బెంగళూరు రేవ్ పార్టీ కేసు: పోలీసులు ఏం చెప్పారు? అసలు రేవ్ పార్టీ అంటే ఏంటి? అందులో ఏం చేస్తారు?

బెంగళూరు శివారులోని ఒక ఫామ్ హౌస్‌లో ‘సన్ సెట్ టు సన్ రైజ్ విక్టరీ’ పేరుతో మే 19వ తేదీ రాత్రి రేవ్ పార్టీ జరిగిందని, అందులో డ్రగ్స్ వాడుతున్నారన్న అనుమానంతో సోదాలు నిర్వహించినట్లు పోలీసులు చెప్పారు. అక్కడ పలు రకాల డ్రగ్స్ దొరికినట్టు బెంగళూరు పోలీసులు మీడియాకు చెప్పారు.

మే 19 రాత్రి నుంచి మే 20 ఉదయం వరకూ ఆ పార్టీ కొనసాగిందని, తెల్లవారుజామున 3 గంటలప్పుడు సోదాలు చేసి కొన్ని కార్లను, డీజే పరికరాలను, స్మార్ట్ ఫోన్లను కొంత మొత్తం డ్రగ్స్‌ను స్వాధీనం చేసుకున్నామని పోలీసులు వెల్లడించారు.

మొత్తం 10౩ మందిపై బెంగళూరు పోలీసులు కేసులు పెట్టారు. వారిలో 86 మంది రక్తపు నమూనాల్లో డ్రగ్స్ ఆనవాళ్లు కనిపించినట్టు పోలీసులు మీడియాకు చెప్పారు. టెస్టుల్లో పాజిటివ్ అని తేలిన వారిని పిలిచి తదుపరి విచారణ చేస్తామన్నారు.

ఈ కేసులో కొందరు తెలుగువారు కూడా ఉన్నారని పోలీసులు చెప్పారు.

సోదాల సమయంలో చాలా మంది డ్రగ్స్‌‌ని అక్కడున్న చెత్తబుట్టల్లో స్విమ్మింగ్ పూల్‌లో వేశారని, పోలీసు కుక్కల సాయంతో వాటిని గుర్తించినట్టు బెంగళూరు పోలీస్ కమిషనర్ బి. దయానంద మీడియకు చెప్పారు.

పార్టీ జరిగిన ప్రదేశంలో ముందుగా సమాచారం కనుక్కోలేకపోయినందుకు స్థానిక బీట్ చూసే పోలీసు సిబ్బందిని సస్పెండ్ చేశారు.

ఈ రేవ్ పార్టీ వ్యవహారం కర్ణాటక రాజకీయాల్లోనూ చర్చనీయాంశం అయింది. కాంగ్రెస్ హయాంలో ‘ఉడతా బెంగళూరు’గా మారిందని బీజేపీ ఆరోపింది. డ్రగ్స్ విషయంలో జీరో టోలరెన్స్ పాలసీ అమలు చేస్తున్నట్టు కాంగ్రెస్ చెప్పింది.

రేవ్ పార్టీ అంటే ఏంటి?

అసలు రేవ్ పార్టీ అంటే ఏంటి? అందులో ఏం జరుగుతుంది? అన్నది తెలుసుకునేందుకు మాదక ద్రవ్యాల సరఫరాను అడ్డుకునే అధికారులు, ఇన్ఫార్మర్లతో గతంలో బీబీసీ ప్రతినిధి మయాంక్ భగత్ మాట్లాడారు.

వారు చెప్పిన దాని ప్రకారం..

రేవ్ పార్టీలు చాలా రహస్యంగా జరుగుతాయి. వీటిలో డ్రగ్స్, మద్యం, మ్యూజిక్, డ్యాన్స్ తదితరాలు ఉంటాయి.

