மேற்கு வங்கத்தில் மமதா பானர்ஜி தோற்க எஸ்ஐஆர் ஒரு காரணமா? 5 விஷயங்கள்

மேற்கு வங்கத்தில் பாரதிய ஜனதா கட்சி முதல்முறையாக ஆட்சியைப் பிடித்துள்ளது, அங்கு மூன்றில் இரண்டு பங்கு பெரும்பான்மையை அக்கட்சி பெற்றுள்ளது.

பாஜக 206 இடங்களை வென்ற நிலையில், திரிணாமுல் காங்கிரஸ் கட்சியால் 80 இடங்களை மட்டுமே வெல்ல முடிந்தது.

முதலமைச்சர் மமதா பானர்ஜி தனது பவானிபூர் தொகுதியில் பாஜக மூத்த தலைவர் சுவேந்து அதிகாரியிடம் 15,000-க்கும் அதிகமான வாக்குகள் வித்தியாசத்தில் தோல்வியடைந்தார். வாக்கு எண்ணிக்கைக்கு முன்பே, பாஜக "வாக்குத் திருட்டில்" ஈடுபட்டதாக அவர் குற்றம் சாட்டியிருந்தார்.

அவர் செய்தியாளர்களிடம் கூறுகையில், "பாஜக 100-க்கும் மேற்பட்ட இடங்களைத் திருடியுள்ளது. பாஜகவின் வெற்றி அறத்துக்கு முரணானது. பிரதமருடனும் உள்துறை அமைச்சருடனும் இணைந்து தேர்தல் ஆணையம் செய்திருப்பது முற்றிலும் அறநெறிக்கு முரணானது" என்றார்.

வாக்காளர் சிறப்புத் தீவிர திருத்தம் வலுக்கட்டாயமாக கையாளப்பட்டதாக அவர் குற்றம் சாட்டியதுடன், "அவர்கள் அட்டூழியம் செய்தனர். அவர்கள் வாக்கு எண்ணும் முகவர்களைக் கைது செய்தனர். நாங்கள் மீண்டும் போராடுவோம்" என்றும் கூறினார்.

தொடர்ந்து பதினைந்து ஆண்டுகள் ஆட்சியில் இருந்த பிறகு, திரிணாமுல் காங்கிரஸ் அடைந்துள்ள இந்த தோல்விக்கான காரணம் என்னவாக இருக்கும் என்பது குறித்து பல விவாதங்கள் நடைபெற்று வருகின்றன.

இதுவரையிலான முடிவுகள் மற்றும் போக்குகளின் அடிப்படையில், இந்தத் தோல்விக்குப் பின்னால் ஐந்து முக்கிய காரணங்கள் இருக்கலாம் எனக் கருதப்படுகிறது.

1. பெண்களின் பாதுகாப்பு குறித்த கேள்வி

மேற்கு வங்கத்தில்பெண் வாக்காளர்களில் பெரும்பகுதியினர் நீண்ட காலமாக மமதா பானர்ஜியின் கட்சியை ஆதரித்து வந்தனர் என்பதில் சிறிதும் சந்தேகமில்லை.

பள்ளி மாணவிகளுக்கு மிதிவண்டிகள் வழங்கும் திட்டம் உள்ளிட்ட லட்சுமிருத பந்தர், கன்யாஸ்ரீ மற்றும் சபுஜ் சதி போன்ற திட்டங்கள், திரிணாமுல் அரசைப் பெண்கள் மத்தியில் மிகவும் பிரபலமாக்கியிருந்தன.

ஆனால் இந்த முறை, இந்த ஆதரவுத் தளம் சரிந்துள்ளதாகத் தோன்றுகிறது. பெண்களின் பாதுகாப்பு போன்ற பிரச்னைகளைக் கையாள்வதில் கட்சி தோல்வியடைந்துவிட்டதாகக் கருதப்படுவதே இதற்கு ஒரு முக்கிய காரணமாக இருக்கலாம்.

இரண்டு ஆண்டுகளுக்கு முன்பு நடந்த ஆர்.ஜி. கர் போராட்டம் இந்தத் தேர்தலில் தாக்கத்தை ஏற்படுத்தியதாகத் தெரிகிறது. பாரம்பரியமாக திரிணாமுல் காங்கிரஸின் கோட்டையாகக் கருதப்படும் பனிஹாட்டி இதற்கு ஒரு சிறந்த உதாரணம்.

