ఫైసల్ మొహమ్మద్ అలీ

బీబీసీ ప్రతినిధి

చలి తగ్గుముఖం పడుతుండగా దేశంలో మొదలైన ఎన్నికల సందడి రాజకీయ వేడిని పెంచుతోంది. ఒకవైపు ఎన్డీయే రోజురోజుకూ బలపడుతున్నట్లు కనిపిస్తుంటే, మరోవైపు విపక్షాల కూటమి- ‘ఇండియా’ విచ్ఛిన్నం అవుతోందనే చర్చ జరుగుతోంది.

ఇప్పటి వరకు 2024 పార్లమెంట్ ఎన్నికల్లో ప్రధాన పోరు ప్రధాని నరేంద్ర మోదీ సారథ్యంలోని అధికార బీజేపీకి, 50లోపు పార్లమెంట్ స్థానాలకు పడిపోయిన కాంగ్రెస్ పార్టీకి మధ్యే కనిపిస్తోంది.

ప్రధాని మోదీ తన రాజకీయ ప్రసంగాలలో జవహర్‌లాల్ నెహ్రూ, ఇందిరా గాంధీ, రాహుల్ గాంధీల పైనే ప్రధానంగా దృష్టి సారించడానికి బహుశా ఇదే  కారణం కావచ్చు.

ఎప్పటిలాగే మోదీ రాహుల్ గాంధీని ‘యువరాజు’ అని సంబోధించారు. ఎంత ప్రయత్నించినా కాంగ్రెస్ రాహుల్ గాంధీని ఒక నాయకుడి స్థాయికి తీసుకురాలేకపోయారని ప్రధాని మోదీ ఎద్దేవా చేశారు. మోదీ, ఆయన పార్టీ ప్రత్యేకంగా రాహుల్ గాంధీని లక్ష్యంగాచేసుకుని, ఆయనకు ఒక నిర్దిష్టమైన ఇమేజ్‌ను అంటగట్టడానికి ప్రయత్నిస్తున్నాయి. అలా చేయడానికి కారణం ఏమిటన్నదే ప్రశ్న?

దాదాపు ఆరేళ్ల క్రితం లోక్‌సభలో అవిశ్వాస తీర్మానంపై చర్చ సందర్భంగా రాహుల్ గాంధీ:

అయితే, ఆ తర్వాత నరేంద్ర మోదీ తన ప్రసంగంలో, ఆ సంఘటనను రాహుల్ గాంధీని విమర్శించడంలో భాగంగా వర్ణించారు.

రాహుల్ గాంధీ తన పార్టీనిసెక్యులర్‌గాను, 'బీజేపీ, ఆర్‌ఎస్‌ఎస్ వంటి విద్వేషపూరిత శక్తులకు' వ్యతిరేకంగా పోరాడుతున్నదిగానూ పరిగణిస్తారు.

తన భావజాలం ప్రేమను వ్యాప్తి చేయడాన్ని విశ్వసిస్తుందని, అందుకోసం తాను ‘ప్రేమ దుకాణం’ తెరిచానని రాహుల్ గాంధీ అంటారు.
ఆయన ఇంకా ఏమంటారంటే..

“నేను ద్వేషపు మార్కెట్‌లో ‘ప్రేమ దుకాణం’ తెరుస్తున్నాను. మీరు నన్ను దుర్భాషలాడొచ్చు లేదా ద్వేషించొచ్చు. అది మీ ఇష్టం. మీది ద్వేషపు మార్కెట్‌ అయితే, నాది ప్రేమ దుకాణం. అంతే కాకుండా, నేను నా గురించి మాత్రమే మాట్లాడటం లేదు’’ అన్నారు.

దానితో పాటు

‘‘రాహుల్ గాంధీ మాత్రమే ఇలా అంటున్నారని అనుకోవద్దు. ఈ పార్టీ, ఈ దేశానికి స్వాతంత్ర్యం తెచ్చిన మహాత్మా గాంధీ, జవహర్ లాల్ నెహ్రూ, సర్దార్ పటేల్, అంబేద్కర్‌లాంటి వ్యక్తులు అందరూ 'ప్రేమ దుకాణం' ఏర్పాటు చేశారు, మేమూ అదే చేస్తున్నాము’’ అని చెబుతారు.

