ኤምባሲታት ኣመሪካን እንግሊዝን፡ ኣብ ትግራይ ተፈጢሩ ዘሎ ጎንጺ ክሃድእ ተማሕጺኖም

ኤምባሲ ኣመሪካ ኣብ ኢትዮጵያ ሎሚ ኣብ ዘውጽኦ መግለጺ ኣብ ትግራይ፡ ብኽልቲኦም ወገናት ዝውሰድ ዘሎ ግብረ መልሲታት ብቅጽበት ክሃድእ ጸዊዑ።

እቲ ኤምባሲ ብናይ ትዊተር ገጽ ኣብ ዘውጽኦ ሓጺር ጽሑፍ፡ ኩሎም ንድሕነትን ውሕስናን ዜጋታት ቀዳምነት ክህቡ ከም ዝግናባ ኣትሪሩ ተላብዩ።

ብተመሳሳሊ ኤምባሲ እንግሊዝ ኣብ ዘውጸኦ መግለጺ ክልቲኦም ወገናት ሓይሊ ካብ ምጥቃም ክቑጠቡን ብፍላይ ንጹሃን ዜጋታት ከይጉድኡን ተማሒጺኑ።

እቲ ኤምባሲ፡ ሰራሕተኛታቱ ናብ ከባብታት ትግራይን ሰሜን ኣምሓራን ከይጉዓዙ ኣጊዱ ኣሎ።

ኣብዚ ሕጂ እዋን፡ መንግስታት ፌደራልን ክልል ትግራይን በቲ ኣብ ትግራይ ተፈጢሩ ዘሎ ጎንጺ ንሓድሕዶም ይካሰሱ ኣለዉ።

ቀዳማይ ሚኒስትር ኣብዪ ኣህመድ ሎሚ መዓልቲ ኣብ ዝሃቦ መግለጺ፡ "ሓይልታት ጸጥታ ትግራይ ኣብ ልዕሊ ሰራዊት ሰሜን እዚ መጥቃዕቲ ፈጺሞም" ምባሉ ይዝከር።

መንግስቲ ትግራይ ድማ፡ 'መንግስቲ ፌዴራል ኣብ ልዕሊ ህዝቢ ትግራይ ኲናት ኣዊጁ' ብምባል ይኸስስ።

በዚ ኩነታት መንግስቲ ትግራይ፡ ኣብ ትግራይ ዝኾነ ዓይነት ምንቅስቓስ ነፈርትን ተሽከርከርትን ኣጊዱ ኣሎ።

ኣብቲ ክልል ኣገልግሎት ሓይሊ መብራህትን ኢንተርነትን ከምኡ'ውን ቴሌፎን ተቛሪጹ ይርከብ።