ఈ ఊరిలో బిడ్డను కంటే 8 లక్షల రూపాయల బోనస్ ఇస్తారు

ఫిన్లాండ్‌లోని ఒక ఊరిలో జనాభా భారీగా తగ్గిపోతోంది. పరిస్థితి అలాగే ఉంటే, కొన్నేళ్లకు యువత లేకుండా వృద్ధులే మిగిలిపోయే ప్రమాదం ఉంది. ఆ సమస్యకు పరిష్కారం చూపేందుకు స్థానిక పాలకవర్గం ఒక ఆలోచన చేసింది. తమ ఊరిలో పిల్లలను కనేవారికి పారితోషికంగా 10,000 యూరోలు (భారత కరెన్సీలో రూ.7,87,270) ఇవ్వాలని నిర్ణయించింది.

పశ్చిమ ఫిన్లాండ్ ప్రావిన్సులో ఉన్న అతి చిన్న మున్సిపాలిటీ లెస్టిజార్విలో ఈ పథకాన్ని అమలు చేస్తున్నారు.

725 మంది జనాభా ఉన్న ఈ ఊరిలో 2012లో ఒక్క శిశువు మాత్రమే జన్మించింది. దాంతో పిల్లలను కనేందుకు ప్రజలను ప్రోత్సహించాలన్న ఆలోచనతో 2013లో 'బేబీ బోనస్' పేరుతో పథకాన్ని ప్రవేశపెట్టారు.

ఈ పథకం కింద ఇక్కడ బిడ్డకు జన్మనిచ్చిన ప్రతి జంటకూ 10,000 యూరోల (రూ.7,87,270) పారితోషికం ఇస్తారు. ఆ మొత్తాన్ని ఏటా 1,000 యూరోల చొప్పున, 10 సంవత్సరాల పాటు చెల్లిస్తారు.

ఈ పథకం ప్రారంభించిన తర్వాత ఏడేళ్లలో ఇక్కడ 60 మంది పిల్లలు జన్మించారు. అంతకు ముందు ఏడేళ్లలో 38 మంది మాత్రమే జన్మించారు. అంటే, ఆ బోనస్ పథకం ఎంతోకొంత ఫలితాలిస్తోందని అర్థమవుతోంది.

ఈ పథకం కింద అందరికంటే ముందు లబ్ధి పొందిన జుక్కా- పెక్కా టుయిక్కా (50) తన భార్య జనికా (48)తో కలిసి చిన్న వ్యవసాయ ఆధారిత పరిశ్రమ నడుపుతున్నారు. వారికి 2013లో అమ్మాయి పుట్టింది. విశేషం ఏమిటంటే, ఆ చిన్నారిని అందరూ ముద్దుగా 'టెన్‌ థౌజెండ్ యూరో గర్ల్' అని పిలుస్తారు. ఇప్పటి వరకు ఆ కుటుంబానికి 6,000 యూరోల పారితోషికం అందింది.

ఈ ఊరిలోని ఫలితాలను చూసిన తర్వాత, ఫిన్‌లాండ్‌లోని ఇతర మున్సిపాలిటీలు బేబీ బోనస్‌ లాంటి పథకాలను ప్రవేశపెడుతున్నాయి.

జననాల రేటును పెంచేందుకు స్థానిక పాలక సంస్థలు ఇలాంటి ప్రోత్సహకాలు ఇస్తున్నా ఇప్పటికీ ఫిన్లాండ్ జాతీయ జననాల రేటు అత్యంత తక్కువగా ఉంటోంది.

మిగతా యూరోపియన్ దేశాల మాదిరిగానే, గడిచిన దశాబ్ద కాలంలో ఫిన్లాండ్‌లో జననాల రేటు దారుణంగా పడిపోయింది. 2018లో ప్రతి మహిళకు 1.4 చొప్పున చిన్నారులు ఉన్నారు. అంతకు ముందు పదేళ్ల క్రితం ఈ రేటు 1.85గా ఉండేది.

ఫిన్లాండ్‌లో జననాల పెరుగుదల, పిల్లల పోషణకు సంబంధించి ప్రోత్సాహకరమైన పథకాలు చాలానే ఉన్నాయి. బేబీ బాక్స్‌ల పంపిణీతో పాటు, ఒక్కో చిన్నారికి నెలనెలా దాదాపు 100 యూరోలు (రూ. 7,865) ఇవ్వడం, 70 శాతం వేతనంతో కూడిన 9 నెలల ప్రసూతి సెలవులు ఇవ్వడం లాంటి కార్యక్రమాలు అమలులో ఉన్నాయి.

