85 ویں آسکر ایوارڈز کی تقریب چوبیس فروری سنہ دوہزار تیرہ کو ہالی ووڈ کے ڈالبی تھیئٹر میں پیش کی جائے گی۔
آسکر ایوارڈز کے منتظمین نے کہا ہے کہ سنہ دو ہزار تیرہ کے آسکر ایوارڈز کی تقریب ہالی ووڈ کے معروف پروڈیوسرز کریگ زدان اور نیل میرن پیش کریں گے۔
منتظمین کا خیال ہے کہ زدان اور میرن کی جوڑی آسکر ایوارڈز کی تقریب کو اپنے منفرد انداز سے پیش کرے گے۔
زدان اور میرن کی جوڑی نے ’شکاگو‘جیسی معروف فلم مشترکہ طور پر پیش کی تھی جس نے سنہ دو ہزار دو میں چھ آسکر انعامات حاصل کیے تھےاور اسے اس سال کی بہترین فلم کے انعام سے بھی نوازا گیا تھا۔
ان دونوں کی جوڑی نے سنہ دوہزار سات میں ’ہیئر سپرے‘ اور ’دی بکٹ لسٹ‘ پروڈیوس کی تھی اور فی الحال وہ امریکی ٹی وی سیریز’سمیش‘ کے ایگزیکٹیو پروڈیوسرز ہیں۔
آسکر اکیڈمی کے صدر ہاک کوش نے دونوں کو مستقبل کے بارے میں فکر رکھنے والے مفکرین قرار دیتے ہوئے کہا کہ وہ آسکر کے شو میں اپنا منفرد نظریہ شامل کریں گے۔
انھوں نے کہا ’دونوں کی مشترکہ صلاحتیں بہت نمایاں ہیں اور فلم کے لیے ان کا لگاؤ ہمارے شو کے لیے انتہائی موزوں ثابت ہوگا۔
مبصرین کا خیال ہے کہ آسکر کی پیشکش میں ان کی شمولیت کا مطلب یہ ہے کہ آسکرکی پیشکش روایتی طرز کی ہوگی جس میں مختلف قسم کی کامیڈی، گانے اور رقص ہوں گے۔
دونوں پروڈیوسرز نے ایک بیان میں کہا ’ہمیں امید ہے کہ اس شاندار تقریب میں ہم فلم، ٹی وی اور تھیٹر کے اپنے تجربات کو بروئے کار لاتے ہوئے کچھ خاص اور کچھ تازہ فراہم کر سکیں گے۔‘
واضح رہے کہ 85 ویں آسکر ایوارڈز کی تقریب چوبیس فروری سنہ دوہزار تیرہ کو ہالی ووڈ کے ڈالبی تھیئٹر میں پیش کی جائے گی۔
