آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
جنسی ہراسانی کے الزامات کے بعد وائن سٹین کی آسکر کی رکنیت ختم
آسکر ایوارڈز دینے والے ادارے نے ہالی وڈ کے معروف فلم ساز ہاروی وائن سٹین کی رکنیت ختم کرنے کے حق میں فیصلہ کیا ہے۔
امریکی اکیڈمی آف موشن پکچر آرٹس اور سائنسز کے دو تہائی سے زائد ارکان نے وائن سٹین کو فوری پر نکالے جانے پر اتفاق کیا ہے۔
ان دو تہائی ارکان میں ہالی وڈ کی معروف شخصیات ٹام ہینکس اور ووپی گولڈبرگ بھی شامل ہیں۔
امریکی اداکارہ روز میک گوان نے ایک ہوٹل کے کمرے میں ان پر ریپ کا الزام لگایا تھا۔ ان کے علاوہ کم از کم دو درجن خواتین نے ان پر جنسی تشدد کا الزام لگایا ہے، جن میں معروف اداکارہ انجیلینا جولی اور گوینتھ پالٹرو بھی شامل ہیں۔
ان الزامات کی وجہ سے ادارے نے سنیچر کو ہنگامی اجلاس طلب کیا تھا جس میں انھوں نے وائن سٹین کے مستقبل کے بارے میں فیصلہ کیا۔
اکیڈمی نے ایک بیان میں کہا کہ اس نے یہ فیصلہ اس لیے کیا کہ 'نہ صرف ہم خود کو ایسے شخص سے دور رکھنا چاہتے ہیں جو اپنے ساتھیوں سے احترام حاصل نہیں کر سکے بلکہ اس فیصلے سے ہم یہ پیغام بھی دینا چاہتے ہیں کہ فلم انڈسٹری میں جنسی ہراسانی کے سلوک پر دانستہ طور پر انجان بنے رہنے اور شرمناک طریقے سے اس کا حصہ بننے کا دور اب ختم ہو چکا ہے۔'
End of سب سے زیادہ پڑھی جانے والی
اکیڈمی نے کہا: 'یہ ایک ایسا مسئلہ ہے جس کے لیے ہمارے معاشرے میں کوئی جگہ نہیں ہونا چاہیے۔'
وائن سٹین کی فلمیں اب تک تین سو سے زائد بار آسکرز کے لیے نامزد ہو چکی ہیں جبکہ 81 مرتبہ انھیں کامیابی ملی ہے۔
وائن سٹین نے اپنے اوپر لگائے جانے والے الزامات کو سختی سے مسترد کیا ہے۔ ان کی ترجمان کا کہنا ہے کہ انھوں نے باہمی رضامندی کے ساتھ ہی کسی کے ساتھ بھی جسمانی تعلقات قائم کیے۔
برٹش اکیڈمی آف فلم اینڈ ٹیلی ویژن آرٹس یا بافٹا نے پہلے ہی ہاروی کی رکنیت معطل کر دی ہے۔
کین فلمی میلے کے صدر پیری لیسکیور نے کہا کہ 'ان الزامات کے بارے میں سن کر ان کا ادارہ صدمے میں ہے۔ وائن سٹین پابندی کے ساتھ کین میلے میں شرکت کیا کرتے تھے۔'
ہالی وڈ رپورٹروں سے بات کرتے ہوئے، ہاروی وائن سٹین کے بھائی باب وائن سٹین نے اپنے بھائی کو 'بیمار' اور 'بدکردار' قرار دیا، اور کہا کہ انھیں لات مار اکیڈمی سے نکال باہر کر دینا چاہیے۔
ان کا کہنا ہے کہ انھیں یا کمپنی کے بورڈ کو ان کے بھائی کی حرکتوں کے بارے میں کوئی علم نہیں تھا۔
انھوں نے اپنے بھائی کی معافی کو 'گھٹیا بہانہ' قرار دیا اور کہا: 'میں جو کچھ جانتا ہوں وہی بتا سکتا ہوں۔ ہاروی ایک ڈرانے دھمکانے والا شخص تھا، غصہ ور ہے۔۔۔ یہ سب میں جانتا ہوں۔'
ان الزامات کے بعد ہاروی وائن سٹین کی اہلیہ جارجینا چیپمین نے کہا ہے کہ وہ انھیں چھوڑ کر جا رہی ہیں۔