ప్రేమ దుకాణం తెరవాలని ఆయన బీజేపీనీ  ఆహ్వానించారు.

అయితే, రాహుల్ గాంధీ ప్రేమ దుకాణాన్ని బీజేపీ 'రాజవంశ సంస్కృతి, బంధుప్రీతి, ద్వేషం, కులతత్వాలను విక్రయించే విద్వేషాల మాల్' అని అభివర్ణించింది.

భారతదేశపు పునాదికి సూత్రాలు ఇవేనని రాహుల్ గాంధీ భావిస్తున్నారని ఆంగ్ల దినపత్రిక హిందూస్థాన్ టైమ్స్ పొలిటికల్ ఎడిటర్ వినోద్ శర్మ అభిప్రాయపడ్డారు.

ఎన్నికల వ్యూహకర్త, జన్‌స్వరాజ్ అభియాన్ కన్వీనర్ ప్రశాంత్ కిషోర్, ప్రస్తుతం రాహుల్ గాంధీ చేపట్టిన ‘న్యాయ్ యాత్ర’ సమయం సరైనది కాదని అభిప్రాయపడ్డారు.

"రాహుల్ గాంధీ పార్టీ ప్రధాన కార్యాలయం(దిల్లీ)లో ఉండాల్సిన సమయంలో, యాత్ర చేయడం సరైనది  కాదు’’ అని ప్రశాంత్ కిషోర్ అన్నారు.

జనతాదళ్ (యునైటెడ్) ప్రధాన కార్యదర్శి కె. సి. త్యాగి,

“లౌకికవాదం అంటే కేవలం ఆర్‌ఎస్‌ఎస్‌ను తిట్టడం, ముస్లింలను మభ్యపెట్టడం కాదు. ఇది స్వాతంత్ర్య ఉద్యమం నుండి పుట్టుకొచ్చిన సంపూర్ణ ప్రక్రియ,’’ అన్నారు.

ఆయన బీబీసీతో మాట్లాడుతూ,

"దీనిని నమ్మాలంటే ఆచరణ అవసరం, ఆయన తను చెప్పేవన్నీ ఆచరించాలి" అన్నారు.

బాబ్రీ మసీదు ధ్వంసం కాకుండా కాపాడే ప్రయత్నంలో ములాయం సింగ్ భారీ వ్యతిరేకతను ఎదుర్కోవలసి వచ్చింది, మండల్ కమిషన్ సిఫార్సులను అమలు చేయడానికి మాజీ ప్రధాని వీపీ సింగ్ క్లిష్టమైన పరిస్థితులను ఎదుర్కొన్నారు. దాని ఫలితంగా ప్రభుత్వం పడిపోయినా ఆయన దానికి కట్టుపడ్డారని త్యాగి ఉదాహరణలను చూపారు.

కె.సి. త్యాగి పార్టీ కొంత కాలం క్రితం వరకు కాంగ్రెస్‌తో పాటు ఇండియా (INDIA) కూటమిలో భాగస్వామిగా ఉంది. అయితే ఇటీవల నితీష్ కుమార్ బీజేపీతో చేతులు కలపాలని నిర్ణయించుకోవడంతో, జేడీయూ ఎన్డీయేలో భాగమైంది. త్యాగి పార్టీ ఇండియా కూటమిలో భాగంగా ఉన్నప్పుడు బీబీసీ ఆయనతో మాట్లాడింది. 

రాహుల్ ఆర్‌ఎస్‌ఎస్, బీజేపీపై దాడి చేసినా, ఆయన, ఆయన సొంత పార్టీవారు మితవాద హిందుత్వను (సాఫ్ట్ హిందుత్వ) అనుసరిస్తారని అనేక ఆరోపణలు ఉన్నాయి.

మోదీ ప్రభుత్వాన్ని రాహుల్ గాంధీ ‘సూటు బూటు’ ప్రభుత్వం అని, ‘మోదీ ప్రభుత్వం కాదు, అదానీ-అంబానీ ప్రభుత్వం’ అని అభివర్ణిస్తుంటారు. ఇలాంటి మాటల ద్వారా రాహుల్ గాంధీ, ఈ ప్రభుత్వం ధనవంతులదని చెప్పడానికి ప్రయత్నిస్తున్నారు.

