یہ صفحہ دوست کو ای میل کیجیئے		پرِنٹ کریں

نوبل انعام حاصل کرنے والے افریقی ادیب جے ایم کوئٹزی

سن دو ہزار تین کا ادب کا نوبل انعام افریقی ادیب جان میکس ویل کوئٹزی کو دیا گیا ہے اور انیس سو اسّی سے یہ اب تک چوتھا موقع ہے کہ ادب کا یہ سب سے بڑا انعام کسی افریقی ادیب کو دیا گیا ہے۔

کئی مہینوں کی چہ مگوئیوں کے بعد نوبل انعام دینے والے ادارے سوئیڈش نوبل اکیڈمی ہوریس اینگڈال نے بالآخر اپنی خاموشی کا قفل ذرائع ابلاغ کے نمائندوں اور عام لوگوں کی بڑی تعداد کے سامنے اس وقت توڑا جب انہوں نے حوصلہ افزا اور پرستائش آوازوں کی گونج میں اس سال کا نوبل انعام افریقی ادیب جان میکس ویل کوئٹزی کو دیئے جانے کا اعلان کیا۔

جے ایم کوئٹزی ادب کا یہ سب سے بڑا اعزاز حاصل کرنے والے سوویں حقدار ہیں جبکہ وہ انیس سو اسّی سے اب تک چوتھے افریقی ادیب ہیں جنہیں اس اعزاز سے نوازا گیا ہے۔ گزشتہ کئی برس سے امید کی جارہی تھی کے یہ انعام انہیں ہی دیا جائے گا۔

تریسٹھ سالہ افریقی ادیب کو یہ انعام ان کی ان صلاحیتوں کے اعتراف کے طور پر دیا گیا ہے جن کے تحت وہ پورے انہماک سے وہ سارے روپ دکھا سکتے ہیں جو وہ خود دیکھ رہے ہوتے ہیں۔

جے ایم کوئٹزی ایک کروڑ سوئیڈش کرونور (یا تیرہ لاکھ ڈالر) کا انعام ماہ دسمبر میں ایک تقریب میں وصول کریں گے۔