டி20 உலகக் கோப்பை: இந்தியாவுக்கு எதிராக தென்னாப்பிரிக்க அணி 76 ரன் வித்தியாசத்தில் வெற்றி

டி20 உலகக் கோப்பையின் சூப்பர் 8 போட்டியில் தென்னாப்பிரிக்கா நிர்ணயித்த 188 ரன்கள் என்ற இலக்கை துரத்திய இந்தியா, 111 ரன்களுக்கு அனைத்து விக்கெட்டுகளை இழந்தது. ரன் அடிப்படையில், இதுதான் டி20 கிரிக்கெட்டில் இந்தியாவின் இரண்டாவது பெரிய தோல்வி

15வது ஓவரில், கேசவ் மகாராஜ் ஹார்டிக் பாண்ட்யா, ரிங்கு சிங் மற்றும் அர்ஷ்தீப் சிங் ஆகியோரின் விக்கெட்டுகளை வீழ்த்தினார்.

ஹர்திக் பாண்ட்யா, ஷிவம் துபே சேர்ந்து இந்திய இன்னிங்ஸை நிலைப்படுத்த முயன்றனர். இருப்பினும், அவர்களின் பார்ட்னர்ஷிப் 18 ரன்களுக்கு மேல் முன்னேறத் தவறியது. ரிங்கு சிங் இரண்டு பந்துகளில் டக்-அவுட்டாகி அவுட் ஆனார்.

முன்னதாக கேப்டன் சூர்யகுமார் யாதவ் 22 பந்துகளில் 18 ரன்கள் மட்டுமே எடுத்தார். போஷ் அவரது விக்கெட்டை வீழ்த்தினார்.

ஐந்தாவது இடத்தில் வாஷிங்டன் சுந்தரை அனுப்பிய இந்தியாவின் நடவடிக்கை பின்னடைவை ஏற்படுத்தியது, அவர் வெறும் 11 ரன்களில் ஆட்டமிழந்தார். எதிர்பார்க்கப்பட்ட அபிஷேக் சர்மா 15 ரன்களில் ஆட்டமிழந்தார்.

முன்னதாக, இந்திய தொடக்க வீரர் இஷான் கிஷான் முதல் ஓவரின் நான்காவது பந்தில் டக்-அவுட்டாகி அவுட் ஆனார். அவரது விக்கெட்டை தென்னாப்பிரிக்க கேப்டன் மார்க்ராம் வீழ்த்தினார்.

பின்னர், இரண்டாவது ஓவரின் முதல் பந்தில் திலக் வர்மா ஒரு சிங்கிள் ரன் எடுத்து ஆட்டமிழந்தார். அவரது விக்கெட்டை யான்சன் வீழ்த்தினார்.

முன்னதாக தென்னாப்பிரிக்கா கேப்டன் ஐடன் மார்க்ராம் டாஸ் வென்று முதலில் பேட்டிங் செய்ய முடிவு செய்தார்.

தென்னாப்பிரிக்க அணிக்கு தொடக்கமே சவாலாக அமைந்தது. பவர் பிளேக்குள்ளாகவே 3 விக்கெட்டுகள் இழந்த அந்த அணி 41 ரன்கள் மட்டுமே எடுத்தது. பவர்பிளேவில் அர்ஷ்தீப் சிங் 1 விக்கெட்டும், பும்ரா 2 விக்கெட்டுகளும் வீழ்த்தினர்.

அதன்பிறகு டெவால் பிரெவிஸ், டேவிட் மில்லர் கூட்டணி சிறப்பாக விளையாடியது. இருவரும் விக்கெட் வீழ்ச்சியைத் தடுத்ததோடு அதிரடியாகவும் விளையாடினார்கள்.

பிரெவிஸ் 45 ரன்கள் எடுத்து ஷிவம் துபே பந்துவீச்சில் ஆட்டமிழந்தார். அதிரடியாக ஆடிய டேவிட் மில்லர், 26 பந்துகளில் அரைசதம் கடந்தார். அவர் 63 ரன்கள் எடுத்து வருண் சக்கரவர்த்தி பந்துவீச்சில் அவுட் ஆனார்.