அங்கே, ஆர்.ஜி. கர் வழக்கில் பாதிக்கப்பட்ட பெண்ணின் தாய் பாஜக சார்பில் போட்டியிட்டு 28,836 வாக்குகள் வித்தியாசத்தில் வெற்றி பெற்றார்.

மேற்கு வங்கத்தில் செய்தி சேகரித்துக் கொண்டிருந்த பிபிசி செய்தியாளர்களிடம், பாதுகாப்பு போன்ற பிரச்னைகள் குறித்து சில பெண்களும் பேசினர்.

தேர்தல் பிரசாரத்தின் போது, திரிணாமுல் அரசு மீண்டும் ஆட்சிக்கு வருவது குறித்த கேள்விக்கு ஒரு பெண் பதிலளிக்கையில், "இனி நாம் பாதுகாப்பாக இருப்போமா? அதுதான் பயமாக உள்ளது. எனது சகோதரர்களின் கருத்தை நான் ஒப்புக்கொள்கிறேன். எனக்கு வேறு எதுவும் சொல்வதற்கில்லை. பெண்களுக்கு மரியாதை மிஞ்சாது. முற்றிலும் இருக்காது. அவர்கள் எங்களை சிதறடித்துவிடுவார்கள் . இல்லையெனில், அவர்கள் வெற்றி பெற்றால் தான் அபயாவுக்கு நீதி கிடைக்கும் என்று நாம் ஏன் நினைக்க வேண்டும்? மாநிலம் இப்போது இந்த நிலையை எட்டிவிட்டதா? அவர்கள் நமக்கு என்ன செய்வார்கள் என்று உங்களால் கற்பனை செய்ய முடிகிறதா?" என்றார்.

ஒன்றரை வாரத்திற்கு முன்பு, பிபிசி செய்தியாளர் இஷாத்ரிதா கொல்கத்தாவில் பெண்களின் பாதுகாப்பு குறித்து பெண்களிடம் பேசினார்.

கொல்கத்தாவில் ஒரு பெண்ணாக நீங்கள் பாதுகாப்பாக உணர்கிறீர்களா என்று கேட்டதற்கு, ஒரு பெண், "ஆர்.ஜி. கர் சம்பவத்திற்குப் பிறகு, நான் என்னுடன் சில பாதுகாப்பு உபகரணங்களை வைத்திருக்கிறேன்" என்று கூறினார்.

மற்றொரு இளம்பெண் கூறுகையில், "சில இடங்கள் பாதுகாப்பற்றதாகத் உணரவைக்கின்றன. குறிப்பாக இரவு 9-10 மணிக்குப் பிறகு மிகவும் பாதுகாப்பற்றதாக உணர்கிறேன்" என்றார்.

2. வாக்காளர் சிறப்புத் தீவிர திருத்தம் ஒரு முக்கிய காரணமாக அமைந்ததா?

வாக்காளர் பட்டியல் திருத்தச் செயல்முறையின் (SIR) போது 90 லட்சத்திற்கும் அதிகமான பெயர்கள் நீக்கப்பட்டன, இதனால் திரிணாமுல் காங்கிரஸ் தான் பெரும் பாதிப்பைச் சந்தித்துள்ளது என்பது இப்போது தெளிவாகத் தெரிகிறது.

தகுதியுள்ள பல வாக்காளர்களின் பெயர்களும் இந்தப் பட்டியலிலிருந்து நீக்கப்பட்டது உண்மைதான் என்றாலும், பெருமளவிலான போலி அல்லது உயிரிழந்த வாக்காளர்களின் பெயர்களும் நீக்கப்பட்டன என்பதில் சந்தேகமில்லை.

தேர்தல்களில் இத்தகைய முறைகேடுகள் மூலம் திரிணாமுல் காங்கிரஸ் பல ஆண்டுகளாகப் பயனடைந்து வருவதாகவும், இப்போது அந்தச் சாதகமான நிலை குறையும் என்றும் பாஜக தொடர்ந்து கூறி வந்தது.

இந்தக் கூற்றில் பெருமளவு உண்மை இருப்பதாக தற்போதைய போக்குகள் காட்டுகின்றன.

