ቢዮንሰ፡ ኣብ ዝርዝር ቢልዮነራት ዓለምና ዝተጸንበረት ኮኾብ

ቢዮንሰ፡ ቢልዮነር ተባሂላ ብፎርብስ ድሕሪ ምእዋጁ፡ ኣብ ዝርዝር ሃብታማት ዓለምና ዝተጸንበረት ሓምሸይቲ ሙዚቀኛ ኰይና።

እዛ ኣመሪካዊት ኮኾብ፡ ምስ ከም ተይለር ስዊፍት፡ ሪሃና፡ ብሩስ ስፕሪንግስቲንን በዓል ቤታ ጀይ-ዚን ዝርከብዎም 10 ሃብቲ ዘለሞም ብሉጻት ሙዚቀኛታት ክትጽምበር ከላ፡ መጽሔት ዘ ቢዝነስ ኣብ ዝዘርገሖ 2.5 ቢልዮን ዶላር ጽሩይ ሃብቲ ከምዘለዋ ተዘርዚሩ ኣሎ።

ኣብ መጀመርታ ናይዚ ወርሒ፡ ብፎርብስ ዝተረጋገጸ ሃብቲ ቢዮንሰ 800 ሚልዮን ዶላር (593 ሚልዮን ፓውንድ) ከምዝዀነ ብምግማት፡ ድሕሪ ናይ ዓመታት ዓወት ንመጀመርያ ግዜ ድርኵኺት ቢልዮነር ክትሰግሮ ከምዝኸኣለት ኣተንቢሁ።

ኣብ 2023 ብደረጃ ዓለም ዝገበሮቶ ዑደት ምርኢት ሙዚቃ ዳርጋ 600 ሚልዮን ዶላር ኣታዊ ብምርካብ፡ ምስ ተይለር ስዊፍት ሓንቲ ካብተን ኣብ ዓለም ዘለዋ ዝዓበዩ ደረጃ ዝበጽሑ ሙዚቀኛታት ፖፕ ክትከውን ኣኽኢልዋ።

ቢዮንሰ ብዛዕባ እቲ ኣብ ውሽጢ ሸውዓተ ዓመት ንመጀመርታ ግዜ ንበይና ዝገበረቶ ናይ ሙዚቃ ምርኢት ብመልክዕ ፊልም ዘዳለወቶ፡ ብቐጥታ ምስ ኤኤምሲ ትያትር ዝተገብረ ስምምዕ ተዘርጊሑ። እዚ ከኣ ዳርጋ ናይቲ 44 ሚልዮን ዶላር ዓለማዊ ቦክስ ኦፊስ ኣታዊታት እታ ፊልም ኣብ ጁባኣ ኣእትያ።

እቲ ናይ 2024 ካውቦይ ካርተር ኣልቡማ ነቲ ጸሊም መበቈል ካንትሪ ሙዚቃ ዘኽብርን ዘንጸባርቕን ምርኢታ፡ ናእዳ ረኺቡ እዩ።

ኣብ ሽልማት ግራሚ ከኣ ናይታ ዓመት ብልጽቲ ኣልቡም ተዓዊታ፤ ኣርባዕተ ግዜ ተሓጽያ'ኳ እንተነበረት፡ ነዚ ክቡር ሽልማት ክትዕወት ግን ንመጀመርያ ግዜኣ እዩ።

ፎርብስ ከም ዝገለጾ፡ እቲ ካውቦይ ካርተር ዝተሰምየ ዑደት - ካብ ጀይ-ዚ፡ ክልተ ካብ ሰለስተ ደቆምን ናይ ቅድም መሳርሕቶም ባንድ ደስቲኒስ ቻይልድን ዝነበሩ ዕዱማት ዘጠቓለለ - ብድምር ልዕሊ 400 ሚልዮን ዶላር መሸጣ ትኬት፡ ከምኡ'ው ካልእ 50 ሚልዮን ዶላር ድማ ኣብቲ ምርኢታት ዝተሸጠ ሸቐጣት ክውህለል ከምዝኸኣለ ገምጊሙ።

እዚ ዑደት ኣብ ለንደን ኣብ ዝርከብ ስታድዩም ቶተንሃምን ኣብ ፓሪስ ዝርከብ ስታድዩም ደ ፍራንስን ክብረወሰናት ትኬት ክሰብር እንከሎ፣ መሸጣ ትኬት ደንጉዩ ስለ ዝነበረ እቶም ኣወሃሃድቲ ናይቲ መደብ ወንበር ንምምላእ ኣብ ዋጋ ትኬት ነከዩ።

ይዅን እምበር፡ ኣብ 2025 ኣብ ዓዲ እንግሊዝ ካብ ዝበጽሑ ስነጥበባውያን እቲ ዝለዓለ ዋጋ ኰይኑ፡ ካብ 950 ፓውንድ ክሳብ እቲ ዝሓሰረ ድማ 71 ፓውንድ ተሸይጡ።

ብመሰረት ጸብጻብ ፎርብስ፡ ኔትፍሊክስ ንፈለማ እዋን ኣብ ልደት ዝተኻየደ ጸወታ ኤንኤፍኤል ዝተገብረ ፍሉይ ናይ ዕረፍቲ ምርኢት 50 ሚልዮን ዶላር ክእክብ እንከሎ፣ ኣብ ርእሲኡ ድማ ናይ 10 ሚልዮን ዶላር ተኸታታሊ መዋዓውዒ ሌቪ ረኺቡ።

ብሉምበርግ ባዕሉ ኣብ ዘካይዶ ዝርዝር ሓባሪ ቢልዮነራት፡ ሰሊና ጐመዝ ኣብ 2024 ኣብ ዝርዝር ዝሃብተሙ መዚቀኛታት ኣስፊሩዋ። ጽሩይ ሃብታ ክሳብ 1.3 ሚልዮን ዶላር ከም ዝበጽሕ ድማ ይገልጽ።

ፎርብስ ነዚ ኣሃዝ ብምቅዋም፡ ጽሩይ ሃብቲ ሰሊና ጐመዝ 700 ሚልዮን ዶላር ምዃኑ ገሚቱ ኣሎ።