புதுவை யூனியன் பிரதேச சட்டமன்றத்தில் பட்ஜெட் கூட்ட உரையாற்ற வரும்படி முதல்வர் விடுத்த அழைப்பை சில காரணங்கள் கூறி ஆளுநர் கிரண் பேடி மறுத்த நிலையில், ஆளுநர் உரை இல்லாமலேயே சட்டமன்றத்தில் 2020-21 நிதியாண்டுக்கான பட்ஜெட்டை தாக்கல் செய்தார் முதல்வர் நாராயணசாமி.

புதுச்சேரி யூனியன் பிரதேசத்தில் நடப்பு நிதியாண்டிற்கான முழுமையான நிதிநிலை அறிக்கை தயாரிக்கப்பட்டு, அதற்கு மத்திய உள்துறை மற்றும் நிதித்துறையின் ஒப்புதல் பெறப்பட்டிருந்தது. இந் நிலையில், புதுச்சேரி சட்டப்பேரவை கூட்டத்தொடர் இன்று (ஜூன் 20) முதல் தொடங்கும் என்று அறிவிக்கப்பட்டது. இந்த நிலையில், மானிய கோரிக்கை விவரங்களை துறை வாரியாக முழுமையாகச் சமர்ப்பிக்கவில்லை என்றும் ஆளுநர் உரையைக் கால தாமதமாக அனுப்பியதாகவும் கூறி ஆளுநர் கிரண்பேடி பட்ஜெட் உரையாற்ற வர மறுப்பு தெரிவித்தார்.

ஆனால், மத்திய அரசின் அனுமதி பெற்ற பின்னரே கூட்டத்தொடர் தொடங்குவதால், ஜனநாயக முறைப்படி ஆளுநர் இதில் பங்கேற்கலாம் என்று கூறி துணை நிலை ஆளுநருக்கு முதலமைச்சர் நாராயணசாமி கடிதம் அனுப்பினார்.

இதற்கு பதிலளித்த ஆளுநர் கிரண்பேடி, "பட்ஜெட்டிற்கு முழு வடிவம் பெறாமல் சட்டப்பேரவையை ஏன் கூட்ட வேண்டும் என்று கேள்வி எழுகிறது, யூனியன் பிரதேச சட்டப்படி துணைநிலை ஆளுநர் ஒப்புதல் பெற்ற பிறகே பட்ஜெட் தாக்கல் செய்ய வேண்டும். எனவே, இனியும் காலம் தாழ்த்தாமல் உடனடியாக சரியான கோப்புகளை அனுப்பி ஒப்புதல் பெற்ற பின்பு வேறு ஒரு தேதியில் சட்டப்பேரவையை கூட்டினால் உரையாற்றுவேன். என்னிடம் நிதிநிலை அறிக்கை சமர்ப்பிக்காத சூழலில் தெரியாத அறிக்கைக்கு எவ்வாறு ஒப்புதல் அளிக்கமுடியும்," என்று அவர் கேள்வி எழுப்பி இருந்தார்.

இந்நிலையில், சட்டப்பேரவையில் பட்ஜெட் கூட்டத் தொடர் இன்று (ஜூலை 20) காலை 9:30 மணிக்குக் கூடியது. பேரவை தொடங்கி, 10 நிமிடங்கள் வரை காத்திருந்த பிறகும் துணைநிலை ஆளுநர் வராத காரணத்தினால், சபாநாயகர் சிவக்கொழுந்து சட்டப்பேரவை நிகழ்வைத் துவங்கினார். அப்போது துணை ஆளுநர் உரையாற்ற வரவில்லை என்பதைச் சுட்டிக்காட்டி, ஆளுநர்‌ உரை நிகழ்வைச் சபாநாயகர் ரத்து செய்தார். இதனைத் தொடர்ந்து, சட்டப்பேரவையின் அடுத்த நிகழ்வான 2020-21 ஆண்டிற்கான நிதிநிலை அறிக்கை தாக்கல் செய்யப்படும் எனக் கூறி பேரவையை சபாநாயகர் ஒத்திவைத்தார்.

இதனையடுத்து மதியம் 12 மணியளவில் மீண்டும் கூடிய அவையில் 9,000 கோடி ரூபாய் மதிப்பு கொண்ட நிதிநிலை அறிக்கையை நிதித்துறை பொறுப்பு வகிக்கும் முதல்வர் நாராயணசாமி தாக்கல் செய்து பல அறிவிப்புகளையும் வெளியிட்டார்.

அவற்றில் சில முக்கிய அறிவிப்புகள்:

அதிமுக, பாஜக வெளிநடப்பு

புதுச்சேரி முதல்வர் நிதிநிலை அறிக்கையைத் தாக்கல் செய்த பிறகு, சபாநாயகர் சிவக்கொழுந்து சட்டப்பேரவையை நாளை (ஜூலை 21) காலை 9:30 மணிவரை ஒத்திவைத்தார்.

முன்னதாக, முதல்வர் நிதிநிலை அறிக்கை தாக்கல் செய்து கொண்டிருந்தபோது, ஆளுநர் அனுமதியின்றி பட்ஜெட் தாக்கல் செய்வதற்கு எதிர்ப்பு தெரிவித்து என்.ஆர்.காங்கிரஸ், அதிமுக, பாஜக உள்ளிட்ட எதிர்க்கட்சிகள் வெளிநடப்பு செய்தனர்.

புதுச்சேரியில் ஆளுநர் உரை இல்லாமல் பட்ஜெட் கூட்டத்தொடர் நடைபெற்றது இதுவே முதல் முறை என்பது குறிப்பிடத்தக்கது. மேலும், நீண்ட நாட்கள் நடக்க வேண்டிய இந்த பட்ஜெட் கூட்டத் தொடரை, கொரோனா நோய்த் தொற்று காரணமாக இரண்டு நாட்களுக்குள் முடித்துக்கொள்ள புதுச்சேரி அரசு திட்டமிட்டுள்ளதாக கூறப்படுகிறது. மேலும், இந்த கூட்டத் தொடரில், கொரோனா‌ நோய்த் தொற்று தடுப்பு நடவடிக்கையாக பார்வையாளர் அனுமதியும் மறுக்கப்பட்டது.

பிற செய்திகள்:

சமூக ஊடகங்களில் பிபிசி தமிழ் :