கொல்கத்தாவில் உள்ள பிரசிடென்சி பல்கலைக்கழகத்தில் அரசியல் அறிவியல் பேராசிரியராகப் பணியாற்றும் ஜெட் மன்ஹூட் கூறுகையில், "திரிணாமுல் காங்கிரஸ் ஊழலையும் சிண்டிகேட் கலாசாரத்தையும் நமது வாழ்வின் ஒரு அங்கமாக மாற்றிவிட்டது. அக்கட்சிக்கு எதிராக என்னென்ன காரணிகள் செயல்பட்டன என்பதை நாம் பார்க்க வேண்டும்" என்றார்.

"ஆனால், மக்கள் தொகையில் 30 சதவீதத்தினரைத் தேர்தல் செயல்முறையிலிருந்து ஒதுக்கி வைத்துவிட்டு கூட தன்னால் வெற்றி பெற முடியும் என்பதை பாஜக நிரூபித்துள்ளது. இது மேற்கு வங்க அரசியலில் எவ்வளவு பெரிய தாக்கத்தை ஏற்படுத்தும் என்பதைப் பொறுத்திருந்துதான் பார்க்க வேண்டும்" என்றும் அவர் கூறினார்.

அரசியல் ஆய்வாளர் யோகேந்திர யாதவும், இந்தத் தேர்தல் முடிவுகளில் காணப்படும் மாற்றத்திற்கு முக்கியக் காரணமாக எஸ்.ஐ.ஆரை குறிப்பிடுகிறார்.

தேர்தல் முடிவுகளின் நிலவரம் தெளிவான பிறகு, பிபிசியிடம் பேசிய அவர், "பாஜக அதிக இடங்களைப் பெற்றது போல் தோன்றலாம், ஆனால் வாக்கு விகிதத்தில் மூன்று சதவீத இடைவெளி மட்டுமே உள்ளது" என்றார்.

"மக்கள் தொகையில் 4.3 சதவீதத்தினர் வாக்களிக்க அனுமதிக்கப்பட்டிருந்தால், அவர்களில் பெரும்பாலானோர் இஸ்லாமியர்கள் என்பதை நாம் அறிவோம். இஸ்லாமியர் அல்லாதவர்களிலும் பலர் திரிணாமூல் கட்சியின் வாக்காளர்களாக இருந்தனர்.

அப்படியென்றால், தேர்தல் முடிவு இப்படி இருந்திருக்குமா? நிச்சயமாக இருந்திருக்காது," என்றும் அவர் தெரிவித்தார்.

3. நிர்வாகத் தோல்வி

திரிணாமுல் காங்கிரஸின் பதினைந்து ஆண்டு கால ஆட்சியில் நிலவிய ஊழல், தவறான நிர்வாகம், கமிஷன் பெற்றதாகக் கூறப்படும் குற்றச்சாட்டுகள், சிண்டிகேட் கலாசாரத்தின் எழுச்சி மற்றும் நிர்வாகத் தோல்விகள் ஆகியவை மேற்கு வங்க அரசியல் வரலாற்றில் இதற்கு முன்பு இந்த அளவிற்கு முன்வைக்கப்பட்டதில்லை.

இருப்பினும், 2016 மற்றும் 2021-ல் கூட, வங்காள அடையாள அரசியல், பெண்களுக்கான நலத்திட்டங்கள் மற்றும் மத சார்பின்மை போன்ற விவகாரங்களை முன்னிறுத்தி இத்தகைய விமர்சனங்களை அக்கட்சி புறந்தள்ளியது.

இந்த முறை மமதா பானர்ஜி, வாக்காளர் சிறப்புத் தீவிர திருத்தச் செயல்முறையினால் மக்களுக்கு ஏற்பட்ட சிக்கல்களை ஒரு பெரிய அரசியல் பிரச்னையாக மாற்ற முயன்றார். அனைத்து வழிகளிலும் அதிலிருந்து அரசியல் ஆதாயம் பெற முயற்சி செய்தார்.

ஆனால், ஊழல் குற்றச்சாட்டுகள் மற்றும் நிர்வாகத் தோல்விகளுக்கு முன்னால் இந்த முயற்சி எடுபடவில்லை என்பது இப்போது தெரிகிறது.

4. இந்து வாக்குகளின் துருவமயமாக்கல்

மமதா பானர்ஜியின் தொடர்ச்சியான தேர்தல் வெற்றிகளுக்கு அந்த மாநிலத்தில் உள்ள இஸ்லாமிய சமூகத்தின் ஒருமித்த ஆதரவே முக்கிய காரணம் என்று அரசியல் ஆய்வாளர்கள் நீண்ட காலமாக கூறி வருகின்றனர்.

