مدھیہ پردیش: بھارتی جیل سے سات قیدی فرار
بھارت کی وسطی ریاست مدھیہ پردیش کے ضلع کھنڈوا کی جیل سے منگل کی صبح سات قیدی فرار ہوگئے ہیں۔
پولیس کا کہنا ہے کہ فرار ہونے والے تمام افراد کالعدم تنظیم سٹوڈنٹ اسلامک موومنٹ آف انڈیا (سیمی) سے تعلق رکھتے ہیں۔
حکام نے بتایا کہ ان میں سے ایک قیدی کو بعد میں پولیس نے کھنڈوا کی سرودیہ کالونی سے گرفتار کر لیا۔
مقامی صحافی رشی پانڈے نے بی بی سی کو بتایا کہ یہ واقعہ منگل کی صبح رونما ہوا جب سات قیدی جیل کے بیت الخلا کی دیوار توڑ کر فرار ہونے میں کامیاب ہو گئے۔
ان قیدیوں کو جب جیل کی حفاظت پر مامور عملے نے روکنے کی کوشش کی تو انہوں نے ان پر چاقو سے حملہ کر دیا اور پھر ایک محافظ کی رائفل چھین کر فرار ہو گئے۔
پولیس نے فرار ہونے والے قیدیوں کے نام امجد، ابو فیصل، جابر حسین، اعجاز حسین، اسلم، محبوب اسمعیل اور عابد مرزا بتائے ہیں۔
اطلاعات کے مطابق بعد میں پولیس نے عابد مرزا کو سرودیہ کالونی سے گرفتار کر لیا۔
پولیس حکام کے مطابق جیل سے فرار ہونے والے باقی قیدیوں کو پکڑنے کے لیے مہم جاری ہے۔
End of سب سے زیادہ پڑھی جانے والی
ان مفرور مجرموں میں سے ایک جابر حسین کو پولیس نے اے ٹی ایس کے جوان سیتارام یادو کے قتل کے الزام میں گرفتار کیا تھا۔
