شہروز سبزواری اور صدف کنول کی شادی: ’تہمت لگائی ہے تو اب سامنے آ کر ثابت بھی کریں‘

پاکستانی اداکار شہروز سبزواری کی ماڈل اور اداکارہ صدف کنول سے شادی کی تصاویر منظرِ عام پر آنے کے بعد پاکستانی سوشل میڈیا پر اس بارے میں بحث تھمنے کا نام نہیں لے رہی۔

صدف کنول شہروز سبزواری کی دوسری اہلیہ ہیں اور انھیں ماضی میں شہروز سبزواری اور ان کی پہلی بیگم سائرہ یوسف کے درمیان علیحدگی کی وجہ قرار دیا جاتا رہا ہے اور شادی کی تصاویر سامنے آنے کے بعد یہ بحث دوبارہ چھڑ گئی ہے۔

اس بحث میں جہاں شہروز اور صدف کو تنقید کا نشانہ بنایا جا رہا ہے وہیں سائرہ یوسف سے ہمدردی کا اظہار اور ان کے کردار کی تعریف بھی ہو رہی ہے۔

اسی دوران پیر کی شب شہروز سبزواری نے ایک ویڈیو کے ذریعے ان کے بارے میں ’افواہیں‘ پھیلانے والوں کو چیلنج کیا ہے کہ وہ سامنے آئیں اور ثابت کریں کہ ان کی پہلی شادی کے خاتمے کی وجہ ان کی موجودہ بیگم تھیں۔

یہ بھی پڑھیے

'اللہ کی موجودگی میں شادی ضروری ہے، لوگوں کی موجودگی ضروری نہیں'

سائرہ اور شہروز کی شادی 2012 میں ہوئی تھی اور اگست 2019 میں اس جوڑے کے درمیان علیحدگی اور پھر طلاق ہو گئی تھی۔

سائرہ سے طلاق کے بعد شہروز نے صدف کنول سے حال ہی میں شادی کی ہے جس کے بعد پاکستان میں سوشل میڈیا پر انھیں کڑی تنقید کا نشانہ بنایا گیا ہے۔

پیر کی شب اپنے ویڈیو پیغام میں شہروز سبزواری کا کہنا تھا کہ جو کچھ ان کے اور ان کے خاندان کے بارے میں کہا جا رہا ہے وہ ناقابلِ برداشت ہے۔

ان کا کہنا تھا کہ وہ حلفاً کہتے ہیں کہ ان کی اور سائرہ کی علیحدگی کی وجہ کوئی بھی عورت بشمول ان کی دوسری بیگم صدف کنول یا ان کی پہلی بیگم سے بےوفائی نہیں تھی۔

ان کا یہ بھی کہنا تھا کہ وہ کھلاچیلنج دے رہے ہیں کہ جو بھی یہ کہتا ہے کہ انھوں نے کسی عورت کی وجہ سے اپنی پہلی اہلیہ کو طلاق دی تو وہ سامنے آئے اور ثبوت دے۔

ان کا کہنا تھا کہ انھوں نے اور سائرہ نے کوشش کی کہ ان کا رشتہ نہ ٹوٹے لیکن جس انتہائی ذاتی بات پر علیحدگی ہوئی تھی وہ معاملہ حل نہیں ہو سکا۔

ان کا کہنا تھا کہ وہ سائرہ کو طلاق نہیں دینا چاہتے تھے اس لیے سائرہ اور ان کا رشتہ مبارات یا خلع کے تحت بہت عزت و احترام کے ساتھ ختم ہوا۔

شہروز سبزواری کا کہنا تھا کہ وہ صدف کنول سے سائرہ یوسف سے علیحدگی کے چار ماہ بعد ملے تھے۔

ان کا کہنا تھا کہ ان کی پہلی ویڈیو کو توڑ مروڑ کر پیش کیا جا رہا ہے اور وہ حلفاً کہتے ہیں کہ اس میں کہی گئی ایک بات بھی جھوٹ نہیں ہے۔

