آسام: تقریب میں بم دھماکہ
شمال مشرقی ریاست آسام میں یوم آزادی کے موقع پر نکالے جانے والے جلوس میں ایک بم دھماکہ ہوا جس میں کم از کم اٹھارہ افراد ہلاک اور متعدد زخمی ہوئے ہیں۔

پولیس نے آسام کی علیحدگی پسند تنظیم یونائٹیڈ لبریشن فرنٹ آف آسام پر الزام عائد کیا ہے کہ یہ دھماکہ اس نے کرایا ہے۔ ہلاک ہونیوالوں میں دو مقامی سیاست دان بھی شامل ہیں۔

دھماکہ بھارت کے وقت ساڑھے نو بجے آسام کے قصبے کھامجی میں ہوا۔ کھامجی ریاست آسام کے دارالحکومت گوہاٹی سے چار سو ساٹھ کلومیٹر مشرق میں واقع ہے۔ یونائٹیڈ لبریشن فرنٹ آف آسام نے اپیل کر رکھی تھی کہ بھارت کی یوم آزادی کی تقریبات کا بائیکاٹ کیا جائے۔

پولیس کے مطابق ہلاک ہونے ہونے میں اکثریت سکول کے بچوں کی ہے جن کو آزادی کی تقریب میں شرکت کے لیے لایا گیا تھا۔ علیحدگی پسند تنظیم، یونائٹیڈ لبریشن فرنٹ آف آسام بھارت سے علحیدگی کے لیے 1979 سے کوشش کر رہی ہے۔

علیحدگی کی اس تحریک میں پچھلے دس سالوں میں اب تک دس ہزار لوگ مارے جا چکے ہیں۔ پورے بھارت میں سیکیورٹی فورسز نے یوم آزادی کی تقریبات کے دوران علیحدگی پسند گروپوں کی ممکنہ تخریبی کارروائیوں سے نمٹنے کے لیے خصوصی انتظامات کیے ہیں ۔

دارالحکومت دہلی کے اوپر ہیلی کاپٹر پرواز کرتے نظر آتے ہیں اور 65000 ہزار پولیس اور پیراملٹری فورسز تخریبی کاروائیوں سے نمٹنے کے لیے تعینات کیے گئے ہیں ۔

یوم آزادی کے موقع پر بھارتی وزیر اعظم من موہن سنگھ نے لال قلعہ کے تاریخی قلعے کے ’بلٹ پروف‘ سٹیج سے تقریر کرتے ہوئے کہا کہ ان کی حکومت پاکستان کے ساتھ امن قائم کرنے کی کوشش کر رہی ہے ۔

بھارتی وزیر اعظم نے کہا کہ سرحد پار سے دہشت گردی سے امن کی کوششوں کو خطر ہ لا حق ہو سکتا ہے۔

کشمیر: تقریب پر گرینیڈ حملہ
دریں اثناء بھارت کے زیر انتظام کشمیر میں فوج کے زیر انتظام یوم آزادی کی ایک تقریب پر عسکریت پسندوں نے گرینڈ حملہ کیا جس میں چودہ افراد زخمی ہو گئے ہیں۔ پولیس کے مطابق دو زخمیوں کی حالت نازک ہے۔

بی بی سی کے نامہ نگار الطاف حسین کے مطابق سری نگر سے ساٹھ کلو میٹر شمال میں ڈنگی وچہ کے مقام پر فوج کے زیر انتظام ایک سرکاری سکول میں یوم آزادی کی تقریب پر عسکریت پسندوں نے رائفل گرینیڈ داغا جس میں چودہ افراد زخمی ہو گئے۔

سری نگر اور دوسرے علاقوں میں یوم آزادی کی تقریبات پر امن طریقے سے اختتام پذیر ہوئیں۔ علحیدگی پسند تنظیموں کی طرف سے بھارت کے یوم آزادی کے موقع پر ہڑتال کی کال کامیاب ہوئی۔ سڑکیں سنسان اور بازار بند ہیں۔