ஹர்பஜனின் 'தமிழ்' பதிவுகளை கலாய்க்கும் மீம் கிரியேட்டர்கள்

ஐபிஎல் கிரிக்கெட் போட்டிகள் விரைவில் துவங்கவுள்ள நிலையில், போட்டி குறித்த விளம்பரங்கள் ஊடகங்களில் ஆக்கிரமிக்க தொடங்கியுள்ளன. இச்சூழலில், புதிய விளம்பர யுத்தியை கையிலெடுத்திருக்கிறார் கிரிக்கெட் வீரர் ஹர்பஜன் சிங்.

11-ஆவது ஐபிஎல் கபோட்டிகள் ஏப்ரல் மாதம் 4 ஆம் தேதி முதல் மே மாதம் 27 ஆம் தேதி வரை நடைபெற உள்ளது.

கடந்த ஜனவரி மாதம் நடைபெற்ற வீரர்களின் ஏலத்தில், சென்னை அணி இந்திய சுழற்பந்து வீச்சாளர் ஹர்பஜன் சிங்கை இரண்டு கோடி ரூபாய்க்கும், மேற்கு இந்திய தீவுகள் அணியை சேர்ந்த பிராவோவை 6.40 கோடிக்கும் வாங்கியது.

சென்னை சூப்பர் கிங்ஸ் அணியில் தேர்வானதையடுத்து தனது ட்விட்டர் பக்கத்தில் கருத்து தெரிவித்த அவர், '' வணக்கம் தமிழ்நாடு உங்ககூட இனி கிரிக்கெட் ஆட போறது ரொம்ப சந்தோஷம் உங்க மண்ணு இனி என்னை வைக்கணும் சிங்கமுன்னு" என்று தமிழ் மொழியில் பதிவிட்டிருந்தார்.

ஹர்பஜனின் இந்த தமிழ் ட்வீட்டை கொண்டாடிய கிரிக்கெட் ரசிகர்கள் இப்போது வரை சுமார் 12,414 பேரால் ரீட்வீட் செய்யப்பட்டுள்ளது. சுமார் 50 ஆயிரத்திற்கும் மேற்பட்ட லைக்குகளும் குவிந்துள்ளது.

அடுத்ததாக கடந்த மார்ச் மாதம் 22 ஆம் தேதி ஹர்பஜன் சிங், நான் வந்துட்டேன்னு சொல்லு, தமிழின் அன்பு உடன்பெறப்பெல்லாம் எப்புடி இருக்கீக மக்கா. உங்க வீட்டுப்புள்ள சேப்பாக்கத்துல, மஞ்ச ஜெர்சில, "வீரமா", காதுகிழியிற உங்க விசிலுக்கு நடுவுல @ChennaiIPL க்காக விளாட(ச) போறத நெனச்சாலே "மெர்சலாகுது''. தாய் உள்ளம் கொண்ட அன்பு தமிழ்நாடு வாழ்க என்று பதிவிட்டிருந்தார். அஜித் ரசிகர்களையும், விஜய் ரசிகர்களையும் குறிவைத்து இந்த ட்வீட்டை ஹர்பஜனுக்காக தயார் செய்துள்ளார் தமிழகத்தை சேரந்த சரவணன் பாண்டியன். இவர்தான் ஹர்பஜனின் தமிழ் குரு.

ஒருபுறம் ஹர்பஜன் சிங்கின் தமிழ் ட்வீட்கள் தமிழ் கிரிக்கெட் ரசிகர்கள் மத்தியில் வரவேற்பை பெற்றாலும், மறுபுறம் அவரது ட்வீட்களை வைத்து மீம் கிரியேட்டர்கள் அதகளம் செய்து வருகிறார்கள்.

''தமிழ்நாட்டுக்கு வருகை தந்த நாளில் இருந்து தமிழ் மக்கள் என் மேல் காட்டும் அளவு கடந்த பாசமும், நேசமும் என்னை வியக்கவைக்கிறது உங்கள் வீட்டு பிள்ளையாக என்னை ஏற்று கொண்டமைக்கு நன்றி. அன்பால் என்னை ஆட்கொண்ட தமிழ்நாடே. இந்த பந்தம் தொட்டு தொடரும் ஒரு பட்டு பாரம்பரியமாக தொடரட்டும்.'' இது ஹர்பஜனின் சமீபத்திய ட்வீட்.

இணையத்தில் பரபரப்பாக பகிரப்பட்டு வரும் சில மீம்களை இங்கே தொகுத்து வழங்கியுள்ளோம்.

பிற செய்திகள்:

சமூக ஊடகங்களில் பிபிசி தமிழ் :