ریحانہ بستی والا ممبئی

رام گوپال ورما اور امیتابھ بچن

فلم ڈان کو نوجوان فلمساز فرحان اختر بنانے کی تیاریوں میں مصروف ہیں تو فلم ’ڈی‘ اور ’سرکار‘ کے فلمساز رام گوپال ورمانے ’شعلے‘ کو دوبارہ بنانے کا اعلان کیا۔

رمیش سپی کی یادگار فلم شعلے میں سنجیو کمار، امیتابھ بچن، دھرمیندر، جیا بچن اور ہیما مالنی تھیں۔ ان تمام اداکاروں کی کیمسٹری میں ایک نئے اداکار امجد خان نے ویلن کے روپ میں بولی وڈ میں انٹری کی تھی۔ کہانی رام گڑھ گاؤں کی تھی لیکن کیا رام گوپال ورما اسی کہانی کو ری میک کریں گے؟

اس کے جواب میں ورما نے کہا کہ نہیں ان کی کہانی گاؤں کی نہیں بلکہ ممبئی شہر کی ہو گی اور اس میں کوئی ڈاکو ویلن نہیں بلکہ پولس اور انڈرورلڈ کے درمیان جنگ رہے گی۔

ورما نے فلم شعلے کم از کم ستائیس مرتبہ دیکھی ہے اور ان کے مطابق اس فلم کو دیکھ دیکھ کر انہوں نے ہدایت کاری سیکھی ہے۔ ایک طرح سے یہ فلم ان کے لیے سکول ثابت ہوئی۔

فلم شعلے کم از کم ستائیس مرتبہ دیکھی ہے اور اس فلم کو دیکھ دیکھ کر انہوں نے ہدایت کاری سیکھی ہے

ورما انڈرورلڈ پر فلمیں بنانے کے لیے مشہور ہیں اور اس فلم میں بھی وہ انڈرورلڈ کو ہی نمایاں کریں گے ’میں اس فلم میں ستیہ اور ڈی کو ملا جلا کر پیش کروں گا۔ یہ فلم میرے لیے بہت بڑا امتحان ہو گی اور پتہ نہیں میں اس پر کتنا کھرا اتروں گا۔‘

فلم کی کاسٹ کے بارے میں ابھی ورما نے کچھ طے نہیں کیا ہے لیکن وہ اس فلم میں نئے چہروں کو لیں گے۔ ویسے بھی ورما اپنی ہر فلم میں نئے چہروں کو لے کر ہی فلم بناتے ہیں اور اس لیے ان کی فلمیں کم بجٹ کی ہوتی ہیں۔ صرف سرکار میں انہوں نے امیتابھ بچن جیسے بڑے اداکار کو لیا تھا اور اس لیے وہ ان کے اب تک کی بنائی گئی فلموں میں سب سے بڑے بجٹ کی فلم تھی۔

شعلے سے پہلے فرحان اختر نے ڈان بنانے کا اعلان کیا تھا اور انہوں نے اس پر کام بھی شروع کر دیا ہے۔ وہ اپنے اس فلم کے بارے میں ابھی میڈیا سے بات کرنا نہیں چاہتے ہیں لیکن جو خبریں ملی ہیں ان کے مطابق وہ ہو بہو ڈان کی ہی طرح اپنی فلم بنائیں گے اس میں ’ کھئی کے پان بنارس والا‘ بھی ہو گا اور اس فلم میں امیتابھ بچن کا بھی رول ہوگا لیکن ڈان کا کردار وہ کسے دیں گے یہ پتہ نہیں۔