کے سبب بے روزگار ہونے والی ہزاروں لڑکیاں ملک کی کئی ریاستوں میں جسم فروشی کرنے پر مجبور ہو گئی ہیں۔

حال ہی میں مینا رامو سنگھ نامی بارگرل نے دوپٹہ گلے میں ڈال کر خودکشی کر لی۔ جھوپڑ پٹی میں رہنے والی مینا کی ایک چھوٹی بیٹی ہے لیکن مینا کے شوہر نہیں ہیں ۔

ڈانس بار بند ہونے کے بعد اس کے پاس کوئی آمدنی کا ذریعہ نہیں تھا ۔پڑوسیوں کا کہنا ہے کہ اس نے کھانا بنایا ،کپڑے دھوئے اور سب نے سمجھا کہ وہ سونے چلی گئی لیکن اس نے اندر جا کر خود کشی کر لی ۔

اس کی لاش کا پولیس نے پوسٹ مارٹم نہیں کیا ہے اور گزشتہ چار دنوں سے لاش کوپر ہسپتال کے مردہ خانے میں ہے ۔

بار گرلز ایسو سی ایشن کے صدر ورشا کالے نے بی بی سی سے بات کرتے ہوئے کہا کہ ہزاروں لڑکیاں جسم فرشی کے دھندے میں شامل ہو چکی ہیں ۔جے پور ،اندور ، دہلی ،بنگلور حتکہ کلکتہ کے سونا گاچی علاقہ میں یہ لڑکیاں آج جسم فروشی کرنے پر مجبور ہیں ۔

مہاراشٹر حکومت نے قانونی طور پر ریاست بھر کے ایک ہزار دو سو ڈانس باروں کو بند کرنے کا حکم جاری کیاتھا۔جس سے پچھتر ہزار ڈانس بار گرلز اور اتنی ہی تعداد میں ہوٹل میں کام کرنے والے ملازمین بے روزگار ہو گئے ہیں۔

نئے قانون کے تحت ڈانس بار میں کام کرنے والوں کو کم از کم تین سال کی سزا ہو سکتی ہے ۔پولیس نے شہر کے کئی علاقوں میں بار پر چھاپے مارے اور لڑکیوں کو گاہکوں کے ساتھ گرفتار کیا تھا ۔

ڈانس بار گرلز ایسو سی ایشن اور بیئر بار اینڈ ریستوران ایسوسی ایشن نے اپنے اپنے طور پر عدالت میں حکومت کے فیصلہ کے خلاف اپیل داخل کی ہے ۔جس میں انہوں نے سب سے پہلے عبوری راحت کا مطالبہ کیا تھا۔

ڈانس بار بند ہونے سے صرف لڑکیوں اور ہوٹل میں کام کرنے والے ہی نہیں بلکہ اس سے منسلک کئی اور لوگوں کے روزگار ختم ہو چکے ہیں جس میں رکشہ اور ٹیکسی ڈرائیور بھی شامل ہیں۔

متاثرہ افراد کا کہنا ہے کہ شہر میں فائیو اسٹار ہوٹل اور پب چلتے ہیں جن میں بھی ڈانس ہوتا ہے لیکن حکومت نے ان پر پابندی عائد نہیں کی ہے اس لیے ایک ہی ریاست میں حکومت کی یہ دوغلی پالیسی غلط ہے ۔