سوشل میڈیا میرے لیے نہیں ہے: قطرینہ کیف

بالی وڈ کی اداکارہ قطرینہ کیف کو سماجی رابطے کے لیے مقبول فیس بک اور ٹوئٹر جیسی ویب سائٹس پر رہنا پسند نہیں ہے۔

ان کا کہنا ہے کہ اس طرح کی ویب سائٹس پر کئی بار لوگ گالی گلوچ پر اتر آتے ہیں اس لیے وہ ان سے بچتی ہیں۔

بھارتی فلمی صنعت سے وابستہ بیشتر اداکار، اداکارائیں اور پروڈیوسرز سوشل میڈیا پر کافی فعال ہیں اور اپنے خیالات کا اظہار کرتے رہتے ہیں لیکن قطرینہ اس سے بالکل مختلف ہیں۔

قطرینہ کیف آج کل اپنی آنے والی فلم ’بینگ بینگ‘ کی پروموشن میں مصروف ہیں جہاں صحافیوں سے بات چیت کے دوران انھوں نے یہ باتیں کہیں۔

سوشل میڈیا سے دور رہنے کی وجہ بتاتے ہوئے انھوں نے کہا ’مجھے جو کہنا ہوتا ہے وہ اپنی فلموں کے پروموشن کے دوران کہہ دیتی ہوں۔ پھر اپنے خیالات کے اظہار کے لیے سوشل میڈیا کی کیا ضرورت ہے؟‘

قطرینہ کا کہنا ہے کہ وہ سوشل میڈیا پر لوگوں کے خیالات اور باتوں کے انداز کو پسند نہیں کرتیں۔

وہ کہتی ہیں ’میں کئی بار دیکھتی ہوں کہ فلمی ستاروں کے مداحوں کے درمیان لڑائیاں شروع ہو جاتی ہیں۔ آپ کتنے بھی بڑے فلمی ستارے کیوں نہ ہوں، لوگ بیہودہ باتیں لکھتے رہتے ہیں۔ یہ سب فضول کی باتیں ہیں۔‘

بھارتی اداکارہ کا کہنا ہے کہ ان میں قوت برداشت کم ہے اور اگر کوئی ان کے بارے میں کچھ غلط لکھے یا کہے گا تو وہ چپ نہیں بیٹھیں گی۔

انھوں نے مزید کہا ’میں کسی کی گندی یا بیہودہ بات کا جواب دینے کے لیے کچھ کہوں گی تو پھر حالات اور بے قابو ہوجائیں گے تو بہتر ہے کہ میں ان سب لڑائیوں سے باہر ہی رہوں۔‘