అయితే, ఇది రాహుల్ గాంధీ కార్పొరేట్ వ్యతిరేకి అనే సందేశాన్ని వ్యాప్తి చేయడానికి దోహదపడింది. 

దిల్లీని ఆనుకుని ఉన్న భట్టా పర్సౌల్‌లోని రెండు గ్రామాల రైతులకు నష్టపరిహారం విషయంలోనూ, ఒడిశాలోని నియామ్‌గిరిలో మైనింగ్‌ను నిలిపివేయాలని కోరుతూ జరిగిన ఆందోళనలోనూ రాహుల్ గాంధీ ముందున్నారు.ఈ రెండు సంఘటనలు జరిగిన సమయంలో ఆయన పార్టీనే కేంద్రంలో అధికారంలో ఉన్నా, ఈ రెండు కేసులు నేరుగా కేంద్ర ప్రభుత్వానికి సంబంధించినవి కావు.

రాహుల్ గాంధీ 1960, 1970ల నాటి రాజకీయాలను అనుసరిస్తున్నారని ఒక కార్పొరేట్ సంస్థలో సీనియర్ హోదాలో ఉన్న ఓ వ్యక్తి అన్నారు. భారతదేశ ఆర్థిక పురోగతికి రాహుల్ వద్ద ఎలాంటి నమూనా లేదని  ఆయన విమర్శించారు.

ముంబయికి చెందిన మరో కార్పొరేట్ హౌస్‌ సీనియర్ అధికారి, “ఈ (పోస్ట్ క్యాపిటలిస్ట్ ప్రపంచం) కాలంలో, ప్రతి ఒక్కరికీ ఏదో ఒక ఆకాంక్ష ఉంది. భవిష్యత్తులో భారత్‌ను ఎక్కడ చూడాలనుకుంటున్నారు అన్నదానికి రాహుల్ గాంధీ దగ్గర సమాధానాలు లేవు. నరేంద్ర మోదీ ఆ కలను సాకారం చేయగలరు’’ అన్నారు.

అనేక కార్పొరేట్ సంస్థలతో సంబంధాలు కలిగి, మేనేజ్‌మెంట్ పాఠశాలల్లో బోధించే జయశ్రీ సుందర్ మాట్లాడుతూ, వ్యాపార సంస్థలకు రాహుల్ వైఖరిపై కొన్ని అనుమానాలు ఉండొచ్చని అన్నారు.

అయితే కాంగ్రెస్‌ ప్రధాన కార్యదర్శి దిగ్విజయ్‌ సింగ్‌ మాత్రం, కాంగ్రెస్‌ ధనవంతులకు వ్యతిరేకం కాదంటూ తమ పార్టీని సమర్థించుకున్నారు. “వాళ్లు ఉపాధిని సృష్టిస్తారని మాకు తెలుసు. మా పార్టీ అధికారంలో ఉన్న చోట ఆర్థిక సరళీకరణను ప్రారంభించి, దానిని ముందుకు తీసుకెళ్లాం,’’ అని దిగ్విజయ్ అన్నారు.

ఈరోజు ప్రధాని మోదీ, గౌతమ్ అదానీకి అనుకూలంగా వ్యవహరిస్తున్నారని రాహుల్ గాంధీ చేస్తున్న ఆరోపణల్లాగే, గతంలో ధీరూభాయ్ అంబానీకి, కాంగ్రెస్‌కు మధ్య ఉన్న సంబంధాలపై ఇతరులు ప్రశ్నలు లేవనెత్తిన విషయాన్ని బీబీసీ దిగ్విజయ్ సింగ్‌కు గుర్తు చేసింది.

దీనికి దిగ్విజయ్ సింగ్ సమాధానమిస్తూ,

“డబ్బు కొద్దిమంది చేతుల్లో కేంద్రీకృతం కావడాన్ని మేం వ్యతిరేకిస్తున్నాం. పరిశ్రమలు, వ్యాపార సంస్థలకు సంబంధించి మా విధానం ఎప్పుడూ స్పష్టంగా ఉంది, మేం వాటన్నిటి అభివృద్ధినీ కాంక్షిస్తాం’’ అన్నారు.  

