ஜென் Z, ஜென் ஆல்பா தலைமுறையினர் பயன்படுத்தும் வார்த்தைகள் எங்கிருந்து வந்தன?

ஜென் Z மற்றும் ஜென் ஆல்பா தலைமுறைகளைச் சேர்ந்த இளைஞர்கள் பேசும்போது பெரும்பாலும் வெவ்வேறு புதிய வார்த்தைகளையும், சொல் அல்லது வாக்கியத்தின் சுருக்கத்தையும் பயன்படுத்துகின்றனர். இந்த வார்த்தைகளை சமூக ஊடகங்களிலும் காணலாம் மற்றும் கேட்கலாம். இந்த வார்த்தைகள் எங்கிருந்து வந்தன? மொழியில் இந்த மாற்றங்கள் எப்போது, எப்படி ஏற்பட்டன?

ஆக்ஸ்போர்டு பல்கலைக்கழக அச்சகத்தின் 2023 ஆம் ஆண்டிற்கான வார்த்தையாக 'rizz' என்ற வார்த்தை தேர்வானது. Charisma என்ற வார்த்தையின் குறுகிய வடிவமே rizz என்ற இந்த வார்த்தை. இதன் பொருள் கவர்தல் என்பதாகும்.

2024 ஆம் ஆண்டில், மெரியம் வெப்ஸ்டர் அகராதியில் புதிதாக 200 வார்த்தைகள் சேர்க்கப்பட்டன. இவற்றில் பெரும்பாலானவை ஜென் Z மற்றும் ஜென் ஆல்பா தலைமுறையினர் பயன்படுத்தும் வார்த்தைகள் ஆகும்.

1997 முதல் 2012 வரையிலான காலகட்டத்திற்குள் பிறந்தவர்கள் ஜென் Z என்றும், 2013 மற்றும் 2024 வரையிலான காலகட்டத்திற்குள் பிறந்தவர்கள் ஜென் ஆல்பா என்றும் அழைக்கப்படுகின்றனர்.

இணையத்தின் வளர்ச்சி உச்சத்தில் இருந்த காலத்தில் ஜென் Z தலைமுறை வளர்ந்தது, இந்தத் தலைமுறைக்கு மொபைல் ஃபோன்கள் மற்றும் சமூக ஊடகங்கள் இல்லாத ஒரு உலகம் தெரியாது.

பாரிய அளவில் இணையம் பயன்படுத்தப்பட்ட காலத்தில் பிறந்து வளர்ந்தவர்களே ஜென் ஆல்பா தலைமுறையினர். இந்தத் தலைமுறையினரிடமிருந்து தற்போது வெவ்வேறு புதிய வார்த்தைகளைக் கேட்டு வருகிறோம்.

இவர்கள் பயன்படுத்தும் இந்த வார்த்தைகள் எழுத்து வடிவை விட பேசும்போதே அதிகம் பயன்படுத்தப்படுகின்றன. ஒவ்வொரு தலைமுறைக்கும் அவர்களுக்கென தனித்துவமான வார்த்தைகள் இருக்கின்றன.

அப்படியானால் இப்போது பயன்பாட்டில் உள்ள இந்த வார்த்தைகள் அனைத்தும் புதிதானவையா? இல்லை. இந்த வார்த்தைகளில் சில பழையவை, அவை மீண்டும் பயன்படுத்தப்படுகின்றன. ஆனால் அவற்றின் அர்த்தங்கள் மாறிக்கொண்டே இருக்கின்றன.

முன்பு, சில வார்த்தைகள் குறிப்பிட்ட சில மக்களும், சமூகங்களும் மட்டுமே பயன்படுத்த வரையறுக்கப்பட்டன. அவை தற்போது அனைவராலும் பயன்படுத்தப்படுகின்றன.

ஜென் Z மற்றும் ஜென் ஆல்பா பயன்படுத்தும் வார்த்தைகள்

ஜென் Z பயன்படுத்தப்படும் பல வார்த்தைகள் ஆப்பிரிக்க-அமெரிக்க மக்கள் மற்றும் பால்புதுமையினர் சமூகங்களிலிருந்து வந்தவை. slay, tea, we be wilding, yas queen, slaps, lowkey இது போன்ற வார்த்தைகள் பல ஆண்டுகளாக பயன்பாட்டில் இருந்தவை.

