گنگوبائی: ممبئی میں سیکس ورکرز کا کاوبار چلانے والی خاتون کی مقبولبیت کا راز کیا تھا؟
،تصویر کا ذریعہFilm Poster
- مصنف, امروتا دوروے
- عہدہ, بی بی سی نامہ نگار
'ہم دل دے چکے صنم'، 'بلیک' اور 'باجی راؤ مستانی' جیسی زبردست ہٹ فلمیں بنانے والے بالی وڈ ہدایت کار سنجے لیلا بھنسالی نے اپنی نئی فلم کا اعلان کر دیا ہے۔ فلم کا نام 'گنگوبائی کاٹھیاواڑی' ہے جس میں عالیہ بھٹ مرکزی کردار ادا کریں گی۔
یہ فلم اس گنگوبائی کی زندگی سے متاثر ہے جو سنہ 1960کی دہائی میں ممبئی کے کماٹھی پورا میں کوٹھا چلاتی تھیں۔
گنگوبائی کا اصل نام گنگا ہرجیون داس کٹھیاواڑی تھا۔ ان کی پیدائش گجرات میں ہوئی اور وہیں ان کی پرورش بھی ہوئی۔
یہ فلم ’مافیا کوینز آف ممبئی‘ نامی کتاب پر مبنی ہے جس کو ایس حسین زیدی اور جین بورگیس نے لکھا ہے۔ ’مافیا کوینز آف ممبئی‘ کے شریک مصنف ایس حسین زیدی نے گنگو بائی کے بارے میں متعدد قصے بتائے۔
یہ بھی پڑھیے
گنگوبائی کا تعلق کاٹھیاواڑ کے ایک امیر ترین خاندان سے تھا۔ ان کے خاندان کے لوگ تعلیم یافتہ تھے اور بیشتر وکالت کے پیشے سے منسلک تھے جبکہ انھیں دھوکا دے کر جسم فروشی کی دنیا میں دھکیل دیا گیا تھا۔
End of سب سے زیادہ پڑھی جانے والی
گنگا کو رمنیک لال نامی ایک اکاؤنٹنٹ سے عشق ہوگیا تھا۔ ان کا خاندان اس رشتے کے لیے راضی نہیں تھا اسے لیے وہ رمنیک کے ساتھ ممبئی بھاگ آئیں لیکن اس شخص نے انھیں دھوکا دیا اور کماٹھی پورا لے جا کر عورتوں سے جسم فروشی کروانے والوں کو فروخت کردیا۔
اس وقت گنگا کو احساس ہوا کہ اب وہ اپنے گھر والوں کے پاس واپس نہیں جا سکتیں۔ انھوں نے حالات کو قبول کر لیا اور مجبور ہو کر جسم فروشی کرنے لگیں۔
وہ کسی گینگسٹر یا انڈرورلڈ کا حصہ نہیں تھیں لیکن ایسے کام میں ملوث تھیں جسے حقارت بھری نظروں سے دیکھا جاتا تھا۔
تاہم جیسے جیسے وقت گزرا وہ کماٹھی پورا ریڈ لائٹ علاقے کی سربراہ سی بن گئیں۔ اس طرح پہلے وہ گنگا سے گنگو اور پھر ’میڈم‘ بن گئیں۔
،تصویر کا ذریعہGetty Images
گنگو بائی نے کماٹھی پورا میں مقامی انتخابات میں حصہ لیا اور جیت بھی گئیں۔ گنگو ایک سیکس ورکر سے گنگو بھائی کوٹھے والی بن گئیں۔
ماں جیسا دل
سنہ 1960اور 1970 کی دہائی میں گنگو بائی کا کماٹھی پورا میں کافی نام رہا۔ وہ سنہرے کنارے والی سفید ساڑی، سنہرے بٹن والا بلاؤز اور سنہرا چشما پہنتی تھیں اور اس زمانے میں کار استعمال کرتی تھیں۔
انھیں سونے کے زیورات پہننے کا بہت شوق تھا۔ بچپن میں ان کا خواب اداکارہ بننے کا تھا۔ بعد میں بھی فلمی دنیا میں ان کی دلچسپی برقرار رہی لیکن وہ جسم فروشی کا کام کرنے والی متعدد نوجوان لڑکیوں کے لیے ماں کی طرح تھیں۔
انھوں نے ایسی متعدد لڑکیوں کو گھر واپس ان کے بھیجنے میں مدد کی جنہیں دھوکا دے کر جسم فروشی کے کاروبار کے لیے فروخت کیا گیا تھا۔
گنگو بائی نے جسم فروشی کے کام میں ملوث خواتین کے تحفظ اور ان کے ساتھ ہونے والی ناانصافی کے خلاف بھی آواز اٹھائی اور ان افراد کے خلاف بھی کارروائی کی جنھوں نے ان خواتین کا استحصال کیا۔
ان کا خیال تھا کہ شہروں میں جسم فروشی کا کاروبار کرنے والی خواتین کے لیے محفوظ جگہ فراہم ہونی چاہیے۔ ممبئی کے آزاد میدان میں خواتین کے حقوق کے لیے ہونے والی ریلی میں ان کی تقریر بہت مقبول ہوئی۔
گنگو بائی کے انتقال کے بعد کئی کوٹھوں میں ان کی تصاویر اور ان کے مجسمے بھی لگائے گئے۔
،تصویر کا ذریعہWikipedia
کریم لالہ اور گنگو بائی
کماٹھی پورا میں پیش آنے والے ایک واقعے کے بعد گنگو بائی کا اثر و رسوخ مزید بڑھ گیا۔