కానీ, 2023లో జరిగిన అసెంబ్లీ ఎన్నికల సమయంలో, ఛత్తీస్‌గఢ్‌లోని బస్తర్‌తో పాటు మరికొన్ని నియోజకవర్గాల్లో కాంగ్రెస్ మైనింగ్ లాబీ కారణంగానే వామపక్షాల అభ్యర్థులకు సీట్లు కేటాయించలేదని కమ్యూనిస్ట్ పార్టీ ఆఫ్ ఇండియా నాయకుడు అతుల్ అంజన్ ఆరోపించారు.

కాంగ్రెస్‌లో సిద్ధాంతాలు క్షీణించాయని ఆయన చాలా స్పష్టంగా చెప్పారు.

"కాంగ్రెస్ నాయకులు నెహ్రూ సోషలిస్ట్ నమూనాను స్వీకరించాలా లేదా మన్మోహన్ సింగ్ ప్రభుత్వ హయాంలో అమలు చేసిన మార్కెట్ అనుకూల విధానాలను స్వీకరించాలా అనే సందిగ్ధంలో ఉన్నారు."

దిల్లీ యూనివర్శిటీకి చెందిన మేనేజ్‌మెంట్ స్కూల్ ప్రొఫెసర్ హర్ష్ వర్మ మాట్లాడుతూ, “ప్రతి బ్రాండ్‌కు దాని సొంత గుర్తింపు, ఇమేజ్ ఉంటాయి. ఉదాహరణకు, ఒక కస్టమర్‌కు క్లోజ్ అప్ టూత్‌పేస్ట్‌ అంటే తాజాదనమని లేదా లక్స్ సబ్బు అంటే అందమని దానితో ఒక సంబంధం ఉంటుంది,’’ అన్నారు.

రాహుల్ గాంధీలోని ‘అస్థిరత’ గురించి మాట్లాడుతూ ప్రొఫెసర్ వర్మ,

“ఒకరోజు ఆయన రైతులతో కనిపిస్తారు, ఆ తర్వాత ఆయన గిరిజనుల గురించి మాట్లాడతారు, కొన్ని రోజుల తర్వాత కుల ఆధారిత జన గణన చేపడతామని అంటారు. ఆయన ఒకే సమస్య మీద ఎక్కువ కాలం ఉండరు. కుల ఆధారిత జనగణన వంటి అనేక అంశాలు నిజానికి ఆయనవి కావు. నిజానికి వాటిని లేవనెత్తింది వి.పి. సింగ్, ములాయం సింగ్, లాలూ యాదవ్. ఆయన చేస్తున్నదల్లా తిరిగి ఆ సమస్యలను లేవనెత్తడమే,’’ అని వివరించారు.

రాహుల్ గాంధీ దీర్ఘకాలం పాటు సమస్యల పరిష్కారం కోసం కృషి చేయడం నేర్చుకోవాలని సీనియర్ జర్నలిస్ట్ వినోద్ శర్మ అన్నారు. అయితే దీనికి బాధ్యత రాహుల్ గాంధీది కాదని, కాంగ్రెస్ పార్టీదే అని ఆయన అన్నారు. 

గత ఏడాది రాహుల్ గాంధీ చేపట్టిన భారత్ జోడో యాత్ర గురించి చర్చిస్తూ వినోద్ శర్మ, “రాహుల్ గాంధీ తన 4500 కిలోమీటర్ల పాదయాత్రలో ఎవరెవరిని కలవాలో పార్టీ ప్లాన్ చేసిందా? ఆయన పాదయాత్ర ముగిశాక ఇతర పార్టీ నాయకులు లేదా కార్యకర్తలు ప్రజలను కలిశారా, వాళ్లు పాదయాత్ర గురించి ఏమనుకుంటున్నారో తెలుసుకోవడానికి, ఆ సందేశాన్ని జనంలో వ్యాప్తి చేయడానికి ప్రయత్నించారా? పాదయాత్ర తర్వాత వాళ్లు చేయాల్సిన పనులు చేశారా?" అని ప్రశ్నించారు.

రాహుల్ గాంధీ ఆ యాత్రలో మాజీ ప్రధాని అటల్ బిహారీ వాజ్‌పేయి స్మారక స్థూపాన్నీ సందర్శించారు, లాలూ యాదవ్ ఇంట్లో మాంసాన్నీ వండారు. అయితే ఆయన మీడియా బృందం ఈ సంఘటనలకు సంబంధించిన ప్రతీకాత్మక అంశాలను జనంలోకి తీసుకు పోవడంలో విఫలమైంది.

