Даргирии нерӯҳои қирғиз бо як гурӯҳи мусаллаҳ дар марзи Қирғизистон бо Чин

  • 23 Январ, 2014

Бар асари як даргирӣ дар мантақаи марзии Иссиқкӯл байни Қирғизистон ва Чин марзбонони қирғиз ду тан аз аъзои гурӯҳи мусаллаҳи номаълумеро ба зарби гулӯла куштаанд.

Хабаргузории “AkiPress”-и Қирғизистон дар истинод ба дафтари матбӯъотии Идораи нерӯҳои марзбонии ин кишвар хабар додааст, ки субҳи панҷшанбеи 23 январ аз 8 то 10 нафар ба таври ғайриқонунӣ аз Чин ба дараи Сари Булоқи Қирғизистон убур карда, Александр Барикин, раҳбари ҷамъияти шикорчиёни вилояти Иссикӯлро куштаанд ва силоҳи шикории ӯро ғасб кардаанд.

Ин манбаъ гуфтааст, ки дастаи марзбонони Қирғизистон сареъан ба маҳалли ҳодиса ҳозир шуда ва бо аъзои гурӯҳи мусаллаҳ даргир шудааст.

Гуфта мешавад, ҳамакнун ин гурӯҳи мусаллаҳ дар минтақаи “Пикертик” аз ҷониби нерӯҳои марзбонии Қирғизистон муҳосира шуда ва ҳеликуптари низомӣ бо нерӯи таъйиноти вижаи дастаи марзбонии Чуйи ин кишвар барои тақвияти нерӯҳои марзбонӣ ба маҳалли ҳодиса парвоз кардааст.

Бино ба гузоришҳои расида аз минтақаи “Пикертик”, даргириҳо миёни марзбонони қирғиз ва гурӯҳи мусаллаҳи номаълум ҳамчунон идома доштааст.