آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
ٹیلر سوئفٹ کی نئی ایلبم ’مڈنائٹ‘ نے متعدد ریکارڈ توڑے
- مصنف, مارک سیویج
- عہدہ, بی بی سی نامہ نگار
امریکہ کے اولین دس گانوں کے میوزک چارٹ میں اس ہفتے سبھی سنگل گانے ٹیلر سوئفٹ کی نئی میوزک البم ’مڈنائٹ‘ کے ہیں۔ ایسا تاریخ میں پہلی بار ہوا ہے کہ ٹاپ ٹین گانوں کے چارٹس میں سبھی گانے کسی ایک ہی فنکار کے ہوں۔
اس سے قبل ستمبر 2021 میں ڈریک کے گانے چارٹس کے دس میں سے نو مقامات پر رہ چکے ہیں۔ اور ڈریک سے قبل 1964 میں دس میں سے آٹھ گانے میوزک بینڈ بیٹلز کے رہ چکے ہیں۔
ٹیلر سوئفٹ کی حال میں ریلیز ہونے والی ایلبم ’مڈنائٹ‘ ان کی اس کامیابی کے لیے ذمہ دار ہے۔ یہ ایلبم 2022 کی سب سے تیزی سے بکنے والی اور مقبول ترین ایلبم ثابت ہوئی ہے۔
32 سالہ ٹیلر سوئفٹ نے کہا کہ چارٹس میں پہلے مقام پر سنگل گانے ’اینٹی ہیرو‘ کا کورس ’اٹس می، ہائے! آئی ایم دا پرابلم‘ ٹک ٹوک پر بھی خوب مقبول ہو رہا ہے۔ چارٹس کے دیگر گانوں میں اسی البم کے ’لیوینڈر ہیز، مرون، سنو آن، دا بیچ، بیجویلڈ اینڈ کارما‘ جیسے گانے شامل ہیں۔
البم مڈنائٹ کے سبھی تیرہ گانے امریکہ کے ٹاپ پندرہ گانوں کی فہرست میں شامل ہیں۔
اگست 2022 میں نیو جرسی میں ہونے والے ایم ٹی وی ایوارڈز کے دوران سوئفٹ نے نئی البم کے بارے میں اعلان کر کے اپنے تمام مداحوں کو حیران کر دیا تھا۔ اس البم کے بارے میں انہوں کہا تھا کہ یہ ان کی زندگی کے مختلف اوقات کی تیرہ ایسی راتوں کی کہانیاں ہیں جن میں وہ سو نہیں سکیں۔ ایک ایسے سفر کی کہانی جس میں خوف کے ساتھ ساتھ خوبصورت خواب بھی شامل رہے۔
کووڈ کی وبا کے دوران 2020 میں ریلیز ہونے والی ان کی دو البمز ’ایور مور‘ اور ’فوکلور‘ ان کے ماضی کے البمز میں واضح پاپ میوزک سے مختلف تھیں۔ لیکن ان البمز کی پر سکون دھنیں اپنی چھاپ چھوڑنے میں کامیاب رہیں۔
تازہ البم مڈنائٹ کی کامیابی میں اس کی مارکیٹنگ کیمپین کا بھی اہم کردار بتایا جا رہا ہے۔ اس البم کو مختلف پلیٹ فارمز اور یہاں تک ریکارڈ وائنل کی شکل میں بھی لانچ کیا گیا۔
End of سب سے زیادہ پڑھی جانے والی
حالانکہ میوزک میگزین بلبورڈ کے مطابق امریکی میوزک چارٹس میں سوئفٹ کے گانوں کے اولین دس مقامات تک پہنچنے کے لیے صرف سٹریمز ہی کافی رہیں۔ اس میں ریکارڈز کی فروخت اور ریڈیو پر نشر شامل نہیں ہے۔
موجودہ دور میں جب میوزک کو سٹریم کر کے سنا جانا مقبول ہے، مڈنائٹ کی سی ڈی اور وائنل ریکارڈز بھی خوب خریدے جا رہے ہیں۔ اب تک سی ڈی اور وائنل کی شکل میں البم کی چودہ لاکھ کاپیاں فروخت ہو چکی ہیں۔
سوئفٹ کی یہ ایلبم برطانیہ کے چارٹس میں بھی پہلے نمبر پر ہے۔ گزشتہ برس گلوکارہ اڈیل کی البم 30 کے بعد سے یہ پہلی بار ہے جب کسی البم نے ایک ہفتے میں دو لاکھ سے زائد کاپیوں کی فروخت کی ہو۔
ٹیلرسوئفٹ کی برطانیہ میں اس سے قبل کوئی اورالبم ایک ہفتے میں اتنی کامیاب نہیں ہوئی۔ حالانکہ برطانیہ میں کامیابی اتنی واضح نہیں رہی جتنی امریکہ میں۔ لیکن اس کی ایک وجہ یہ بھی ہو سکتی ہے کہ برطانیہ میں اصولوں کے مطابق ایک وقت میں کسی ایک فنکار کے صرف تین گانوں کو ہی ٹاپ 100 گانوں کی فہرست میں شامل کیا جا سکتا ہے۔
اگر وہ پابندی نہ ہوتی تو برطانیہ کی اس ہفتے ٹاپ دس سنگل گانوں کی فہرست میں آٹھ ٹیلر سوئفٹ کے ہوتے۔ برطانیہ میں ان کے تین مقبول ترین گانے ’اینٹی ہیرو، لیوینڈر ہیز اور سنو آن بیچ‘ ہیں جو فہرست کے پہلے، تیسرے اور چوتھے مقامات پر ہیں۔
میوزک میگزین بلبورڈ کے مطابق ٹیلر سوئفٹ کی نئی البم کئی ریکارڈز توڑنے میں کامیاب رہی ہے۔
یہ بھی پڑھیے:
چارٹس کی تاریخ میں کسی خاتون گلوکارہ کے اب تک کے سب سے زیادہ گانوں کا ریکارڈ بھی اب ان کے نام ہے۔ میڈونا کے اب تک اڑتیس گانے ٹاپ چارٹس میں رہ چکے ہیں، جبکہ ٹیلر سوئفٹ کے چالیس گانے۔ اب وہ صرف ڈریک سے پیچھے ہیں جن کے 59 گانے ٹاپ چارٹس میں رہ چکے ہیں۔
مڈنائٹ پہلی البم ہے جس کے دس گانے ٹاپ ٹین چارٹس کے دسوں مقامات پر ہوں۔ ایک دن کے اندر کسی ایک البم کے لیے سب سے زیادہ سٹریم کیے جانے کا ریکارڈ بھی یہ البم توڑ چکی ہے۔ یہ ریکارڈ سپاٹیفائی، ایپل اور ایمیزان میوزک کی سٹریمس کے اعداد و شمار پر مبنی ہے۔
برطانیہ میں مڈنائٹ کے 62,000 سے زیادہ وائنل ریکارڈ بک چکے ہیں۔ اکیسویں صدی میں کسی البم کے ایک ہفتے میں اتنی بڑی تعداد میں وائنل ریکارڈس پہلے کبھی نہیں بکے۔