மேற்கு வங்க மக்கள் தொகையில் இஸ்லாமியர்கள் சுமார் 30 சதவீதம் உள்ளனர். வரலாற்று ரீதியாக, அவர்களின் வாக்குகளில் 85 முதல் 90 சதவீதம் திரிணாமுல் காங்கிரஸிற்கே கிடைத்துள்ளன.

இருப்பினும், இந்த முறை வாக்குகள் மத ரீதியாக இருதுருவமாகி இருப்பது பாஜகவிற்கு சாதகமாக அமைந்தது.

இஸ்லாமியர்கள் அதிகம் வசிக்கும் மால்டா மற்றும் முர்ஷிதாபாத் போன்ற மாவட்டங்களில் பாஜக முன்னிலை பெற்றுள்ளதிலும் அந்த தாக்கம் தெளிவாகத் தெரிகிறது.

இஸ்லாமியர்களைத் திருப்திப்படுத்தும் வகையிலான நடவடிக்கைகள் குறித்த குற்றச்சாட்டுகளுக்குப் பதிலளிக்கும் விதமாக, மமதா பானர்ஜி சமீபகாலமாக அரசாங்கச் செலவில் பல இந்து கோயில்களைக் கட்டியுள்ளார், அவற்றைப் பராமரித்தும் வருகிறார்.

இது இந்துத்துவத்தின் சற்று மிதமான வடிவத்தை முன்னிறுத்தும் முயற்சியாகப் பார்க்கப்பட்டது. இருப்பினும், இந்த உத்தி பலனளிக்கவில்லை. கணிசமான எண்ணிக்கையிலான இந்து வாக்காளர்கள் பாஜகவின் மிகவும் தீவிரமான சித்தாந்த நிலைப்பாட்டை நோக்கி நகர்வது போல் தெரிந்தது.

கொல்கத்தாவைச் சேர்ந்த மூத்த பத்திரிகையாளரும் அரசியல் ஆய்வாளருமான சுகாந்தா சர்க்கார் கூறுகையில், "இந்த முறை இந்து வாக்குகளின் துருவமுனைப்பு அதிகமாக இருந்தது" என்றார்.

இதுகுறித்து அவர் பேசுகையில், "மேற்கு வங்கத்தின் கிராமப்புறங்களில் இந்து வாக்குகளின் ஒருங்கிணைப்பு பெருமளவில் காணப்பட்டது. திரிணாமுல் காங்கிரஸ் வாக்காளர்கள் கூட பாஜகவை நோக்கி நகர்ந்தனர். இது பாஜகவின் வெற்றிக்கு முக்கிய காரணங்களில் ஒன்றாகும்" என்றார்.

மமதா பானர்ஜியை தோற்கடித்த பிறகு தனது முதல் கருத்தைப் பகிர்ந்த சுவேந்து அதிகாரி, "இது இந்துத்துவத்தின் வெற்றி. இந்த வெற்றி வங்கத்தின் வெற்றி. இந்த வெற்றி நரேந்திர மோதி ஜியின் வெற்றி," என்று கூறினார்.

இதுகுறித்து பேசிய அவர், "மார்க்சிஸ்ட் கம்யூனிஸ்ட் கட்சியின் தீவிர ஆதரவாளர்கள் அனைவரும் எனக்கு வாக்களித்தனர். பவானிபூரில் சிபிஎம்-மிற்கு 13,000 வாக்குகள் இருந்தன, அவற்றில் குறைந்தது 10,000 வாக்குகள் எனக்கு விழுந்தன. அங்குள்ள சிபிஎம் வாக்காளர்களுக்கு எனது நன்றியைத் தெரிவித்துக் கொள்கிறேன். அனைத்து பெங்காலி இந்துக்களும் எனக்கு வெளிப்படையாக வாக்களித்தனர். அவர்களுடன் குஜராத்தி, ஜெயின், மார்வாரி, பூர்வாஞ்சலி மற்றும் சீக்கிய சமூகத்தினரும் எனக்கு வெளிப்படையாக வாக்களித்தனர்," என்றார்.