Rizz என்ற வார்த்தையை முதன்முதலில் கா செனாட் (Kai Cenat) என்ற யூடியூபர் பயன்படுத்தியதாகக் கூறப்படுகிறது. பின்னர் இந்த வார்த்தை 2022 ஆம் ஆண்டு பிரபலமானதால் 2023 ஆம் ஆண்டிற்கான வார்த்தையாக அது தேர்ந்தெடுக்கப்பட்டது.

ஒரு நபர் மீது திடீரென ஏற்படும் வெறுப்பு உணர்வை வெளிப்படுத்த 'ick' என்ற வார்த்தை பயன்படுத்தப்படுகிறது. இந்த வார்த்தை உளவியலில் இருந்து வந்தது. ஆனால் ஜென் Z தலைமுறை இதனை பிரபலமாக்கியது.

இன்ஸ்டாகிராமில் 'Understood the Assignment' என்ற வாக்கியத்தை பல ரீல்களில் நீங்கள் பார்த்திருப்பீர்கள். இதன் பொருள் ஒரு நபர் எதிர்பார்த்ததை விட ஒரு வேலையை சரியாக செய்துள்ளார் என்பதாகும். இந்த வரி அமெரிக்க ராப்பர் டே மனியின் 'தி அசைன்மென்ட்' பாடலில் இருந்து வந்தது.

'Sus' என்ற வார்த்தை 'Suspicious' என்பதன் குறுகிய வடிவம் ஆகும். இந்த வார்த்தை அதே பொருளில்தான் பயன்படுத்தப்படுகின்றது. இந்த வார்த்தை 'அமாங் அஸ்' என்ற ஆன்லைன் விளையாட்டின் காரணமாக பிரபலமானது.

'No Cap' என்ற வார்த்தை நான் பொய் சொல்ல மாட்டேன், தொப்பி அணிய மாட்டேன் என்ற பொருளில் பயன்படுத்தப்படுகிறது. இந்த சொல் ஆப்பிரிக்க-அமெரிக்க சமூகத்திலிருந்தும், தொப்பிகளை அணியும் ஹிப்-ஹாப் சமூகத்திலிருந்தும் வருகிறது.

குறுகிய வடிவங்களாக மாறிய வார்த்தைகள்

சில வார்த்தைகள் புதிய வார்த்தைகளின் உருவாக்கத்தின்போது குறுகிய வடிவங்களாக மாறின.

Laugh Out Loud என்ற வார்த்தையின் சுருக்கமே LOL. முந்தைய தலைமுறையினர் இதை கூறுஞ்செய்திகளில் மட்டுமே பயன்படுத்தினர். ஆனால் தற்போதைய தலைமுறை அதை உரையாடலிலும் பயன்படுத்த தொடங்கியது.

வேறு சில வார்த்தைகளின் குறுகிய வடிவங்களும் பிரபலமடைந்தன.

GOAT - Greatest Of All Times

Delulu - Delusional

OOTD - Outfit Of The Day

IRL - In Real Life

NGL - Not Gonna Lie / Not Going to Lie

NMH - Nodding My Head

இணையம், சமூக ஊடகங்கள் மற்றும் இளைஞர்கள் மீதான அதன் விளைவுகள் குறித்து ஆய்வு செய்யும் முக்தா சைதன்யா, பல்வேறு வயது நபர்களுடன் தொடர்ந்து தொடர்பு கொள்கிறார்.

இந்த இளம் தலைமுறையினர் பயன்படுத்தும் மொழியைப் பற்றி அவர் பேசுகையில், "இந்த ஜென் Z பயன்படுத்தும் மொழி கேலிக்குரியது, அவை ஆன்லைன் மீம்ஸ்களில் இருந்து வருகின்றன. ஆனால் இது திடீரென்று தோன்றவில்லை என்பதைக் கவனத்தில் கொள்ள வேண்டும். டிஜிட்டல் மயமாக்கலுக்குப் பிறகு பல வார்த்தைகள் உருவாக்கப்பட்டது", என்றார்.