"బేబీ బోనస్ పథకం వల్ల కొంతమందిలో పిల్లలను కనాలన్న ఆసక్తి కొంతమేర కలగొచ్చు. కానీ, ఈ ఒక్క కారణంతో ప్రజల్లో పిల్లలను కనాలన్న ఆలోచన పూర్తిగా మారుతుందని నేను అనుకోవడం లేదు. అయితే, అత్యంత ముఖ్యమైన విషయం ఏమిటంటే గతంలో చాలామంది గ్రామాలను వదిలి పట్టణాలకు వలస వెళ్లి అక్కడే స్థిరపడేవారు. ఇప్పుడు ఈ ప్రోత్సాహకాల వల్ల అలా వెళ్లేవారి సంఖ్య తగ్గింది" అని పెక్కా టుయిక్కా చెప్పారు.

మూడో బిడ్డను కంటే నెలకు రూ.41 వేలు

యూరప్‌లోని మరో దేశం ఎస్తోనియా, 2017లో పిల్లలకు నెలనెలా ఆర్థిక సాయం అందించే కొత్త పథకాన్ని ప్రారంభించింది. ఇక్కడ మొదటి బిడ్డకు 60 యూరోలు (రూ.4,724), రెండో బిడ్డకు 60 యూరోలు (రూ.4,724), మూడో బిడ్డకు 100 యూరోలు (రూ. 7,867) చొప్పున ప్రతి నెలా ఇస్తారు.

ముగ్గురు లేదా అంతకంటే ఎక్కువ మంది పిల్లలున్న కుటుంబాలకు ఎస్తోనియా ప్రభుత్వం అదనపు బహుమతులు కూడా ఇస్తుంది. ఆ కుటుంబాలకు నెలవారీ బోనస్‌గా 300 యూరోలు (రూ.23,619) చెల్లిస్తుంది. అలా ముగ్గురు పిల్లలు ఉన్న ఒక్కో కుటుంబం నెలానెలా రూ.40,920 (520 యూరోలు) అందుకుంటుంది.

సాధారణ జీవన వ్యయం, సగటు ఆదాయం తక్కువగా ఉన్న ఈ దేశంలో అంత మొత్తంలో ఆర్థిక సాయం అంటే పెద్ద విషయమే. కాబట్టి, ఈ పథకాల ప్రభావం బాగానే ఉన్నట్లు అనిపిస్తోంది. 2010తో పోలిస్తే 2018 నాటికి జనాల రేటు 1.32 నుంచి 1.67కు పెరిగింది.

ప్రభుత్వం అందిస్తున్న ఆర్థిక ప్రోత్సాహకాలతో సానుకూల ఫలితాలు వస్తున్నట్లు అనిపిస్తోందని టాలిన్ విశ్వవిద్యాలయం ప్రొఫెసర్ అల్లాన్ ప్యూర్ చెప్పారు. మూడో బిడ్డను కన్నవారికి ప్రత్యేక బహుమతి ఇచ్చే పథకం ఎక్కువ ప్రభావం చూపినట్లు అనిపిస్తోందన్నారు.

అదే సమయంలో, ఎస్తోనియాలో ప్రజారోగ్య సౌకర్యాలు మెరుగుపడటం, స్థిరమైన ఆర్థిక వృద్ధి లాంటి అంశాలు కూడా జననాల రేటు పెరుగుదలకు ఒక కారణమై ఉండొచ్చని ఆయన అభిప్రాయడ్డారు.

డబ్బు జననాలను పెంచుతుందా?

ఇలాంటి నగదు ప్రోత్సాహకాలతో జననాల రేటును పెంచవచ్చునని ఇటలీలో ఇటీవల ఒక అధ్యయనంలో వెల్లడైంది. ఇటలీలో జననాల రేటు కొన్ని దశాబ్దాలుగా చాలా తక్కువగా నమోదవుతోంది. 2018లో కనిష్ఠ స్థాయికి (ఒక మహిళకు 1.3 చొప్పున పిల్లలు) పడిపోయింది.

అదే ఇటలీలో జననాల రేటును పెంచేందుకు మెరుగైన ప్రోత్సాహకాలు అందిస్తున్న ఒక ప్రావిన్సులో మాత్రం పరిస్థితి భిన్నంగా ఉంది. స్విట్జర్లాండ్, ఆస్ట్రియా సరిహద్దుకు సమీపాన ఉన్న బోల్జానో ప్రావిన్సు అది.

ఇక్కడ జననాల రేటు 1.67గా ఉంది. అది యూరోపియన్ యూనియన్ సగటు (1.60) కంటే ఎక్కువ. ఈ ప్రావిన్సులో కుటుంబ విధానాలు ఇటలీలోని ఇతర ప్రాంతాల కంటే చాలా మెరుగ్గా ఉండటమే అందుకు కారణమని చెప్పొచ్చు.

ఇక్కడ నెలనెలా చిన్నారులకు దాదాపు 200 యూరోల దాకా ఆర్థిక ప్రయోజనం అందుతుంది. అది జాతీయ సగటు కంటే రెట్టింపు. అల్పాదాయ కుటుంబాలకు ప్రభుత్వం ప్రత్యేక రాయితీలు కూడా ఇస్తోంది.

మా ఇతర కథనాలు:

బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.