ساجد اقبال بی بی سی اردو ڈاٹ کام

بعد میں شمیم آراء، سنگیتا اور ثمینہ پیرزادہ سمیت متعدد اداکاراؤں نے ہدایت کاری کے میدان میں قسمت آزمائی کی اور اپنی صلاحیتوں کا سکہ منوایا۔

ریما ہدایت کاری کے میدان میں

فلمی دنیا کی انہی معروف خواتین کی پیروی کرتے ہوئے لالی وڈ کی ایک اور کامیاب ہیروئین ریما بھی ایک ہدایت کارہ اور فلمساز کی حیثیت سے فلمی میدان میں اتری ہیں۔

ان کی پہلی کاوش فلم ”کوئی تجھ سا کہاں” میں معمر رانا ریما کے مدمقابل ہیرو ہیں جبکہ فلم کے دیگر اداکاروں میں ندیم، وینا ملک، ببرک شاہ اور جاز گرل کی حیثیت سے پہچانی جانے والی ماڈل صوفیہ مرزا شامل ہیں۔

فلم کی کہانی اور مکالمے خلیل الرحمٰن قمر جبکہ گانے عقیل روبی نے لکھے ہیں۔ فلم کے موسیقار امجد بوبی ہیں۔

بی بی سی اردو ڈاٹ سے ایک انٹرویو میں اداکارہ ریما نے بتایا کہ اس فلم کی تمام تر شوٹنگ برطانیہ میں کی جائے گی جبکہ اس کے گانے ہندوستانی گلوکاروں اور گلوکاراؤں کی آواز میں ممبئی میں ریکارڈ کئے جائیں گے۔

ریما کی ٹیم

پونے دو سو کے قریب اردو اور پنجابی فلموں میں جلوہ گر ہونے والی ریما حال ہی میں ایشیاء کے سب سے بڑے فلمی مرکز ممبئی کا دورہ کر کے واپس آئی ہیں اور ان کا کہنا ہے کہ اس دورہ کے دوران ان کا مشاہدہ ان کے فلمی منصوبے کی کامیابی میں بہت کارآمد ثابت ہوگا۔

”اس بات میں کوئی شک نہیں کہ ٹیلنٹ میں ہم کسی سے کم نہیں ہیں لیکن تیکنیکی اعتبار سے ہندوستانی فلمی صنعت ہم سے بہت آگے ہے۔ ہم آج بھی چھپن سالہ پرانے سازوسامان کے ساتھ کام کر رہے ہیں جبکہ بالی وڈ میں کام کرنے والوں کو فلمسازی کی جدید ترین سہولتیں میسر ہیں۔

اداکارہ ریما نے اپنے خلاف ہونے والی اس تمام تر تنقید کو مسترد کر دیا جس میں کہا گیا تھا کہ فلمسازی اور ہدایت کاری کے میدان میں ان کی آمد کی بنیادی وجہ لالی وڈ کی ٹاپ ہیروئین کی حیثیت سے ان کی ناکامی ہے۔

”میں اب بھی پاکستانی فلم بینوں کی پسندیدہ تیرین ہیروئین ہوں جس کا سب سے بڑا ثبوت مجھے حال ہیں میں ایک بین الاقوامی فلم ساز ادارے کی طرف سے ملنے والا تشہیری مہم کا ملٹی ملین کنٹریکٹ ہے جس کے لئے مجھے رائے عامہ کے ایک جائزے کے بعد منتخب کیا گیا ہے۔

ریما نے گزشتہ سال ریلیز ہونے والی اپنی واحد فلم ”شرارت” کی کانامی کا ذکر کرتے ہوئے فلم میں جس رول کے لئے انہیں سائن کیا گیا تھا وہ کچھ اور تھا جبکہ فلم میں ادا کیا جانے والی رول کچھ اور تھا۔

جو رول مجھے دیا گیا اس میں اداکاری کے جوہر دکھانے کی کوئی گنجائش ہی نہیں تھی اور اگر کردار میں اداکاری کا کوئی مارجن ہی نہ ہو تو اس کے لئے اداکار یا اداکارہ کو مورد الزام ٹھہرانا ٹھیک نہیں ہے۔

ریما کا کہنا ہے کہ گزشتہ دو تین سالوں میں ان کے زیادہ فلمیں نہ کرنے کی بنیادی وجہ یہ ہے کہ ان سالوں میں لالی وڈ میں بننے والی فلموں میں ہیروئین کے لئے اداکاری کی کوئی گنجائش ہی نہیں چھوڑی گئی۔

اگر آپ ان فلموں پر نظر ڈالیں تو آپ کو ہیرؤئین کا کردار ایک ثانوی حیثیت کا نظر آئے گا۔ دو چار گانے اور چند بھرتی کے سین اور بس۔ میں ہیروئین کے کردار کو فلم میں واپس لانا چاہتی ہوں اور اس لحاظ سے بارش کا وہ پہلا قطرہ بننا چاہتی ہوں جو لالی وڈ کی تپتی گلیوں کو مہکا دے اور فلم بینوں کے لئے راحت کا باعث بنے۔