آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
'تھینک يو انڈیا، میں پھر آؤں گا'
کینیڈا کے پاپ گلوکار جسٹن بیبر نے ممبئی میں ایک طویل انتظار کے بعد گذشتہ رات ایک کنسرٹ میں اپنے بہترین اور عالمی پذیرائی حاصل کرنے والے گانے پیش کیے۔
میوزک کنسرٹ کے لیے انڈیا آنے والے گلو کار جسٹن بیبر نے ممبئی کے ڈی وائی پاٹل سٹیڈیم میں اپنے مداحوں کو تفریح کا زبردست موقع فراہم کیا۔
بدھ کی شام کو تقریباً سوا آٹھ بجے جب جسٹن بیبر سٹیج پر پہنچے تو اس وقت سٹیڈیم بھرا ہوا تھا اور ان کے مداح زبردست جوش و خروش میں تھے۔
ممبئی کے کنسرٹ کے دوران بيبر نے 'ساری'، 'کولڈ'، 'واٹر'، 'آئی ول شو یو'، 'وهئير آر یو ناؤ'، 'بوائے فریںڈ' اور 'بےبی' جیسے عالمی پذیرائی حاصل کرنے والے اپنے گانوں سے سامعین کو محظوظ کیا۔
اطلاعات کے مطابق 50 ہزار سے زیادہ لوگ ان کے پروگرام کو دیکھنے پہنچے تھے اور سٹیڈیم کھچا کھچ بھرا ہوا تھا۔ سٹیڈیم میں مسلسل لوگ جسٹن، جسٹن کی صدائیں بلند کر رہے تھے۔
تقریباً دو گھنٹے تک شائقین کی زبردست تفریح کرانے کے بعد جسٹن بیبر نے کہا: 'تھینک يو انڈیا، میں پھر آؤں گا۔'
جسٹن بيبر ممبئی میں جہاں جہاں گئے ان کے پرستار ان کا انتظار کرتے دیکھے گئے۔
اس کنسرٹ سے قبل ممبئی پہنچنے کے بعد جسٹن بیبر نے یتیم خانے کے کچھ غریب بچوں کے ساتھ وقت گزارا اور وہ ممبئی کے ایک مال میں بھی گئے۔
End of سب سے زیادہ پڑھی جانے والی
جسٹن بیبر کے دیوانے صرف نوجوان اور لڑکے لڑکیاں ہی نہیں بلکہ بہت سے معروف بالی وڈ فنکار بھی ہیں جو انھیں سننے کے لیے پہنچے تھے۔
بالی وڈ کی اداکارہ عالیہ بھٹ، سری دیوی، جیکولین فرنینڈز، بپاشا باسو، روینا ٹنڈن، جلال چودھری، ملائیکہ ارورہ اور فلم ساز اور ہدایت کار ارباز خان جیسی ہستیاں بھی کنسرٹ دیکھنی پہنچی تھیں۔
جسٹن بیبر کو دیکھنے کے لیے کئی فلمی ستاروں کے بچے بھی وہاں پر موجود تھے۔
ممبئی میں ہونے والا یہ کنسرٹ جسٹن بیبر کے ورلڈ ٹور کا ایک حصہ تھا۔
انڈیا کے اپنے اس دورے کے دوران انھوں نے محبت کی علامت کے طور پر معروف آگرہ کے تاج محل کو بھی دیکھنے کی خواہش ظاہر کی۔