5. முன்னெப்போதும் இல்லாத அளவில் மத்தியப் படைகளின் நடவடிக்கை

மமதா பானர்ஜியின் திரிணாமுல் காங்கிரஸும், பிற எதிர்க்கட்சிகளும் மத்தியப் படைகளை பாஜக தவறாகப் பயன்படுத்துவதாகக் குற்றம் சாட்டி வருகின்றன.

சமாஜ்வாதி கட்சித் தலைவரும், உத்தரப் பிரதேச முன்னாள் முதலமைச்சருமான அகிலேஷ் யாதவ், வாக்கு எண்ணிக்கையின் போது மத்தியப் படைகள் தவறாகப் பயன்படுத்தப்பட்டதாகக் குற்றம் சாட்டினார்.

இருப்பினும், மேற்கு வங்க அரசியலில், பாரம்பரியமாக ஆளுங்கட்சிக்குத் தேர்தலின் போது சில சாதகமான அம்சங்கள் கிடைப்பதாகச் சில ஆய்வாளர்கள் கருதுகின்றனர்.

ஆனால் இந்த முறை, திரிணாமுல் காங்கிரஸிற்கு அத்தகைய நன்மைகள் எதுவும் கிடைக்கவில்லை.

தேர்தல் அட்டவணை அறிவிக்கப்பட்ட உடனேயே, மாநில நிர்வாகத்தைத் தேர்தல் ஆணையம் தனது முழுக் கட்டுப்பாட்டிற்குள் கொண்டு வந்தது. காவல் கண்காணிப்பாளர்கள் மற்றும் அதிகாரிகள் பெருமளவில் இடமாற்றம் செய்யப்பட்டனர்.

இது தவிர, வாக்குப்பதிவு தொடங்குவதற்கு முன்பே மாநிலம் முழுவதும் 2 லட்சத்து 40 ஆயிரத்திற்கும் அதிகமான மத்தியப் பாதுகாப்புப் படை வீரர்கள் பணியமர்த்தப்பட்டனர், இது முன்னெப்போதும் இல்லாத ஒன்றாகக் கருதப்படுகிறது.

இவ்வளவு பெரிய பாதுகாப்பு ஏற்பாடுகளால், தேர்தல் மிகவும் அமைதியாக நடந்ததாகவும், வாக்காளர்கள் அச்சமோ அழுத்தமோ இன்றி வாக்களிக்க முடிந்ததாகவும் பல ஆய்வாளர்கள் நம்புகின்றனர்.

கடந்த ஒன்றரை மாதங்களாக, தேர்தல் ஆணையம் மற்றும் மத்தியப் படைகளின் செயல்பாடுகள் குறித்து திரிணாமுல் காங்கிரஸ் தொடர்ந்து கேள்விகளை எழுப்பி வந்தது.

இப்போது திரும்பிப் பார்க்கையில், இந்தப் புகார்களுக்கான காரணம் ஒருவேளை இன்னும் தெளிவாகப் புரியக்கூடும். வேறுவிதமாகக் கூறினால், இந்தத் தேர்தலில் தேர்தல் ஆணையம் மற்றும் மத்தியப் படைகளின் பங்கு திரிணாமுல் காங்கிரஸிற்கு எதிராக இருந்ததாகத் தெரிந்தது.

'மத்தியப் படைகளும் ஒட்டுமொத்த அரசு இயந்திரமும் (திரிணாமுல் காங்கிரஸைத் தோற்கடிப்பதில்) ஈடுபட்டுள்ளன' என்று ஏப்ரல் 29 அன்று மமதா பானர்ஜி குற்றம் சாட்டியிருந்தார்.

"ஏப்ரல் 26 அன்று, தான் கொல்கத்தா விமான நிலையத்திற்குச் சென்று கொண்டிருந்தபோது, மத்தியப் படைகள் தனது காரைச் சோதனையிட முயன்றதாக மமதா பானர்ஜி குற்றம் சாட்டினார்"என கொல்கத்தாவைச் சேர்ந்த டெலிகிராப் நாளிதழில் வெளியான செய்தியில் கூறப்பட்டிருந்தது.

மாநிலத்தில் மத்தியப் படைகள் 'பயங்கரத்தைப் பரப்புவதாக' திரிணாமுல் காங்கிரஸ் தலைவர் அபிஷேக் பானர்ஜி குற்றம் சாட்டியிருந்தார்.

- இது, பிபிசிக்காக கலெக்டிவ் நியூஸ்ரூம் வெளியீடு