’یہ ماتم کے ساتھ سوچنے کا بھی وقت ہے‘

بالی وڈ کے فلمی ستاروں نے بھی پاکستان کے شہر پشاور میں سکول پر طالبان کے حملے میں بچوں کی ہلاکت پر گہرے صدمے کا اظہار کرتے ہوئے اس واقعے کی سخت الفاظ میں مذمت کی ہے۔

کئی اداکاروں نے اپنے رد عمل میں اس بہیمانہ واقعے پر افسوس کا اظہار کرتے ہوئے طلباء کو خراج تحسین پیش کیا ہے۔

ٹوئٹر پر اپنے پیغام میں اداکار شاہ رخ حان نے لکھا ’مجھے لگتا ہے کہ بچوں کے ساتھ رہنے سے ہمارے دلوں کو امن و شانتی حاصل ہوتی ہے اور ایسے لوگوں کے لیے میرے دل میں بے انتہا نفرت ہے جو امن کے ان سفیروں پر حملہ کرتے ہیں۔‘

اس سلسلے میں معروف اداکار انوپم کھیر نے بڑے ہی جذباتی انداز میں ایک خط تحریر کر کے اپنے سخت ردِ عمل کا اظہار کیا ہے۔

اخبار ہندوستان ٹائمز نے ان کے اس خط کو تفصیل سے شائع کیا ہے جو سوشل میڈیا پر بھی شیئر کیا جا رہا ہے۔

اخبار کے مطابق انہوں نے لکھا کہ یوں تو جب بھی کسی گلی کوچے میں بھی بم دھماکہ ہوتا یا کوئی بھی دہشت گردی کا واقعہ ہو ’تو ہماری تھوڑی سی موت ہوجاتی ہے۔ میں کچھ دنوں سے تو اکثر ہی تھوڑا تھوڑا مرتا رہا ہوں۔‘

’لیکن آج، جب آپ نے پشاور کے ایک سکول میں ایک سو تیس سے زائد بچوں کا خون بہایا، تو مجھے خوف ہے کہ مجھ میں اب کچھ بھی نہیں بچا۔ مجھے نہیں معلوم تمہارا مقصد کیا تھا، لیکن حقیقت میں تم نے مجھے ایک زندہ لاش میں تبدیل کر دیا۔‘

انوپم کھیر نے اپنے خط میں دہشت گردوں سے پوچھا کہ بچوں کو اس طرح ذبح کرنے کے لیے آخر کیا کوئی مذہبی دلیل بھی پیش کی جا سکتی ہے۔

انہوں نے لکھا کہ ’یہاں تک کہ جانور بھی کسی وجہ سے ہلاک کرتے ہیں، بھوک کے خوف سے۔ لیکن تم نے تو بلاوجہ اندھا دھندگولیاں چلائيں۔ سچ میں تم تو برائی سے بھی بڑھ کر ہو۔‘

اداکار اور ہدایت کار جاوید اختر کے بیٹے فرحان اختر نے بھی اس واقعے پر گہرے صدمے کا اظہار کرتے ہوئے ٹویٹ کیا۔ ’میرا دل ٹوٹ گیا ہے۔ یہ بہت تکلیف دہ دن ہے، خدا سبھی کو ہمت دے۔‘

پاکستانی اداکار فواد خان نے لکھا ’میں گہرے غم اور صدمےمیں ہوں۔ معصوم بچوں کا قتل عام وحشی پن ہے۔ میری دعائیں ان بچوں کے ماں باپ کے ساتھ ہیں۔‘

پاکستانی فنکار ماہرہ خان نے اپنے رد عمل میں لکھا ’سب سےچھوٹے تابوت سب بھاری بھی ہوتے ہیں۔ یہ نفرت انگیز لوگوں کی بزدلانہ حرکت ہے۔‘

پاکستانی گلوکار شفقت امانت علی کا کہنا تھا ’دہشت گردی کا کوئی مذہب نہیں ہوتا۔ ان لوگوں نے یہ ثابت کر دیا کہ اللہ ان کی طرف نہیں ہے کیونکہ دنیا کے مستقبل کو مارنا اللہ نے نہیں سکھایا۔‘

بالی وڈ کے معروف نغمہ نگار پرسون جوشی نے پشاور میں ہلاک ہونے بچوں کے لیے ایک خاص نظم لکھی ہے جو اخبار ہندوستان ٹائمز نے اپنی سائٹ پر شائع کی ہے۔

انہوں نے اپنی نظم میں کہا ہے کہ اس واقعے پر تو آسمان کو بھی زور سے رونا چاہیے اور تہذیبوں کی گردنیں بھی شرم سے جھک جانی چاہیں۔ یہ ماتم کا وقت تو ہے لیکن سوچنے کا بھی وقت آگیا ہے۔