''రేవ్ పార్టీలు కొందరు వ్యక్తులు, వారి సర్కిళ్లలో మాత్రమే జరుగుతాయి. వీరిలో అంతా తెలిసినవారే ఉంటారు. కొత్తవారిని అనుమతించరు. అలా సమాచారం బయటకు రాకుండా జాగ్రత్త పడతారు'' అని పేరు చెప్పడానికి ఇష్టపడని నార్కోటిక్స్ కంట్రోల్ బ్యూరో అధికారి ఒకరు వివరించారు.

రేవ్ పార్టీల్లో పాల్గొనేవారిలో డ్రగ్స్ తీసుకునే వారు చాలా జాగ్రత్తగా వ్యవహరిస్తారు. సరఫరా చేసేవారు కూడా అంత త్వరగా బయటపడరు.

ఆదిల్ షేక్ ( పేరు మార్చాం) రెండుసార్లు నార్కోటిక్స్ కంట్రోల్ బ్యూరో అధికారులతో కలిసి రేవ్ పార్టీలపై నిర్వహించిన దాడుల్లో పాల్గొన్నారు.

''రేవ్ పార్టీల్లో డ్రగ్స్‌ను తీసుకుంటారు. డ్రగ్స్ తీసుకున్నవారు తాము ఏ స్థితిలో ఉన్నామో తెలియనంత మత్తులో మునిగి పోతారు'' అని ఆదిల్ షేక్ చెప్పారు.

''రేవ్ పార్టీల్లో ఎక్స్‌టాసీ, కెటామైన్, ఎండీఎంఏ, ఎండీ, చరస్‌‌ లాంటివి ఎక్కువగా ఉపయోగిస్తారు'' అని ఆదిల్ వెల్లడించారు.

పెద్ద ఎత్తున ఎలక్ట్రిక్ ట్రాన్స్ మ్యూజిక్, లైటింగ్‌లో ఈ పార్టీలు జరుగుతుంటాయని, ఈ మత్తు పదార్ధాలు తీసుకున్న వ్యక్తులు ఎక్కువసేపు ట్రాన్స్‌లో ఉండిపోతారని ఆయన వెల్లడించారు.

డ్రగ్స్ తీసుకున్న తర్వాత అబ్బాయిలు, అమ్మాయిలు సంగీతపు హోరులో మునిగిపోతారు. కొన్ని రేవ్‌పార్టీలు 24 గంటల నుండి మూడు రోజుల వరకు కొనసాగుతుంటాయి.

"ఇక్కడ ఎలక్ట్రానిక్ ట్రాన్స్ మ్యూజిక్‌‌ను ప్లే చేయడానికి ప్రత్యేక సిస్టమ్ ఉంటుంది. అది ధ్వనిని ఎక్కువగా చేస్తుంది" అని నార్కోటిక్స్ కంట్రోల్ బ్యూరో అధికారులు తెలిపారు.

పార్టీలో లేజర్ షోలు, ప్రొజెక్టెడ్ కలర్ ఇమేజ్‌లు, విజువల్ ఎఫెక్ట్‌లు, ఫాగ్ మెషీన్‌లను కూడా ఉపయోగిస్తారు.

"రేవ్ పార్టీలో ప్లే చేసే పాటల్లో లిరిక్స్ చాలా తక్కువగా ఉంటుంది. ట్రాన్స్ మ్యూజిక్ భ్రాంతిలో ముంచెత్తుతుంది" అని రెవ్ పార్టీపై దాడుల్లో పాల్గొన్న ఇన్ఫార్మర్ ఒకరు చెప్పారు.

ఈ పార్టీ ఏర్పాటు చేసుకోవడంలో ప్రత్యేక కోడ్ లాంగ్వేజ్ ఉంటుంది. పార్టీ ప్లాన్ నుంచి ముగింపు వరకు ఈ కోడ్ లాంగ్వేజ్‌ను వాడతారు.

ముంబయికి చెందిన రిటైర్ట్ పోలీస్ ఆఫీసర్ సమాధాన్ ధనేధర్ గతంలో యాంటీ నార్కోటిక్స్ డిపార్ట్‌మెంట్‌లో పని చేశారు. ఆయన రేవ్ పార్టీలు జరిగే తీరును వివరించారు.

