یہ صفحہ دوست کو ای میل کیجیئے		پرِنٹ کریں

روایتی دلہنوں کے برعکس برٹنی نے اپنی شادی کے دن جینز اور بیس بال ٹوپی پہن رکھی تھی

پاپ سپر سٹار برٹنی سپیئرز نے اپنے بچپن کے دوست جیسن الگزینڈر کے ساتھ شادی دو دن بعد ہی ختم کرنے کے لئے اقدامات شروع کر دیئے ہیں۔

بائیس سالہ گلوکارہ کی اپنے دیرینہ ساتھی سے شادی ہفتے کے روز لاس ویگاس میں انجام پائی تھی۔

تاہم معروف لوگوں کے بارے میں خبریں شائع کرنے والی ویب سائٹ پیپل ڈاٹ کام کا کہنا ہے کہ برٹنی سپیئر کی جیسن الگزینڈر سےشادی محض ایک مذاق تھا جو بہت آگے چلا گیا۔

جولائی میں برٹنی نے کنوارے پن سے محروم ہونے کا اقرار کیا تھا۔ اس سے پہلے کئی سالوں تک برٹنی کنواری ہونے کا دعویٰ کرتی رہی ہے۔

برٹنی سپیئرز کا کہنا تھا کہ وہ اس وقت تک کنواری رہیں گی جب تک ان کی باقاعدہ شادی نہیں ہو جاتی۔

برٹنی کا شوہر جیسن الیگزانڈر

موسیقی کی تاریخ میں سب سے زیادہ پسند یدگی کی نظر سے دیکھی جانے والی گلوکارہ اب اس بات کی کوشش کر رہی ہیں کہ انہیں ایک کچی عمر کی معصوم لڑکی کے بجائے نسوانی حسن اور لاابالی سیکس کی ایک علامت سمجھا جائے۔

جینز اور بیس بال ٹوپی کے عروسی لباس میں ہونے والی یہ شادی ہفتے کے روز لاس ویگاس کے لٹل وائٹ ویڈنگ چیپل میں ہوئی۔

یہ چیپل سال بھر چوبیس گھنٹے کھلا رہتا ہے۔ لٹل وائٹ چیپل میں اس سے پہلے جون کولنز، جوڈی گارلینڈ، ڈکسی چکس نتالی مینز سے لیکر بروس ولس اور ڈینی مور تک کی شادی ہو چکی ہے۔

پیپل ڈاٹ کام نے برٹنی کے کے قریبی ذرائع کے حوالے سے کہا ہے کہ گلوکارہ اور اس کے دیرینہ دوست نے شادی کرنے کا فیصلہ لاس ویگاس میں اختتام ہفتہ پر ہلاگلا سے بھرپور ایک ملاقات کے دوران کیا تھا۔

ویب سائٹ کے مطابق یہ شادی ایک مذاق کا نتیجہ تھی جو بہت آگے تک چلا گیا۔ رپورٹ کے مطابق اب مذاق کے نتیجے میں انجام پانے والی اس شادی کو ختم کرانے کے لئے انتظام کئے جا رہے ہیں۔

یہ برٹنی سپیئرز اور جیسن الگزینڈر دونوں کی پہلی شادی ہے۔

سن انیس سو ننانوے سے لیکر اب تک برٹنی سپیئرز کے پانچ کروڑ چالیس لاکھ البم فروخت ہوچکے ہیں۔