తన యుద్ధం వ్యక్తిగత పోరాటం కాదని, భావజాలానికి సంబంధించినదని రాహుల్ గాంధీ చెబుతుంటారు. అందువల్ల లాలూ ప్రసాద్ యాదవ్ ఇంట్లో రాహుల్ గాంధీ మాంసం వండిన సన్నివేశం నిజానికి ఒక బలమైన సంకేతంగా మారి ఉండేది. ముఖ్యంగా, చాలామంది ముస్లింలను వారి ఆహార ఎంపిక ఆధారంగా హత్య చేసిన సందర్భంలో అదొక శక్తిమంతమైన ప్రతీక అయ్యేది. కానీ, దీన్ని ఉపయోగించుకోవడంలో కాంగ్రెస్ విఫలమైంది.

కానీ, అదే ఘటనను బీజేపీ రాహుల్ గాంధీని లక్ష్యంగా చేసుకోవడానికి ఉపయోగించుకుంది. నిజమైన హిందువులు పవిత్రమైన శ్రావణ మాసంలో మాంసాహారం తినడం గురించి ఎలా ఆలోచిస్తారని బీజేపీ అధికార ప్రతినిధి షాజాద్ పూనావాలా ప్రశ్నించారు. జంధ్యం ధరించే బ్రాహ్మణుడైన రాహుల్ గాంధీ శ్రావణ మాసంలో మాంసం ఎలా తింటారని బీజేపీ నేత సంబిత్ పాత్ర ప్రశ్నించారు.

53 ఏళ్ల రాహుల్ గాంధీ ఇమేజ్ ‘56 అంగుళాల ఛాతీ’ కథనానికి భిన్నంగా కనిపిస్తుంది.

రచయిత్రి, చిత్ర నిర్మాత పరోమితా వోహ్రా  ఏం రాశారంటే:

“భారత్ జోడో యాత్ర వీడియోలు పౌరుషత్వానికి భిన్నమైన నిర్వచనాన్ని ఇచ్చాయి. ఇది ప్రజలు తన ముందు సాగిలపడాలని కోరుకునే అధికారపు పౌరుషం కాదు. ఇది నిష్కపటం, చిరునవ్వు, సున్నితత్వం, ఆత్మీయ ఆలింగనం చేసుకునే పౌరుషత్వం’

ఆమె ఇంకా ఏం అన్నారంటే,

“ఈ ఇమేజ్‌లో స్నేహం, సహజీవనపు స్ఫూర్తి, వాగ్దానాలను మించి స్వీయ ఆత్మపరిశీలన కోసం తపన ఉన్నాయి. అనిశ్చితి, బలహీనతలు ఉన్నా స్థిరంగా ఉండాలనే తపన. ఇది ఒక భావోద్వేగాన్ని సృష్టించింది. నరేంద్ర మోదీ బలంగా, శక్తిమంతంగా, ప్రభావవంతంగా, కలిపి ఉంచే బంధంగా కనిపిస్తే, రాహుల్ గాంధీ తన చుట్టుపక్కల ఉన్న వారందరి మధ్య సంగీతంలా వ్యాపించి, వారిని అర్థవంతం చేస్తారు’’

అయితే, గత ఏడాది అసెంబ్లీ ఎన్నికల ఫలితాల తర్వాత రాహుల్ గాంధీ మంచి వ్యక్తి అని ప్రజలు మళ్లీ చెప్పుకోవడం ప్రారంభించినా, ఆయన రాజకీయాలకు సరిపోరని పరోమితా తన కథనంలో పేర్కొన్నారు.  

ఇటీవల ఓ ఫొటో దేశవ్యాప్తంగా విస్తృతంగా చక్కర్లు కొట్టొంది. కొన్ని సంవత్సరాల క్రితం తీసిన ఈ ఫొటోలో, ఒకప్పుడు రాహుల్ గాంధీకి సన్నిహితులుగా భావించే జ్యోతిరాదిత్య సింధియా, సచిన్ పైలట్, ఆర్.పి.ఎన్. సింగ్, జితిన్ ప్రసాద్, మిలింద్ దేవరా వంటి నాయకులు నవ్వుతూ నిలబడి ఉండడం కనిపిస్తుంది.

