#గమ్యం: రైల్వేలో ఉద్యోగం పొందడం ఎలా?

రైలు నడిపేందుకు సిద్ధమవుతున్న మహిళా లోకో పైలట్

- రచయిత, అనిల్ కుమార్
- హోదా, బీబీసీ ప్రతినిధి
29 జులై 2018

బీబీసీ న్యూస్ తెలుగు 'గమ్యం'కు స్వాగతం.

ప్రతి సంవత్సరం వేలాది ఉద్యోగాలను భర్తీ చేస్తున్న ప్రభుత్వ రంగ సంస్థ భారతీయ రైల్వే. బ్యాంక్ ఉద్యోగాలకు యువతలో ఎంత క్రేజ్ ఉంటుందో రైల్వేలో ఉద్యోగాలకూ అంతకన్నా ఎక్కువే ఉంటుంది. పోటీ కూడా దీనికి అనుగుణంగానే ఉంటుంది. కేంద్ర ప్రభుత్వ ఉద్యోగమనో, జీతభత్యాలు బాగుంటాయనో, మరే ఇతర కారణాల వల్లనో... రైల్వే ఉద్యోగాలకు అభ్యర్థుల నుంచి స్పందన ఎప్పుడూ ఊహించినదానికంటే ఎక్కువగానే ఉంటుంది. అయితే రైల్వేల్లో ఎన్ని రకాల ఉద్యోగాలుంటాయి, వాటికి అర్హతలేమిటి, ఎంపిక విధానం ఎలా ఉంటుంది, ప్రవేశ పరీక్షలెలా ఉంటాయి... ఈ వివరాలు ఈ వారం 'గమ్యం'లో వివరిస్తున్నారు Careers360.com డైరెక్టర్ రామలక్ష్మి పేరి.

మీ అభిప్రాయాలు, సందేహాలు బీబీసీ న్యూస్ తెలుగు ఫేస్‌బుక్ పేజీలో కామెంట్ పోస్ట్ చేయండి.

వీడియో క్యాప్షన్, వీడియో: రైల్వేలో ఉద్యోగం సాధించడం ఎలా?

రైల్వేలో ఉద్యోగాలు ప్రధానంగా నాలుగు విభాగాలుగా ఉంటాయి. అవి... గ్రూప్ ఏ, గ్రూప్ బీ, గ్రూప్ సీ, గ్రూప్ డీ.

గ్రూప్ ఏ కేటగిరీ ఉద్యోగాలు:ఇవి యూపీఎస్సీ (యూనియన్ పబ్లిక్ సర్వీస్ కమిషన్) నిర్వహించే సివిల్స్ పరీక్షల ద్వారా భర్తీ అవుతాయి. ఇండియన్ రైల్వే ట్రాఫిక్ సర్వీస్, ఇండియన్ రైల్వే పర్సనల్ సర్వీస్... ఈ రెండింటికీ అర్హతలు సివిల్స్ సర్వీసెస్ పరీక్షలకు సంబంధించినవే. మరొకటి ఇండియన్ ఇంజినీరింగ్ సర్వీసెస్. దీనికి ఇంజనీరింగ్ గ్రాడ్యుయేట్లు మాత్రమే అర్హులు. ఇంకొకటి ఇండియన్ మెడికల్ సర్వీసెస్. ఈ నాలుగు కేటగిరీల ఉద్యోగాల భర్తీని యూపీఎస్సీ నిర్వహిస్తుంది.

గ్రూప్ బీ... ఇవి పూర్తిగా డిపార్ట్‌మెంటల్ ఉద్యోగాలు. అంటే... గ్రూప్ సీలో పనిచేసేవాళ్లు తగినంత అనుభవం పొందిన తర్వాత డిపార్ట్‌మెంటల్ టెస్టులు రాసి ఉత్తీర్ణులైతే గ్రూప్ బీ కేటగిరీకి పదోన్నతి పొందవచ్చు.

రైలు ఇంజిన్‌ను పరిశీలించి నివేదిక రాస్తున్న ఇంజినీర్

గ్రూప్ సీ... స్టేషన్ మాస్టర్, టికెట్ కలెక్టర్, క్లర్క్, కమర్షియల్ అప్రెంటీస్, సేఫ్టీ స్టాఫ్, ట్రాఫిక్ అప్రెంటీస్, ఇంకొన్ని ఇంజనీరింగ్ ఉద్యోగాలు ఈ కేటగిరీలో ఉంటాయి. ఈ ఉద్యోగాలకు డిమాండ్ చాలా ఎక్కువ. ఈ సంవత్సరం 26000 ఉద్యోగాల భర్తీకి నోటిఫికేషన్ విడుదల చేయగా దాదాపు 2.6 కోట్ల దరఖాస్తులు వచ్చాయి. దీన్ని బట్టే అర్థం చేసుకోవచ్చు.. ఈ ఉద్యోగాలకున్న డిమాండ్ ఎలాంటిదో.

వీటికి కనీస విద్యార్హత పదో తరగతితోపాటు ఐటీఐ ఉత్తీర్ణత. 18 నుంచి 32 సంవత్సరాల లోపు వయసు కలిగి ఉండాలి. వీటితోపాటు సాధారణ రిజర్వేషన్లన్నీ వర్తిస్తాయి.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

గ్రూప్ డీ ఉద్యోగాలు: ఇవి ప్రాథమిక స్థాయి లేదా ఎంట్రీ లెవల్ ఉద్యోగాలు అని చెప్పవచ్చు. ట్రాక్ మెన్, హెల్పర్, పాయింట్స్ మెన్, సఫాయివాలా, ప్యూన్... ఇలా ప్రతి రైల్వే స్టేషన్లోనూ అవసరమైన సాధారణ సిబ్బంది అందరూ గ్రూప్ డీ కిందికి వస్తారు. దీనికి కనీస అర్హత పదో తరగతి ఉత్తీర్ణతతో పాటు ఐటీఐ సర్టిఫికెట్ ఉండాలి.

ఈ విభాగంలో ప్రతి సంవత్సరం దాదాపు 62000 ఉద్యోగాల భర్తీ జరుగుతుంది. ఈ ఉద్యోగాల భర్తీకి నోటిఫికేషన్ విడుదలకు ప్రత్యేకించి ఓ సమయమంటూ ఏమీ ఉండదు. రైల్వే శాఖ ఎప్పుడు ఖాళీలు భర్తీ చేయాలనుకుంటే అప్పుడు ప్రకటన విడుదల చేస్తుంది.