مضاہرین نے حکومت کے خلاف سخت ناراضگی ظاہر کی ہے
بھارت کے زیرانتظام کشمیر میں ہزاروں سرکاری ملازمین نے وادی کے تجارتی مرکز لال چوک میں حکومت مخالف مظاہرے کیے ہیں اور علیٰحدگی پسند رہنماؤں نے بھی ان کے مسائل پر احتجاج کا اعلان کیا ہے۔
مظاہرین تنخواہوں اور ریٹائرمنٹ کی حد میں اضافے کا مطالبہ کر رہے تھے۔
مظاہرین میں خواتین بھی شامل تھیں، اور انہوں نے حکومت کو خبردار کیا کہ اگر مطالبات پورے نہ کیے گئے تو وہ بچوں سمیت سڑکوں پر آئیں گی۔
ملازمین کی ایک انجمن کے سربراہ عبدالقیوم وانی نے اس موقعہ پر اعلان کیا کہ وہ اپنے مطالبات منوانے کے لیے سول سوسائٹی اور علیٰحدگی پسندوں سے بھی رابطہ کرینگے۔
اِدھر علیحدگی پسند رہنما میر واعظ عمر فاروق نے اعلان کیا ہے کہ وہ عوامی اور انتظامی مسائل پر خاموش نہیں بیٹھیں گے۔
پولیس نے ملازم مظاہرین کو منتشر کرنے کے لیے لاٹھی چارج کیا اور مظاہرین پر رنگین پانی چھڑک کر جلوس کو منتشر کر دیا۔
واضح رہے کشمیر میں چھ لاکھ سے زائد سرکاری ملازمین ہیں، جن کی تنخواہوں پر حکومت کا سالانہ بارہ ہزار کروڑ روپے کا خرچہ آتا ہے۔ حکومت نے مالی مشکلات کو دیکھتے ہوئے نئے ملازمین کے لیے پینشن کی سکیم ختم کر دی ہے۔
کشمیری ملازمین کا کہنا ہے کہ انہیں حکومت ہند کے براہ راست کنٹرول والے محکموں میں کام کرنے والے ملازمین کو دی جانے والی سہولتوں سے محروم رکھا جا رہا ہے۔