"பட்டன் தொலைபேசிகளில் நாம் அனைவரும் குறுஞ்செய்திகள் அனுப்பத் தொடங்கியபோது இந்த மாற்றம் நிகழத் தொடங்கியது. ஆரம்பத்திலேயே ஆங்கில மொழியில் சொற்களைச் சுருக்கி, அவற்றை குறுகிய வடிவங்களாக மாற்றும் முறையுடன் இது தொடங்கியது. பின்னர் மெதுவாக, காலம் மாறும்போது, தலைமுறைகளும் மாறின, ஆன்லைன் உலகின் மொழியும் மாறியது".

தலைமுறைகளுக்கு இடையே மொழியில் ஏற்படும் மாற்றங்கள்

ஒவ்வொரு தலைமுறைக்கும் ஏற்ப மொழியில் மாற்றங்கள் ஏற்படுகின்றன. மேலும் வெவ்வேறு மொழிகளிலிருந்து வரும் வார்த்தைகள், அந்தக் காலத்தின் சூழலைப் பொறுத்து, ஆங்கில மொழியிலும் இடம் பெறுகின்றன.

உதாரணமாக ஹிந்தி மொழி சொற்களான ஜுகாட், தாதாகிரி, அச்சா ஆகிய சொற்கள் இப்போது ஆங்கில அகராதியில் உள்ளன.

ஆனால், ஆங்கில மொழியில் இது எவ்வாறு மாற்றம் ஏற்படுத்துகிறது?

"ஜென் Z தலைமுறையினர் பெரும்பாலும் ஆங்கில மொழியே பயன்படுத்துகின்றனர். இந்தத் தலைமுறை முழுவதும் யூடியூப்பைப் பார்த்து வளர்ந்தவர்கள். எனவே யூடியூபர்கள் பேசும் விதம் அவர்கள் மீதும் அவர்களின் மொழியின் மீதும் தாக்கத்தை ஏற்படுத்துகிறது", என்று முக்தா சைதன்யா கூறுகிறார்.

"உலகம் முழுவதும் ஆங்கில மொழி மேலும் மேலும் அனைவராலும் புரிந்துகொள்ளக்கூடியதாக மாறிவிட்டதாக பலர் கூறுகின்றனர். இந்த இளம் தலைமுறையினருக்கு அதிக அளவில் வெளி உலகைப்பற்றிய புரிதல் இருப்பதால், உலகின் வெவ்வேறு இடத்தில் பேசப்படும் மொழிகளின் உச்சரிப்புகள் இந்த தலைமுறையினரிடமும் சென்றடைகின்றன".

இணையத்தால் உலகத்தை அறிந்துகொள்வது மிகவும் எளிதானது. தற்போதைய இளம் தலைமுறையினர் பயன்படுத்தும் இந்த மொழி ஓரளவு அனைவரையும் உள்ளடக்கியது. முன்பு குறிப்பிட்ட ஒரு மக்களால் மட்டுமே பயன்படுத்தப்பட்ட வார்த்தைகள் இப்போது அனைவராலும் பயன்படுத்தப்படுகின்றன.

ஆனால் ஜென் ஆல்பா தலைமுறையினர் வார்த்தைக்கு பின்பும் 'ing'-ஐ சேர்ப்பதன் மூலம் வாக்கியங்களை உருவாக்கியதால், அது இலக்கண ரீதியிலான குழப்பத்தை உருவாக்கியது. உதாரணமாக Hair is not hairing என்பது ஒரு தலைமுறைக்கு அர்த்தமுள்ள ஒரு முழுமையான வாக்கியம். ஆனால் மற்றவர்களுக்கு, இந்த வாக்கியத்திற்கு இலக்கண ரீதியாக பொருள் இல்லை.

இது தற்போதைய தலைமுறை இலக்கண விதிகளை மீறுவதாக அதிருப்தியை மட்டுமே தருகிறது. (Hair is not hairing என்பதன் பொருள் இன்று என் தலைமுடி நன்றாக இல்லை, அது ஒழுங்காக பொருந்தவில்லை என்பதாகும்)

உலகெங்கிலும் உள்ள இளைஞர்கள் ஒரே மாதிரியான வார்த்தைகளை எவ்வாறு பயன்படுத்துகிறார்கள்?