ముంబయి పార్లమెంటు సభ్యుడిగా ఉన్న మిళింద్ దేవరా మహారాష్ట్రలో బీజేపీ మిత్రపక్షమైన శివసేన(షిండే)లో చేరేందుకు కాంగ్రెస్‌ను వీడారు.

ఫిబ్రవరి 14న మణిపూర్ నుంచి రాహుల్ గాంధీ తన న్యాయ్‌యాత్రను ప్రారంభించిన రోజున మిళింద్ దేవరా కాంగ్రెస్‌ను వీడాలని నిర్ణయించుకున్నారు.

'రాహుల్ బ్రిగేడ్' సభ్యులు ఒకరి తర్వాత ఒకరు కాంగ్రెస్ పార్టీని వీడడం రంభించిన తర్వాత, పార్టీ మాజీ అధ్యక్షుడు ప్రజలను ఏకం చేయగలరా అనే ప్రశ్నలు మళ్లీ తలెత్తాయి.

మిళింద్ దేవరా నిష్క్రమణ తర్వాత, 'రాహుల్ బ్రిగేడ్'లో సచిన్ పైలట్ మాత్రమే ఇప్పటికీ కాంగ్రెస్ పార్టీలో కొనసాగుతున్నారు.

కొద్ది రోజుల క్రితం, మహారాష్ట్ర మాజీ ముఖ్యమంత్రి, ప్రభావశీలి అయిన కాంగ్రెస్ నేత అశోక్ చవాన్ సైతం కాంగ్రెస్‌ను వీడి బీజేపీలో చేరారు.

“అధికారం చెలాయించడానికి బదులుగా రాహుల్ గాంధీ, తనను తాను ఆ అధికారానికి ట్రస్టీగా భావిస్తున్నారు. అలాగే, తన సన్నిహితులూ, ఎరుపు రంగు దీపాలతో మెరిసే కార్లు, అధికారంతో సంబంధం ఉన్న ఇతర వస్తువులకు దూరంగా ఉంటారని ఆశిస్తున్నారు," అని రాజకీయ విశ్లేషకులు రషీద్ కిద్వాయ్ అన్నారు.

అయన ఇంకా ఏమన్నారంటే..

"రాజకీయ విధేయతలు ఇచ్చిపుచ్చుకోవడంపై ఆధారపడి ఉంటాయని రాహుల్ గాంధీకి అర్థం కావడం లేదు, లేదా ఆయన అర్థం చేసుకోవడానికి ఇష్టపడం లేదు"

అయితే తారిఖ్ అన్వర్ మాత్రం దీన్ని మరోలా విశ్లేషించారు

“కాంగ్రెస్‌ను వదిలి వెళ్లిన వాళ్లు ఆ పార్టీ వల్ల, రాహుల్ గాంధీతో ఉన్న సాన్నిహిత్యం వల్ల చాలా ప్రయోజనాలను పొందారు. కాంగ్రెస్‌లో తొలిసారి ఎన్నికల్లో గెలిచిన వాళ్లకూ  మంత్రివర్గంలో చోటిచ్చారు. వాళ్లు పార్టీని వీడడం రాహుల్ గాంధీకి మంచిదే. వాళ్లు పార్టీని వీడాలనుకున్నది ఏ భావజాలం కారణంగానో కాదు, ఒత్తిడికి గురై లేదా ఏదో ఒక ఆకర్షణ కారణంగానే కాంగ్రెస్‌ను వీడారు”

తమ సొంత ప్రభుత్వం చేసిన చట్టాల కాపీలను చించేసి, అహంకారి అనిపించుకున్న వ్యక్తి, ‘పప్పు’ అని ముద్ర పడ్డ వ్యక్తి నిజానికి ఎలాంటి వారు?

మేనేజ్‌మెంట్ పాఠాలు చెప్పే జయశ్రీ సుందర్, రాహుల్ గాంధీలో తనకెప్పుడూ అహంకారం కనిపించలేదని చెప్పారు. ఆయనను మంచి రాజకీయ నాయకుడిగా అంగీకరించడానికి ఇష్టపడని చాలా మంది బీజేపీ నాయకులు సైతం ఆయన మంచి వ్యక్తి అని ఒప్పుకుంటారని తెలిపారు.

