اس پروگرام میں موسیقی، رقص، ڈرامہ، مصوّری، نقاشی، سنگ تراشی اور فنِ تعمیر کے ماہرین سے مل کر یہ معلوم کرنے کی کوشش کریں گے کہ ملک میں فنکار کا کیا مقام ہےاور یہاں مختلف فنون کا مستقبل کیا ہے۔

معجزۂ فن کے عنوان یہ ہفتہ وار پروگرام عارف وقار کی ترتیب و پیشکش ہے جو ہر پیر کو جہاں نماں اور سیربین میں نشر ہوگا۔

یہ سیریز بی بی سی اردو لسنرز کی اس خواہش کا جواب ہے جو انہوں نے حال ہی میں بی بی سی کی ایک ماہ کی مہم سنگت کے دوران ظاہر کی تھی اس مہم میں بی بی سی کے عملے نے ملک بھر میں اپنے سامعین سے ملاقات کی تھی۔

بی بی اردوسروس کے ریڈیو ایڈیٹر شاہ زیب جیلانی کا کہنا ہے ’ پاکستان میں بی بی سی سنگت مہم کے دوران ہم نے سامعین سے ملاقات کی اور اس دوران زیادہ تر لوگوں کا کہنا تھا کہ ہمیں ثقافتی امور پر زیادہ توجہ دینی چاہئے‘۔

عارف وقار نے اس سے قبل مزاحیہ فیچر ’سویرے سویرے‘ پیش کیا جس میں مداری اور جمورے کی نوک جھونک کے بہانے ہلکا پھلکا سیاسی طنز پیش کیا جاتا تھا۔

اس کے علاوہ ’گھر کی بات‘ نامی سلسلہ وار ڈرامہ عارف وقار کی پیشکش تھی جس میں برطانیہ میں مقیم ایک ایشائی خاندان کا قصّہ تھا۔

اُمید ہے کہ سننے والوں کو یہ پروگرام بھی پسند آئے گا اور وہ خطوط اور ای - میل کے ذریعے اپنی بے باک رائے سے آگاہ کرتے رہیں گے۔ ریڈیو پر سننے کے ساتھ ساتھ آپ لوگ ان معروضات کو ہماری ویب سائیٹ پر پڑھ بھی سکتے ہیں۔