బ్రిటిష్ రచయిత కజువో ఇషిగురోకి సాహిత్యంలో నోబెల్

బ్రిటిష్ రచయిత కజువో ఇషిగురోకి ఈ ఏడాది సాహిత్యంలో నోబెల్ బహుమతిని ప్రకటించారు.

’’ఆయన ఉద్వేగ భరితమైన తన నవలల్లో ప్రపంచంతో మన అనుబంధం గురించిన భ్రమాత్మక భావన వెనుక గల అగాధాన్ని పట్టి చూపారు‘‘ అని స్వీడిష్ అకాడమీ ప్రశంసించింది.

కజువో ఎనిమిది పుస్తకాలు రాశారు. వాటిని 40కి పైగా భాషల్లోకి అనువదించారు. ఆయనకు 1995లో ఆర్డర్ ఆఫ్ బ్రిటిష్ ఎంపైర్‌ (ఓబీఈ) ప్రకటించారు.

'ద రిమైన్స్ ఆఫ్ ద డే', 'నెవర్ లెట్ మి గో' నవలలు ఆయన రచనల్లో విఖ్యాతమైనవి. ఈ రెండు నవలలు ఆధారంగా తీసిన సినిమాలకు కూడా విశేష ప్రశంసలు లభించాయి.

తనకు నోబెల్ బహుమతి ప్రకటించడం ఎంతో సంభ్రమంగా ఉందని, పట్టలేని ఆనందం కలుగుతోందని 62 ఏళ్ల కజువో స్పందించారు.

నోబెల్ బహుమతితో పాటు రూ. 7.17 కోట్ల నగదు బహుమతి కూడా లభిస్తుంది.

బీబీసీ ఆయనను సంప్రదించినపుడు.. నోబెల్ కమిటీ నుంచి తనకు ఇంకా ఎలాంటి సమాచారం రాలేదని, తనకు బహుమతి ప్రకటించినట్లు వచ్చిన వార్త హాస్యానికి పుట్టించిన వార్తేమో తనకు తెలీదని కజువో పేర్కొన్నారు.

''ఇది బ్రహ్మాండమైన గౌరవం. ఈ అవార్డు లభించిందంటే ఎందరో మహా రచయితల బాటలో నేను నడుస్తున్నానని అర్థం. ఇదొక గొప్ప ఆశ్చర్యం'' అని ఆయన అభివర్ణించారు.

‘‘ప్రపంచం చాలా అనిశ్చిత పరిస్థితిలో ఉంది. ఈ ప్రపంచంలో నోబెల్ బహుమతులు సానుకూల శక్తిగా పనిచేస్తాయని నేను ఆశిస్తున్నా’’ అని కజువో పేర్కొన్నారు.

’’ఎంతో అనిశ్చితమైన ఈ కాలంలో ఏదైనా సానుకూల వాతావరణం కోసం తోడ్పాటునందించే ఎలాంటి కృషిలోనైనా ఏరకంగానైనా నేను పాలుపంచుకోగలిగితే అది నాకెంతో ఉద్వేగాన్నిస్తుంది’’ అని చెప్పారు.

కజువో రచనలు జ్ఞాపకం, కాలం, స్వీయ-భ్రమ అంశాల మీద ఉంటాయి. సినిమాలు, టెలివిజన్‌లకు స్క్రిప్టులు కూడా ఆయన రాశారు.

2015లో విడుదలైన ఆయన తాజా పుస్తకం 'ద బరీడ్ జెయింట్'.. ''విస్మృతికి జ్ఞాపకానికి, వర్తమానానికి చరిత్రకు, వాస్తవానికి కల్పనకు గల సంబంధాన్ని అన్వేషిస్తుంద''ని నోబెల్ కమిటీ కీర్తించింది.

కజువో రచనలు ''కొంచెం జేన్ ఆస్టిన్ - ఫ్రాంజ్ కాఫ్కా రచనల కలబోతలా ఉంటాయి'' అని స్వీడిష్ అకాడమీ శాశ్వత కార్యదర్శి సారా డేనియస్ అభివర్ణించారు.

ఆయన గొప్ప నిబద్ధత గల రచయిత అని సారా పేర్కొన్నారు. ''ఆయన పక్కకి చూడరు. ఆయన పూర్తిగా తన సొంతదైన కళాత్మక ప్రపంచాన్ని రూపొందించారు'' అని ప్రశంసించారు.

ఎవరీ కజువో ఇషిగురో?

కజువో ఇషిగురో పుస్తకాలివీ...

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)