2004లో కాంగ్రెస్ పార్టీ ఎన్నికల ప్రచారం, వ్యూహాన్ని సిద్ధం చేసిన ఢిల్లీలోని లియో బర్నెట్ ఇమేజ్ మేనేజ్‌మెంట్ కంపెనీకి జయశ్రీ సుందర్ అధిపతి.

ఆ సమయంలో కాంగ్రెస్ చాలా కాలం నుంచి అధికారానికి దూరమై, సమాజంలోని అతి పెద్ద వర్గం ఆమోదం పొందిన అటల్ బిహారీ వాజ్‌పేయి వంటి బలమైన నాయకుడిని ఎదుర్కొంటోంది.

'డోంట్ ఫర్గెట్ 2004: అడ్వర్టైజింగ్ సీక్రెట్స్ ఆఫ్ యాన్ ఇంపాజిబుల్ ఎలక్షన్ విక్టరీ' అన్న పుస్తకంలో జయశ్రీ సుందర్ - గాంధీ నెహ్రూ కుటుంబం, జైరాం రమేష్, సల్మాన్ ఖుర్షీద్, ఇతర నాయకులతో కలిసి వ్యూహరచన చేసి, ఎన్నికలలో విజయం కోసం నిర్వహించిన సమావేశాల ప్రక్రియ గురించి సుదీర్ఘంగా వివరించారు.

ఈ పుస్తకం జనవరి 6వ తేదీ ఉదయం వాతావరణం అతి చల్లగా ఉన్న సమయంలో కాంగ్రెస్ కార్యకర్త షమీమ్ ఆమెకు చేసిన ఫోన్ కాల్‌తో ప్రారంభమవుతుంది. ఆ కాల్‌ను మొదట ఆమె ఆకతాయితనంగా భావించారు.

ఫిల్టర్ కాఫీ సిప్‌ల మధ్య జయశ్రీ ఓ రిపోర్టర్‌తో రాహుల్, ప్రియాంక గాంధీని మొదటిసారి కలిసిన రోజు గురించి వివరించారు. ఆమె అప్పటికే సోనియా గాంధీని కలిసి ఉన్నారు.

“సోనియా గాంధీయే నాకు రాహుల్, ప్రియాంక గాంధీలను పరిచయం చేశారు. వాళ్లు అందరికీ తెలిసిన వాళ్లే కదా, మళ్లీ ప్రత్యేకంగా పరిచయం ఎందుకని నాలో నేను అనుకున్నాను. కానీ, సోనియా గాంధీ తన పిల్లలు అందరికీ తెలుసని అనుకోలేదు. ఇది నాకు ఆమెలో నచ్చిన నిరాడంబరతకు ఉదాహరణ,’’ అని జయశ్రీ తెలిపారు. 

అప్పటి నుంచి జయశ్రీ రాహుల్, ప్రియాంకలను క్రమం తప్పకుండా కలిసేవారు. ఆ సమయంలో రాహుల్‌ ఆమెకెప్పుడూ చేతిలో ఏదో ఒక పుస్తకంతో కనిపించేవారు. ఆయన ప్రతిదీ సూక్ష్మంగా, వివరంగా అర్థం చేసుకోవడానికి ప్రయత్నిస్తారని తనకు అనిపించిందని జయశ్రీ అన్నారు.

అయితే, ఒక విధమైన పొలిటికల్ బ్రాండ్ అయిన రాహుల్ గాంధీ, భవిష్యత్తులో ప్రత్యర్థులకు సవాలుగా మారతారా?

బ్రాండ్ గురు సందీప్ గోయల్, ఇతర బ్రాండ్ల మాదిరిగానే, బ్రాండ్ రాహుల్‌కూ సానుకూల, ప్రతికూల అంశాలు ఉన్నాయని అన్నారు. 

“రాహుల్ గాంధీని యువతకు చిహ్నంగా చూస్తారు, ఆయన గాంధీ-నెహ్రూ వంశానికి చెందినవారు. పాదయాత్ర సందర్భంగా ఆయనను సులభంగా ప్రజలతో కలిసిపోయే మాస్ లీడర్‌గా చూపించారు. మనం ఆ కోణంలో చూస్తే, ఆయన అభివృద్ధి చెందుతున్న దశలో ఉన్న ఒక బ్రాండ్’’ అని సందీప్ గోయల్ అన్నారు.