شہروز سبزواری نے یہ بھی کہا کہ وہ یہ ویڈیو اپنی بیٹی کے لیے بنا رہے ہیں۔ ’شاید آج سے چار پانچ برس بعد وہ یہ سب دیکھے گی تو یہ میرا اس کے لیے جواب ہو گا۔‘

خیال رہے کہ شہروز سبزواری اور سائرہ یوسف ایک چھ سالہ بیٹی کے والدین ہیں۔

شہروز سبزواری کا کہنا تھا کہ ’بہت لوگ چاہتے تھے کہ میں چپ رہوں لیکن آج کل چپ رہنے میں کچھ نہیں رکھا۔’

اپنے پیغام کے اختتام پر ان کا کہنا تھا کہ وہ ان افراد کو چیلنج کرتے ہیں کہ اگر تہمت لگائی ہے تو اپنے دعوے کو ثابت بھی کریں۔

تاحال شہروز سبزواری کی دوسری شادی یا صدف کنول کے ان کی پہلی شادی کی ناکامی کی وجہ ہونے یا نہ ہونے کے بارے میں سائرہ یوسف کی جانب سے کوئی ردعمل یا بیان سامنے نہیں آیا ہے اور نہ ہی صدف کنول نے اس سلسلے میں کوئی بات کی ہے۔

سوشل میڈیا پر ردعمل

شہروز سبزواری اور صدف کنول کی شادی کی تصاویر سامنے آنے کے بعد اتوار کو سائرہ یوسف، صدف کنول اور شہروز سبزرواری پاکستانی ٹوئٹر کے صفِ اول کے ٹرینڈز تھے۔

شادی کی تصاویر آنے کی دیر تھی کہ صارفین نے صدف کنول کی سائرہ کے ساتھ پرانی تصاویر ڈھونڈ نکالیں اور نصیحت کرتے نظر آئے کہ 'دیکھ لیجیے یہ ہوتا ہے انجام، اپنی دوستوں کو اپنے میاں کے قریب بھی مت پھپٹکنے دیں۔'

کئی صارفین شہروز اور صدف کی شادی سے خوش بھی تھے اور اسے ان کا نجی معاملہ کہتے ہوئے ان پر تنقید کرنے والوں کو جواب دیتے نظر آئے۔

ایسے ہی ایک صارف عماد محمود کا کہنا تھا کہ 'ایک آدمی کو اپنی بیوی چننے اور عورت کو شوہر چننے کا پورا حق حاصل ہے۔ وہ اور ان کے خاندان راضی ہیں تو پھر ان کی نجی زندگی میں اپنی ٹانگ اڑانے والے آپ کون ہوتے ہیں؟'

اس پر کئی صارفین کا کہنا تھا شہروز اور صدف دونوں سلیبرٹی ہیں اور ’شادی ان کا نجی معاملہ نہیں۔' فیفی نامی صارف کا کہنا تھا'اپنے معاملات پبلک کریں گے تو پھر تنقید اور مداخلت کے لیے تیار رہیں۔'

جہاں کئی صارفین کو صدف کنول اور شہروز کی شادی پر غصہ تھا وہیں سوہا نوید نامی صارف نے سائرہ کی تعریف کرتے ہوئے کہا کہ 'سائرہ یوسف جیسا وقار ہر کسی کی شخصیت میں نہیں ہوتا، اپے سابقہ شوہر کے بارے میں کوئی کرواہٹ نہیں، کوئی ڈرامہ نہیں، کسی پر الزام تراشی نہیں، بس خاموشی اور عزت کے ساتھ اپنی زندگی میں آگے بڑھ گئیں۔'

کئی سوشل میڈیا صارفین یہ بھی پوچھتے نظر آئے کہ کیا طلاق کے بعد لوگوں کو دوسری شادی کا حق نہیں ہے؟