روسی سرکس (فائل فوٹو)

آگ نے جانوروں کے پنجروں کو گھیرے میں لے لیا تھا جس سے دس کتے ، سات بلیاں اور چار ’سی لائن‘ جل گئے تھے۔ یہ خیال کیا جا رہا ہے کہ روسی سرکس کمپنی نے گھاٹے میں جانے کے بعد ان جانوروں کو بے یارومددگار چھوڑ دیا تھا۔

جانوروں کے حقوق کی بھارتی تنظیموں نے اس ظالمانہ سلوک پر احتجاج کیا ہے اور اس واقعے کے ذمہ دار افراد کے خلاف عدالت میں جانے کا اعلان کیا ہے۔

ممبئی میں اس سرکس کے اشتہارات کی ذمہ دار ایک مقامی کمپنی کا کہنا ہے کہ اس سرکس کا آخری شو 27 مارچ کو ہوا جس کے بعد سرکس کمپنی خاموشی سے شہر اور ملک چھوڑ کر چلی گئی۔ کمپنی نے اپنے کچھ جانوروں کو بھی ایک مقامی نگران کے پاس چھوڑ دیا۔

’رشین سرکس آن آئس‘ نامی اس سرکس کمپنی کے خاموشی سے چلے جانے کی وجہ قرضوں کی عدم ادائیگی بتائی جاتی ہے۔ یہ بھی کہا گیا ہے کہ نہ صرف کمپنی نقصان میں جا رہی تھی بلکہ اس نے ایک بھارتی ایونٹ مینجمنٹ کمپنی سے بھی ایک بھاری رقم اینٹھ لی تھی۔

اسی بھارتی کمپنی نے روسی سرکس کمپنی کے دورۂ بھارت کا انتظام کیا تھا۔ تاہم اب اس بھارتی کمپنی کا بھی کوئی سراغ نہیں مل رہا ہے۔ پولیس کا کہنا ہے کہ اس ایونٹ مینجمنٹ کمپنی کے تمام اراکین روپوش ہو گئے ہیں۔