மில்லர் அவுட் ஆனதன் பிறகு தென்னாப்பிரிக்க அணியின் ரன்ரேட் வெகுவாகக் குறைந்தது. கடைசி கட்டத்தில் அர்ஷ்தீப், பும்ரா இருவரும் மிகவும் சிக்கனமாகப் பந்துவீசி தென்னாப்பிரிக்க பேட்டர்களுக்கு நெருக்கடி ஏற்படுத்தினார்கள்.

17-வது ஓவரை வீசிய பும்ரா அந்த ஓவரில் 5 ரன்கள் மட்டுமே கொடுத்தார். அடுத்த ஓவரில் அர்ஷ்தீப் 7 ரன்கள் மட்டும் கொடுத்து 1 விக்கெட் வீழ்த்தினார். 19-வது ஓவரை வீசிய பும்ரா, 3 ரன்கள் மட்டும் கொடுத்து கார்பின் பாஷ் விக்கெட்டை வீழ்த்தினார். அதனால் தென்னாப்பிரிக்கா 167/7 என்ற நிலைக்குச் சென்றது.

ஆனால், ஹர்திக் பாண்டியா வீசிய கடைசி ஓவரில், 2 சிக்ஸர்கள், 1 பவுண்டரி உள்பட டிரிஸ்டன் ஸ்டப்ஸ் 20 ரன்கள் எடுத்தார். அதனால் தென்னாப்பிரிக்க அணி 187 ரன்கள் எடுத்தது. 24 பந்துகள் சந்தித்த ஸ்டப்ஸ், ஆட்டமிழக்காமல் 44 ரன்கள் எடுத்தார்.

இந்திய பௌலர்கள் தரப்பில் ஜஸ்ப்ரித் பும்ரா 4 ஓவர்களில் 15 ரன்கள் மட்டும் கொடுத்து 3 விக்கெட்டுகள் வீழ்த்தினார்.

துணைக் கேப்டன் அக்சர் பட்டேல் இல்லை

இரு அணிகளும் கடந்த உலகக் கோப்பையின் இறுதிப் போட்டியாளர்கள். தென்னாப்பிரிக்காவை வீழ்த்தி இந்தியா 2024 டி20 உலகக் கோப்பையை வென்றது.

முன்னதாக இன்றைய போட்டியில் துணை கேப்டன் அக்சர் பட்டேல் விளையாட மாட்டார் என கேப்டன் சூர்யகுமார் யாதவ் தெரிவித்தார்.

"தென்னாப்பிரிக்க அணியில் டி காக், ரிக்கில்டன், மில்லர், யான்சன் என நிறைய இடது கை பேட்டர்கள் இருப்பதால் ஆஃப் ஸ்பின்னர் வாஷிங்டன் சுந்தரை இந்திய அணி தேர்வு செய்திருக்கிறது. அதனால் அக்சர் பட்டேலுக்கு இந்தப் போட்டியில் வாய்ப்பு கிடைக்கவில்லை" என்று ஸ்டார் ஸ்போர்ட்ஸ் நிகழ்ச்சியில் பேசிய இந்திய அணியின் முன்னாள் துணைப் பயிற்சியாளர் அபிஷேக் நாயர் தெரிவித்தார்.

தென்னாப்பிரிக்க அணியில் லுங்கி நிகிடி, மார்கோ ஜான்சன், கேஷவ் மகாராஜ், டேவிட் மில்லர் ஆகியோர் கடந்த போட்டியில் ஓய்வெடுத்திருந்த நிலையில் மீண்டும் அணியில் சேர்ந்தனர். தனது ஒரே போட்டியில் இரண்டு விக்கெட்டுகளை எடுத்த எய்ன்ரிக் நார்கியா இடம்பெறவில்லை. ரபாடா தனது இடத்தைத் தக்க வைத்துக் கொண்டார்.

இந்திய அணியின் பிளேயிங் லெவனில் இடம்பெற்றவர்கள்:

அபிஷேக் சர்மா

இஷான் கிஷன் (விக்கெட் கீப்பர்)

திலக் வர்மா

சூர்யகுமார் யாதவ் (கேப்டன்)

ஹர்திக் பாண்ட்யா

ரிங்கு சிங்

சிவம் துபே

வாஷிங்டன் சுந்தர்

அர்ஷ்தீப் சிங்

ஜஸ்பிரித் பும்ரா

வருண் சக்கரவர்த்தி

இது, பிபிசிக்காக கலெக்டிவ் நியூஸ்ரூம் வெளியீடு