آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
انڈوں کی قیمتوں میں 65 فیصد اضافہ: امریکہ میں چوری کی انوکھی واردات میں ایک لاکھ سے زائد انڈے غائب
- مصنف, کرسٹل ہیس
- عہدہ, بی بی سی نیوز
امریکی ریاست پینسلوانیا میں چوری کی ایک انوکھی واردات کے دوران ایک لاکھ سے زیادہ انڈے چرا لیے گئے۔
پولیس کا کہنا ہے کہ ڈکیتی کی یہ واردات یکم فروری کو گرین کیسل کے علاقے میں واقع ’پیٹ اینڈ گیری آرگینکس‘ نامی دکان میں ہوئی جہاں انڈے لانے والی گاڑی چوری کی واردات کا نشانہ بنی۔
چوری کیے گئے انڈوں کی مالیت 40 ہزار ڈالر ہے۔
یہ واردات ایک ایسے وقت میں کی گئی جب برڈ فلو کی وبا کی وجہ سے امریکہ میں انڈوں کی قیمت میں تیزی سے اضافہ ہوا ہے اور ریستورانوں میں بھی انڈے سے تیار کردہ کھانوں کی قیمتیں بڑھا دی گئی ہے۔
منگل کو امریکی ریستوران ’وافل ہاؤس‘ نے صارفین کے لیے فی انڈہ 50 سینٹ سرچارج عائد کرنے کا اعلان کیا اور اس فیصلے کو انڈے کی قیمتوں میں غیر معمولی اضافے سے منسلک ایک عارضی سرچارج قرار دیا ہے۔
امریکی حکومت کے اعدادوشمار کے مطابق ملک میں گذشتہ برس انڈوں کی قیمت میں 65 فیصد سے زیادہ اضافہ ہوا اور صرف دسمبر میں یہ قیمت آٹھ فیصد سے زیادہ بڑھی ہے۔
محکمۂ زراعت کے اعداد و شمار سے یہ بھی پتا چلتا ہے کہ دسمبر 2023 میں انڈے کے ایک کارٹن کی اوسط قیمت 2.51 ڈالر تھی جو ایک سال بعد 4.15 ڈالر تک پہنچ گئی ہے۔
محکمۂ زراعت نے یہ پیش گوئی بھی کی ہے کہ سنہ 2025 میں اس قیمت میں مزید 20 فیصد اضافے کا امکان ہے۔
End of سب سے زیادہ پڑھی جانے والی
محکمہ زراعت کے مطابق امریکہ میں برڈ فلو کی وبا 2022 میں شروع ہوئی اور حالیہ مہینوں میں پورے امریکہ میں اس کے پھیلنے کی اطلاعات ہیں۔
امریکہ بھر میں پرندوں، مویشیوں اور ممالیہ میں برڈ فلو کی وبا کی اطلاعات ہیں تاہم انسانوں میں یہ انفیکشن نہ ہونے کے برابر ہے۔