"రేవ్ పార్టీలు ఏకాంత ప్రదేశాల్లో, అంటే బయటివారు అంత సులువుగా లోపలకు రాలేని ప్రదేశాల్లో జరుగుతాయి. అక్కడ పార్టీ జరుగుతోందని అనుమానం కూడా బయటివారికి రాదు" అని వెల్లడించారు.

కోడ్ లాంగ్వేజ్ ద్వారా..

ఇది అత్యంత రహస్యంగా జరిగే వ్యవహారం కాబట్టి పోలీసులకు ఎలాంటి అనుమానం రాకుండా జాగ్రత్త పడతారు. ఇందులో పాల్గొనే వారిని వివిధ మార్గాల్లో ఆహ్వానిస్తారు. ఇన్విటేషన్‌ కోసం సోషల్ మీడియాలో కోడ్ లాంగ్వేజ్ వాడతారు.

"గత కొన్ని సంవత్సరాలుగా, రేవ్ పార్టీలకు ఆహ్వానాల కోసం సోషల్ మీడియాను విస్తృతంగా ఉపయోగిస్తున్నారు. డ్రగ్ కల్చర్‌లో పాల్గొనే వ్యక్తులు లేదా పిల్లలు చిన్న చిన్న గ్రూపులుగా ఏర్పడతారు. వారి ద్వారా ఆహ్వానాలు వెళతాయి" అని ధనేధర్ వెల్లడించారు.

''సీక్రెట్ కోడ్ వారికి మాత్రమే తెలుసు కాబట్టి, బయటివాళ్లు దాన్ని అర్ధం చేసుకోలేరు. భద్రత కోసం నోటి మాటల ద్వారా సమాచారాన్ని ఒకరి నుంచి మరొకరికి పాస్ చేస్తుంటారు'' అని ఆయన తెలిపారు.

ఈ పార్టీలో పాల్గొనడానికి వేల నుంచి లక్షల రూపాయల వరకు ఖర్చు అవుతుంది. కాబట్టి సామాన్యులు ఈ పార్టీకి వెళ్లలేరు. ఎక్కువగా ధనవంతులు వీటిని నిర్వహిస్తుంటారు.

గతంలో దాడులు

1980ల నుంచి ఈ రేవ్ పార్టీలు బాగా పెరిగాయని అధికారులు చెప్పారు.

2021లో ముంబయి శివారులోని ఓ క్రూయిజ్ షిప్‌లో జరిగిన రేవ్ పార్టీలో పాల్గొన్నారనే అభియోగాలతో బాలీవుడ్ స్టార్ షారుఖ్ ఖాన్ కుమారుడు ఆర్యన్ ఖాన్‌ సహా మరో 8 మందిని పోలీసులు అరెస్టు చేశారు.

2019లో జుహులోని ఓక్‌వుడ్ హోటల్‌పై జరిగిన దాడిలో 96 మందిని అరెస్టు చేశారు.

2011లో ఖలాపూర్‌లో జరిగిన రేవ్ పార్టీపై రాయగడ పోలీసులు దాడి చేశారు. ముంబయిలోని యాంటీ నార్కోటిక్ సెల్ పోలీసు అధికారి అనిల్ జాదవ్ కూడా ఈ కేసులో అరెస్టయ్యారు. ఆ పార్టీలో పాల్గొన్న 275 మంది రక్త నమూనాలలో డ్రగ్స్ ఉన్నట్లు తేలింది.

2009లో ముంబయిలోని జుహు ప్రాంతంలోని బాంబే 72 క్లబ్‌పై పోలీసులు దాడి చేశారు. 246 మందిని అదుపులోకి తీసుకున్నారు. వారి రక్త నమూనాల పరీక్షల్లో భారీ మొత్తంలో డ్రగ్స్ తీసుకున్నట్లు తేలింది.

బీబీసీ తెలుగును ఫేస్‌బుక్ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)