మార్స్ మీద మొదటిసారిగా శ్వాసించదగిన ఆక్సిజన్ తయారు చేసిన నాసా రోవర్

    • రచయిత, జోనాథన్ అమోస్
    • హోదా, బీబీసీ ప్రతినిధి

అంగారక గ్రహంపైకి నాసా పంపించిన 'పెర్సీవరెన్స్' రోవర్‌లో ఉన్న ఒక పరికరం అక్కడి వాతావరణంలోని కార్బన్ డయాక్సైడ్ నుంచి ఆక్సిజన్ తయారు చేయగలిగింది.

మార్స్‌పై నాసాకు ఇది రెండవ విజయం.

ఇంతకుముందు, సోమవారం ఒక చిన్న హెలికాప్టర్ మార్స్‌పై గాల్లోకి లేచి కొద్ది నిముషాలపాటు నిలకడగా ఎగిరింది.

రోవర్‌లో ఉండే మోక్సీ (మార్స్ ఆక్సిజన్ ఇన్-సిటు రిసోర్స్ యుటిలైజేషన్ ఎక్స్పెరిమెంట్) అనే చిన్న పరికరం 5 గ్రాముల ఆక్సిజన్ తయారుచేసింది.

ఇది మార్స్‌పై ఒక వ్యోమగామి సుమారు 10 నిముషాల పాటూ ఊపిరి పీల్చుకోవడానికి సరిపోతుంది.

మోక్సీలాంటి పరికరాలను భారీ స్థాయిలో తయారుచేయగలిగితే భవిష్యత్తులో అంగారక గ్రహంపైకి వెళ్లే వ్యోమగాములు భూమి నుంచి ఆక్సిజన్ మోసుకు వెళ్లకుండా అక్కడే తయారుచేసుకోగలిగే అవకాశం ఉంటుందని నాసా భావిస్తోంది.

అంగారక గ్రహంపై వాతావరణంలో అధికంగా 96 శాతం గాఢత కలిగిన కార్బన్ డయాక్సైడ్ ఉంటుంది. ఆక్సిజన్ కేవలం 0.13 శాతం ఉంటుంది. భూమిపై ఉన్న ఆక్సిజన్‌తో పోలిస్తే అది కేవలం 21 శాతం మాత్రమే.

మోక్సీ అక్కడ ఉన్న కార్బన్ డయాక్సైడ్ నుంచి ఆక్సిజన్‌ను వేరు చేసి మిగిలిన కార్బన్ మోనాక్సైడ్‌ను బయటకు విడుదల చేసింది.

Skip ఎక్కువమంది చదివినవి and continue reading
ఎక్కువమంది చదివినవి

End of ఎక్కువమంది చదివినవి

మోక్సీ సామర్థ్యాన్ని నిపుణులు పరిశీలిస్తున్నారు. ఇది గంటకు 10 గ్రాముల వరకూ ఆక్సిజన్‌ తయారుచేయగలదని అంచనా వేస్తున్నారు.

"మోక్సీ మరో ప్రపంచంలో ఆక్సిజన్ తయారుచేయగలిగిన మొదటి పరికరం మాత్రమే కాదు, భూమిని దాటి మానవులు ఊపిరి పీల్చగలిగే అవకాశాన్ని ఇచ్చిన తొలి సాంకేతిక పరిజ్ఞానం" అని నాసా డైరెక్టర్ ఆఫ్ టెక్నాలజీ డిమాన్స్ట్రేషన్ ట్రూడీ కార్టెస్ అన్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)