رامانوجن کے زیادہ تر رشتہ داروں کا یا تو انتقال ہو چکا ہے یا ان کے بارے میں کسی کو معلوم نہیں

تینتیس سال کی عمر پانے والے رامانوجن ریاست تمل ناڈو میں پیدا ہوئے۔ بھارت کے موجودہ صدر اے پی جے عبدالکلام کی جائے پیدائش رامانوجن کی جائے پیدائش کے قریب ہے۔ رامانوجن کے بارے میں کہا گیا ہے کہ انہیں ’لامحدود کی سمجھ تھی‘۔

ریاضی سے بے انتہا لگاؤ کی وجہ سے انہیں کالج پہنچ کر تعلیم چھوڑنا پڑی کیونکہ وہ دیگر مضامین کی طرف توجہ نہیں دے سکے۔

پیسوں کی کمی کی وجہ سے رامانوجن کا گزارا زیادہ تر خیرات پرتھا مگران کی ریاضی میں دلچسپی برقراررہی۔

رامانوجن نے مدراس میں کلرک کی نوکری شروع کر دی لیکن ساتھ ساتھ انہوں نے لوگوں کو اپنے ریاضی کے علم سے متعارف کروانے کی کوششیں جاری رکھیں۔ اسی سلسلے میں انہوں نے جامعہ کیمبرج کے ریاضی کے ماہرین کو خط لکھنا شروع کر دیے۔

	رامانوجن نے پانچ سال ہارڈی کے ساتھ کام کیا

رامانوجن پانچ سال کیمبرج میں گزارنے کے بعد انیس سو انیس میں بھارت واپس آئے اور ایک سال کے بعد ان کا انتقال ہوگیا۔ رامانوجن کی برطانیہ کے سخت سرد موسم میں صحت بہت خراب ہو گئی تھی جہاں انہوں ہمیشہ صرف سبزیوں پر مشتمل خوراک کھائی۔

ان کی مختصر زندگی پر کئی لاکھ ڈالر سے بننے والی یہ فِلم ان کی جائے پیدائش ایروڈ، کمبکونم جہاں وہ بڑے ہوئے اور کیمبرج میں فلمائی جائے گی۔

دیو بینیگلنے کہا کہ ان کے نزدیک رامانوجن کی تحقیق نے جدید دور میں ڈجیٹل انقلاب کے بیج بوئے تھے۔ انہوں نے کہا کہ خودکار ٹیلر مشینیں جن سے پیسے نکلوائے جاتے ہیں رامانوجن کے نظریہ پارٹیشن کے تحت کام کرتی ہیں۔