உலகெங்கிலும் உள்ள பல்வேறு நாடுகளைச் சேர்ந்த ஆங்கிலம் பேசும் தலைமுறையினர் எப்படி ஒரே மாதிரியான வார்த்தைகளை பயன்படுத்த தொடங்கினர்? இதற்கான பதில் இணையம் ஆகும்.

பல்வேறு சமூக ஊடகங்களில் உள்ள வீடியோ பதிவுகளை பார்க்கும் இந்த இளம் தலைமுறை, வீடியோக்களை உருவாக்கும் நபர்கள், சமூக ஊடக பிரபலங்கள் ஆகியோர் என்ன சொல்கிறார்கள், எப்படிச் சொல்கிறார்கள், என்ன வார்த்தைகளைப் பயன்படுத்துகிறார்கள் என்பதை அவர்களும் பின்பற்றுகிறார்கள்.

அதனால்தான் பல நிறுவனங்கள், தங்களது தயாரிப்புகளை விளம்பரப்படுத்த சமூக ஊடக பிரபலங்களை சார்ந்து உள்ளனர். இவர்கள் ஒரு வார்த்தையைப் பயன்படுத்தினால், அது உலகம் முழுவதும் உள்ள அவர்களை பின்தொடர்பவர்களிடம் (followers) சென்று சேர்கின்றது.

ஓர் அறிக்கையின்படி, 2025 ஆம் ஆண்டில் வேலை செய்யும் மக்கள்தொகையில் 27 சதவீதம் பேர் ஜென் Z தலைமுறையை சேர்ந்தவர்களாக இருப்பார்கள். எனவே தொழில்முறை தகவல்தொடர்புகளிலும் இந்த இளம் தலைமுறையினரின் மொழி நடை தாக்கத்தை ஏற்படுத்தக்கூடும்.

மொழியில் ஏற்படும் மாற்றங்கள்

மொழியின் போக்குகள் அக்கால சூழ்நிலையைப் பிரதிபலிக்கின்றன. உதாரணமாக, Brain Rot என்ற வார்த்தை முதன்முதலில் 1854 இல் வால்டன் என்ற நூலை எழுதிய ஹென்றி டேவிட் தாரோ பயன்படுத்தப்பட்டது.

ப்ரெயின் ராட் ( Brain Rot) என்பது சமூக ஊடகங்களில் பயனற்ற ஆன்லைன் உள்ளடக்கங்களை பார்க்க நேரம் செலவிடுவதால் ஏற்படும் விளைவை குறிப்பிடும் ஒரு வார்த்தை. இந்த வார்த்தையின் பயன்பாடு 2023 மற்றும் 2024 க்கு இடையில் 230% அதிகரித்துள்ளது.

Avatar, Sus போன்ற வார்த்தைகள் வாழ்க்கையில் ஆன்லைன் விளையாட்டுகளின் தாக்கத்தைக் காட்டுகின்றன. Manifest, Bae போன்ற பல வார்த்தைகள் சமூக ஊடகங்களின் தாக்கத்தைக் காட்டுகின்றன. ஏனென்றால் இந்த சமூக ஊடகங்களில்தான் இந்த இளம் தலைமுறையினர் இந்த வார்த்தைகளைப் பயன்படுத்தி தங்களை வெளிப்படுத்திக் கொள்கின்றனர். இது மொழியின் சீர்குலைவா? "நான் அப்படி நினைக்கவில்லை. ஏனென்றால் மொழி என்பது எப்போதும் மாறிக்கொண்டே இருக்க வேண்டும். அது மாறினால் மட்டுமே, அது உயிருடன் இருக்கும். இல்லையெனில், மொழி இறந்துவிடும்" என்று முக்த சைதன்யா கூறுகிறார்.

- இது, பிபிசிக்காக கலெக்டிவ் நியூஸ்ரூம் வெளியீடு.

(சமூக ஊடகங்களில் பிபிசி தமிழ் ஃபேஸ்புக், இன்ஸ்டாகிராம், எக்ஸ் (டிவிட்டர்) மற்றும் யூட்யூப் பக்கங்கள் மூலம் எங்களுடன் இணைந்திருங்கள்.)