یہ صفحہ دوست کو ای میل کیجیئے		پرِنٹ کریں

سی ڈی میں بدھوں کے مقدس مذہبی نغمے ہیں

بھارت میں بدھ مت کے راہبوں کی ریکارڈ کی گئی میوزک کی ایک سی ڈی کو اس سال کے گرامی ایوارڈز کے لئے نامزد کرلیا گیا ہے۔ ایوارڈ کی یہ چھیالیسویں تقریب اگلے برس فروری میں امریکی شہر لاس اینجلس میں منعقد ہوگی۔

شیرابلنگ نامی راہبوں کی خانقاہ کے سربراہ ٹائی سیتو رنپوچے سے رابطہ کرنے کی کوشش کی گئی لیکن وہ خانقاہ میں موجود نہ تھے۔ تاہم ان کے سیکریٹری نے بی بی سی کو بتایا ہے کہ یہ خبر ان کے لئے بہت خوشی کا باعث ہے اور وہ اس کی سرکاری تصدیق کا انتظار کررہے ہیں۔

یہ خانقاہ بھارتی شہر دھرم شالہ میں واقع ہے جو نئی دہلی کے چار سو کلومیٹر شمال میں ہے۔

تبت کی ایک معروف ویب سائیٹ نے ہفتہ کو اس خبر کی تصدیق اپنی ویب سائیٹ پر جاری کردی تھی۔ اعزاز کے لئے ان نغموں کی نامزدگی چار دسمبر کو کی گئی تھی۔

بدھ ترجمان کے مطابق اس آڈیو ڈسک میں تبت کے بدھ راہبوں کے مقدس نغمے، مراقبے کی دعائیں اور بدھوں کی دیگر مذہبی رسومات کے گیت شامل ہیں۔

انہوں نے مزید بتایا کہ کچھ مقدس نغموں کا تعلق ساتویں صدی سے ہے جب مختلف خانقاہوں میں ان گیتوں کا ارتقاء ہوا اور پھر اپنے آپ کو مذہب کے لئے وقف کرنے والے بدھ ان نغموں کو اپنے ساتھ بھارت لے آئے۔

اس سی ڈی کو بہترین روایتی نغموں کی درجہ بندی کی فہرست میں چنا گیا ہے۔ بدھ ترجمان کے مطابق ان نغموں کی ریکارڈنگ خانقاہ ہی میں ایک برس قبل کی گئی تھی اور اس کے لئے نیوزی لینڈ میں بدھوں کے مرکز کا تعاون شامل ہے۔

اس سی ڈی کو اسی سال جنوری میں ریلیز کیا گیا تھا۔ ترجمان نے کہا کہ یاد رکھیے کہ یہ مقدس مذہبی نغمے ہیں عام کاروباری گانے نہیں ہیں۔

تبت کے بدھ تارکین وطن کا خیال ہے کہ اس نامزدگی سے مغربی دنیا میں تبت کی ثقافت کے بارے میں شعور اجاگر ہوگا۔