اعجاز مہر بی بی سی اردو ڈاٹ کام، اسلام آباد

تاج الدین اور افتخار احمد کے فن پاروں کو پاکستان میں پزیرائی ملی۔

نمائش میں ان کے چالیس سے زائد فن پارے رکھے گئے تھےجن میں بنگلہ دیش کے مختلف شعبہ ہائے زندگی بشمول ثقافت، تاریخ، زیورات، معاشرے میں موجود طبقاتی فرق، رہن سہن اور مذہب سے لے کر طوائف کی زندگی اور تانگے نما سائیکل رکشہ تک کی عکاسی کی گئی تھی۔

چھبیس سے انتیس اپریل تک جاری رہنے والی اس نمائش کا افتتاح پاکستان میں بنگلہ دیش کے ہائی کمشنر نے کیا۔ تقریب میں عالمی بنک کے پاکستان میں سربراہ جون وال، سمیت مصوری میں دلچسپی رکھنے والے کئی شہریوں نے شرکت کی اور بنگالی فن مصوری کے شاہکار بھی مہنگے داموں خریدے ۔

بنگلہ دیشی مصور پاکستان کے مشہور مصورگل جی اور صادقین سے خاصے متاثر تھے، ان کا کہنا تھا کہ پاکستان کے ان دونوں مصوروں کے پاس سیکھنے کے قابل ہنر ہے۔

تاج الدین کا کہنا تھا کہ وہ گزشتہ چھبیس سال سے فن مصوری سے وابستہ ہیں، امریکہ، آسٹریلیا اور پاکستان سمیت وہ دنیا کے بہت سارے ممالک میں فن پاروں کی نمائش کر چکے ہیں۔

افتخار احمد کا کہنا تھا کہ وہ سکالرشپ پر فرانس گئے اور فن مصوری میں تربیت و تعلیم حاصل کی اور گزشتہ اٹھارہ برس سے وہ فن مصوری میں طبع آزمائی کر رہے ہیں۔

دونوں مصوروں کی رائے تھی کہ دنیا میں فن مصوری میں ٹہراؤ آگیا ہے اور فن مصوری سے وابستہ پوری دنیا جدت کی تلاش میں ہے کہ کیا نئی چیز ہوسکتی ہے اور وہ کیا دیں کہ دنیا انہیں یاد رکھے۔