فواد خان کی نئی سیریز اور نیا اشتہار: ’فرق نہیں پڑتا ہمارے پاس کتنے خان ہیں لیکن ہمارے پاس فواد خان نہیں‘

پاکستان کے مقبول شوبز سٹار فواد خان کے نام سے کون واقف نہیں مگر کیا آپ کو ان کی لکس زیادہ پسند ہیں، ایکٹنگ یا گلوکاری۔۔۔ اس کا فیصلہ کرنا بہت مشکل ہے کیونکہ ان میں ٹیلنٹ اور لکس دونوں کا امتزاج ہے۔

کبھی وہ پی ایس ایل کا اینتھم سونگ گا کر اپنے مداحوں کا دل جیتتے ہیں تو کبھی مولا جٹ جیسی سپر سٹار فلموں سے مداحوں کے دلوں پر راج کرتے ہیں۔

ان کے مداح انھیں ایک ورسٹائل ایکٹر قرار دیتے ہیں جو مزاح، اینگری ینگ مین کا روپ، سنجیدہ اداکاری اور رومانس سب کو باخوبی نبھاتے ہیں۔

پاکستان کے سوشل میڈیا پر وہ ایک بار پھر ٹرینڈ کر رہے ہیں اور اس کی دو وجوہات ہیں۔

ایک وجہ تو او ٹی ٹی پلیٹ فارم زندگی پر ان کی نئی سریز ’برزخ‘ کی شروعات ہونے جا رہی ہیں جس میں وہ صنم سعید کے ساتھ نظر آئیں گے۔

برزخ کا مارچ میں او ٹی ٹی پلیٹ فارم ’زی زندگی‘ پر گلوبل پریمیئر ہو گا۔ ابھی حال ہی میں اسے فرانس میں سیریز مینیا فیسٹول کے لیے چنا گیا ہے اور ان کی یہ سیریز جنوبی ایشیا سے منتخب ہونے والی واحد سیریز ہے۔

فواد خان اس سیریز میں ایک سنگل پیرنٹ کے کردار میں نظر آئیں گے جبکہ ان کے ساتھ صنم سعید بھی ہو گی۔

اس مقبول آن سکرین جوڑی کی واپسی پر ان کے مداح برزخ کو ان کے ماضی کے مقبول ڈرامہ ’زندگی گلزار ہے‘ کا پارٹ ٹو قرار دے رہے ہیں۔

برزخ میں ان کی اداکاری پر ایک مداح نے لکھا کہ ’یہ واقعی شائقین کو پکڑے ہوئے ہیں۔ پاکستان کی دلوں کی دھڑکن فواد خان کو پتا ہے کہ لیڈ کردار کیسے نبھانا ہے۔‘

ایک اور صارف نے لکھا کہ ’لگتا ہے اس شو میں ہزاروں جذبات ہوں گے اور پرکشش فواد خان ایک شاندار کہانی کے ساتھ سکرین پر واپس آئے ہیں۔‘

فواد خان کی فین فالونگ نہ صرف پاکستان بلکہ انڈیا میں بھی ہے اور ’برزخ‘ میں ان کی واپسی پر انڈیا سے ان کے ایک مداح نے تبصرہ کیا کہ ’فواد خان کی واپسی۔۔۔ مجھے اس کی بہت خوشی ہے، میں انھیں سکرین پر دیکھنے کے لیے بہت پرجوش ہوں۔‘

فواد خان کے سوشل میڈیا پر ٹرینڈ کرنے کی دوسری وجہ حال ہی میں ایک فوڈ ایپ کا نشر ہونے والا اشتہار ہے۔

اگرچہ اس اشتہار میں ماڈل اور اداکارہ فریال محمود اور پاکستانی کرکٹر شاداب خان بھی موجود ہیں مگر سب کی توجہ فواد خان پر ہی مرکوز رہی۔

اس اشتہار کا پاکستانی ٹی وی اور سوشل میڈیا پر آنا تھا کہ ان کے مداحوں نے اس پر تبصرے کرنا شروع کر دیے۔

کوئی ان کی ڈراموں پر واپسی کے لیے پٹیشن کی بات کرنے لگا تو کسی نے اشتہار میں ان کی اداکاری اور تاثرات کی تعریفوں کے پل باندھ دیے۔

ان کی اداکاری پر تبصرہ کرتے ہوئے ایک صارف نے لکھا کہ ’فواد خان کے اشتہار نے مجھے ان کی ٹی وی پر یاد کو زیادہ کر دیا۔ کوئی ایک اشتہار میں اتنا اچھا کیسے لگ سکتا ہے۔ میرا مطلب ہے اشتہار میں ان کی مزاحیہ اداکاری دیکھیں، ان کے تاثرات، ان کا انداز، لباس اور ان کی پرکشش شخصیت۔‘

انڈیا سے ایک صارف نے ان کی اداکاری اور پرکشش شخصیت کا موازنہ بالی وڈ کے تین سپر سٹارز شاہ رخ خان، سلمان خان اور عامر خان سے کرتے ہوئے لکھا کہ ’اس سے کوئی فرق نہیں پڑتا کہ ہمارے پاس کتنے مقبول خان ہیں لیکن ہمارے پاس فواد خان نہیں۔‘

اس کے جواب میں ان کے ایک اور صارف نے لکھا کہ ’ فواد خان کی اداکاری، تاثرات اور پرکشش شخصیت کا کوئی مقابلہ نہیں۔‘

فواد خان نے حال ہی میں پاکستانی فلم مولا جٹ میں مولے کا کردار ادا کیا جو ناظرین کو بہت پسند آیا تھا اور اب رواں برس عیدالفطر کے موقع پر وہ ایک اور فلم ’منی بیک گارنٹی‘ میں نظر آئیں گے۔