آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
رز احمد کا اپنی بیوی فاطمہ فرحین کی آسکر کے ریڈ کارپٹ پر زلفیں سنوارنا موضوع بحث
شاید حالیہ دور میں زلف سنوارنے کا ذکر کبھی اتنا نہ سنا گیا ہو جتنا اتوار کو آسکرز کی ریڈ کارپٹ پہ پاکستانی نژاد برطانوی اداکار رز احمد کے اپنی شریکِ حیات مصنفہ فاطمہ فرحین مرزا کی زلفیں سنوارنے کا ہو رہا ہے۔
93 اکیڈمی ایوارڈز میں رز احمد اگرچہ اپنی فلم ’ساؤنڈ آف میٹل‘ کے لیے بہترین اداکار کا ایوارڈ تو نہ جیت سکے لیکن انھوں نے میڈیا اور سوشل میڈیا سے ’بہترین شوہر‘ کا ایوارڈ ضرور حاصل کر لیا اور تقریباً ہر بڑے اخبار اور میگزین میں جہاں اکیڈمی ایوارڈ کا ذکر ہوا وہیں رز احمد کے فاطمہ فرحین کی زلفوں کو سنوارنے کا بھی ذکر ہوا۔ اور جب انھوں نے کہا کہ میں اپنی بیوی کا ’آفیشل گرومر‘ ہوں تو بقول میر یہ بات بھی سچ ہو گئی کہ
’ہم ہوئے، تم ہوئے کہ میر ہوئے
اس کی زلفوں کے سب اسیر ہوئے
ورائٹی میگزین نے لکھا کہ رز احمد نے اپنی بیوی فاطمہ فرحین مرزا کے بال ٹھیک کرنے کے لیے آسکرز کے ریڈ کارپٹ کو کچھ دیر کے لیے روک دیا: ’میں آفیشل گرومر ہوں‘۔
اکثر برطانوی اخبارات میں، جن میں دی سن، ڈیلی میل اور دیگر شامل ہیں، رز احمد اور ان کی بیوی کے متعلق لکھا گیا۔ اخبار انڈیپینڈنٹ نے لکھا کہ ’رز احمد نے آسکرز کے ریڈ کارپٹ پہ اپنی بیوی فاطمہ فرحین مرزا کے بال ٹھیک کیے۔
اینٹرٹینمنٹ ٹو نائٹ نے لکھا کہ ’رز احمد کے آسکرز ریڈ کارپٹ پہ اپنی بیوی فاطمہ فرحین مرزا کے بال سنوارنے کے لیے رکنا ہی واحد ایوارڈ تھا جو ہمیں چاہیے تھا۔‘
یہ بھی پڑھیئے
End of سب سے زیادہ پڑھی جانے والی
اسی طرح سوشل میڈیا پر بھی ان کے اس عمل کو زیادہ تر سراہا ہی گیا لیکن کئی ایک نے یہ بھی سوال کیا کہ کیا اس سے فرحین کے بالوں کو بھی کچھ فرق پڑا؟
ایک صارف مانا سندھو نے لکھا کہ میں ہم سب کے لیے دعا کرتی ہوں کہ پیار بھری بہترین تصویر کے لیے رز احمد جیسا بال سنوارنے والا ملے۔
ایک اور صارف نینسی وینگ یوان نے بھی اپنی پوسٹ میں کچھ اسی طرح کے خیالات کا اظہار کیا۔ انھوں نے لکھا کہ ’میں چاہتی ہوں کہ کوئی میری طرف بھی اس طرح دیکھے جیسے بہترین اداکار کے لیے نامزد رز احمد اپنی بیوی فاطمہ فرحین مرزا کی طرف دیکھتے ہیں۔‘
صحافی لعلین نے لکھا کہ رز کے فاطمہ کے بال ٹھیک کرنے سے مجھے برائیڈز میڈ کی ڈیوٹی یاد آتی ہے جہاں ہم دلہن کے لہنگے کا کنارہ (ہیم) ٹھیک کرتے ہیں۔۔۔ پیار اور تفصیل کی طرف توجہ۔ مجھے نہیں پتہ تھا کہ وہ اتنے ’فسی‘ ہیں، ویسے تو وہ پرسکون سے لگتے ہیں۔
رز احمد پہلے مسلم اداکار جو آسکرز کے لیے بہترین اداکار نامزد ہوئے
گو کہ رز احمد کو بہترین اداکار کا آسکرز نہیں ملا اور اینتھونی ہوپکنز یہ ایوارڈ لے اڑے لیکن رز احمد نے اس طرح تاریخ ضرور رقم کی کہ وہ بہترین اداکار کے ایوارڈ کے لیے نامزد پہلے مسلم اداکار ہیں اور وہ بھی جن کا تعلق پاکستان سے ہے۔
’ساؤنڈ آف میٹل‘ میں 38 سالہ اداکار ایک ایسے ہیوی میٹل ڈرمر، روبن، کا کردار نبھا رہے ہیں جس کی قوتِ سماعت غیر متوقع طور پر چلی جاتی ہے۔
فاطمہ فرحین مرزا کون ہیں؟
فاطمہ فرحین مرزا ایک بیسٹ سیلنگ امریکی ناول نگار ہیں جن کا سنہ 2018 میں چھپنے والا 400 صفحات پر مشتمل پہلا ناول ’اے پلیس فار اس‘ چھپنے کے فوراً بعد نیو یارک ٹائمز کی بیسٹ سیلنگ لسٹ میں آ گیا تھا۔ ان کا یہ ناول سارہ جیسیکا پارکر کے ادارے ایس جے پی ہوگارتھ نے چھاپہ تھا۔
فاطمہ نے اپنے ایک انٹرویو میں بتایا تھا کہ پہلے وہ گھر والوں کے کہنے پر طب پڑھ رہی تھیں لیکن پھر انھوں نے کریئٹیو رائٹنگ میں داخلہ لے لیا۔ رائٹنگ کے علاوہ فاطمہ کا ایک شوق باکسنگ ہے اور وہ اپنے سوشل میڈیا صفحے پر اس کا ذکر بھی کر چکی ہیں۔
رز اور فاطمہ نے اپنی شادی کو پرائیوٹ رکھا
رز اور فاطمہ کی شادی گذشتہ سال کورونا وائرس کی وباء کے دوران ہوئی اور دونوں نے ہی شادی کو نجی ہی رکھا۔ تو اگر دیکھا جائے تو آسکرز کا ریڈکارپٹ کسی بڑی تقریب میں ان دونوں کے ساتھ ساتھ آنے کا پہلا موقع ہے۔ اس سے پہلے رز کہہ چکے ہیں کہ وہ اسے ذاتی معاملہ سمجھتے ہیں اس لیے اس پر زیادہ بات نہیں کرتے۔ انھوں نے اس سال ایک دو انٹرویز میں اس کے متعلق بات ضرور کی تھی۔