ایک پٹھان شخص نے گنگو بائی سے کوٹھے پر بدسلوکی کی۔ اس نے ان کے ساتھ جبراً جنسی رشتہ قائم کرنے کی کوشش کی۔ انہیں چوٹ پہنچائی اور اس کے بعد انہیں پیسے بھی نہیں دیے۔ ایسا مسلسل ہوتا رہا۔
ایک بار تو انہیں ہسپتال میں داخل کرانے تک کی نوبت آ گئی۔ تب انہوں نے اس شخص کے بارے میں معلومات حاصل کیں۔
انہیں پتہ چلا کہ اس شخص کا نام شوکت خان ہے اور اس کا تعلق اس وقت کے انڈرولڈ کے ڈان کہے جانے والے کریم لالہ کے گینگ سے تھا۔
یہ بھی پڑھیے
عبدالکریم خان کو انڈرورلڈ میں لوگ کریم لالہ کے نام سے جانتے تھے۔ گنگو بائی کریم لالہ کے پاس گئیں اور انہیں پورا معاملہ بتایا۔ کریم لالہ نے گنگو بائی کو تحفظ دینے کا وعدہ کیا۔
اگلے روز جب شوکت خان گنگوبائی کے کوٹھے پہنچا تو اس کی خوب پٹائی ہوئی۔
کریم لالہ نے گنگو بائی کو اپنی بہن قبول کرلیا تھا۔ کریم لالہ کی دوستی اور حمایت کے بعد گنگو بائی کا ان کے علاقے میں نام ہو گیا تھا۔ اب لوگ انھیں پریشان کرنے کی ہمت نہیں کرتے تھے۔
،تصویر کا ذریعہAFP
پنڈت نہرو سے ملاقات
1960 کی دہائی میں کماٹھی پورا میں سینٹ اینتھونی گرلز ہائی سکول کھولا گیا۔ اس کے ساتھ ہی علاقے میں موجود کوٹھے بند کیے جانے کا مطالبہ بھی ہونے لگا۔
اس فیصلے سے کماٹھی پورا میں ایک صدی سے زیادہ عرصے سے چلنے والے کوٹھوں میں کام کرنے والی خواتین کی زندگی متاثر ہونے کا خدشہ بڑھ گیا۔ گنگو بائی نے اس مسئلے کو حل کرنے کے لیے جی جان سے کوشش کی۔
سیاسی حلقے میں اپنے دوستوں کی مدد سے انھوں نے وزیرا عظم جواہر لعل نہرو سے ملاقات کی درخواست کی۔ حالانکہ یہ ملاقات باضابطہ طور پر کہیں درج نہیں ہوئی لیکن حسین زیدی نے اپنی کتاب میں اس ملاقات کا ذکر کیا ہے۔
زیدی نے ’مافیا کوینز آف ممبئی‘ میں لکھا ہے کہ ’اس ملاقات میں گنگو بائی کی آگاہی اور واضح خیالات سے نہرو بھی حیران ہو گئے۔ نہرو نے ان سے سوال کیا تھا کہ وہ اس کام میں کیوں ملوث ہوئیں جبکہ انہیں ایک معقول ملازمت اور اچھا شوہر مل سکتا تھا۔‘
ایسا کہا جاتا ہے کہ گنگو بائی نے اسی ملاقات میں نہرو کے سامنے تجویز پیش کی کہ اگر وہ ان سے شادی کرنے کو تیار ہوجائیں تو وہ یہ پیشہ چھوڑ دیں گی۔
یہ سن کر نہرو دنگ رہ گئے۔ گنگو بائی نے کہا کہ ’وزیر اعظم صاحب ناراض نہ ہوں۔ میں صرف اپنی بات ثابت کرنا چاہتی تھی۔ مشورہ دینا آسان ہے لیکن اسے خود کر کے دکھانا مشکل ہے۔‘ نہرو نے اس کے جواب میں اور کچھ نہیں کہا۔
نہرو اور گنگا بائی کے اس قصے کا ذکر نہرو سے متعلق دیگر کتابوں میں بھی ہوا ہے۔
ملاقات ختم ہونے پر نہرو نے گنگو بائی سے وعدہ کیا کہ وہ ان کے مطالبات پر غور کریں گے۔ وزیر اعظم کی اس معاملے میں مداخلت کے بعد کماٹھی پورا کے کوٹھے بند نہیں ہوئے۔
،تصویر کا ذریعہTwitter/AliaBhatt
سنجے لیلا بھنسالی اب گنگو بائی کی زندگی پر مبنی فلم بنا رہے ہیں۔ فلم کا فرسٹ لک لانچ کر دیا گیا ہے جس میں عالیہ بھٹ گنگو بائی کے کردار میں نظر آرہی ہیں۔
بی بی سی سے بات کرتے ہوئے ایس حسین زیدی نے بتایا کہ ’بھنسالی کو گنگوبائی کی کہانی بہت پسند آئی۔ انہیں لگا کہ اس خاتون کی کہانی بڑے پردے پر نظر آنی چاہیے۔ بھنسالی کے پاس وہ صلاحیت ہے کہ گنگوبائی جسے کردار کی بڑے پردے پر صحیح عکاسی کرسکیں'۔
لوگوں نے گنگو بائی کے بارے میں میری کتاب میں پڑھا ہوگا لیکن اب وہ اس خاتون کی زندگی کو فلم میں دیکھ سکیں گے۔ ہم سب عالیہ بھٹ کی اداکاری سے واقف ہیں۔ وہ ہر کردار کو بخوبی ادا کرتی ہیں۔ مجھے لگتا ہے کہ بھنسالی اور عالیہ بھٹ دونوں اس کہانی کے ساتھ انصاف کر سکیں گے'۔
سنجے لیلا بھنسالی کی یہ فلم 11 ستمبر 2020 کو ریلیز ہوگی۔
