Омрико давлати Чинро ба ҷосусии сойберӣ муттаҳам кард
Пентогун, Вазорати дифоъи Омрико дар гузорише гуфтааст, ки Чин даст ба ҷосусии сойберӣ зада ва талош карда аз ин тариқ ба иттилоъоте дар бораи сиёсати хориҷӣ ва тарҳҳои низомии давлати Омрико даст ёбад.
Ин гузориш вокуниши давлати Чинро ба дунбол дошта, ки иттиҳомҳои вазорати дифоъи Омрикоро рад кардааст.
Сухангӯи вазорати умури хориҷаи Чин иттиҳомоти матраҳшуда дар гузориши вазорати дифоъи Омрикоро бепоя ва асос хондааст.
Дар гузориши солона вазорати дифоъи Омрико барои аввалин бор ҳамалоти сойберӣ ба шабакаҳои компютерии ин кишварро ба таври мустақим ба давлати Чин нисбат додааст.
Дар гузориши Пентогун гуфта шуда, ки шабакаҳои компютерии давлати Омрико ба таври мураттаб аз сӯи Чин ҳадафи ҳамла қарор мегиранд ва ба назар мерасад омилони бархе аз ин ҳамалот бо давлат ва артиши Чин муртабит ҳастанд.
Ин гузориш хотирнишон мекунад, ки иттилоъоти бадастомада аз ин роҳ метавонад ба барномарезии низомии Чин кумак кунад, то тасвире аз қобилиятҳои низомии Омрикоро ба даст биоварад. Бар асоси ин гузориш аз чунин иттилоъоте метавон дар мавоқеъи буҳронӣ суиистифода кард.
Гузориши вазорати дифоъи Омрико мегӯяд, ки Чин аз тариқи амалиёти сойберӣ дар садади ҷамъоварии иттилоъот аз бахшҳои иқтисодӣ, диплумотик ва дифоъии Иёлоти Муттаҳида аст ва ин иттилоъот метавонад дар барномарезии дифоъии Чин ба кор равад.
Гузориши Пентогун ҳамчунин аз "адами шаффофияти" барномаҳои мудернизосиюни артиши Чин ва ҳамчунин ҳазинаҳои дифоъии ин кишвар интиқод кардааст.
Чин дар моҳи март эълом кард, ки буҷаи солонаи дифоъии ин кишвар бо афзоиши даҳ дарсадӣ ба 114 милёрд дулор мерасад. Пентогун, вазорати дифоъи Омрико мегӯяд ҳазинаи дифоъии воқеъии Чин дар соли 2012 беш аз ин будааст. Ин вазоратхона буҷаи дифоъии Чин дар ин солро 135 милёрд дулор то 215 милёрд дулор тахмин задааст.
Гузориши вазорати дифоъи Омрико хотирнишон мекунад, ки Чин дар соли 2012 аввалин нови ҳавопаймобари худро роҳандозӣ кард ва дар ҳоли сармоягузорӣ рӯйи мушакҳои болистик, системҳои низомии фазоии сойберӣ ва таҷҳизоти ҷанги фазойӣ аст.
Иртиботи мустақим
Агарчи Омрико ҳамвора ба нақши Чин дар ҳамалоти сойберӣ ба ин кишвар мазнун буда, аммо то кунун аз нисбат додани мустақими ин ҳамалот ба давлати Чин худдорӣ карда буд . Омрико ҳамчунин то кунун аз таъйиди ҳадаф қарор гирифтани шабакаҳои компютерии давлатӣ худдорӣ мекард.
Феврали имсол як ширкати фаъъол дар заминаи амнияти сойберӣ дар Омрико эълом кард, ки як воҳиди низомии сиррии Чин дар анҷоми маҷмӯъаи густарда аз ҳамалоти ҳакерӣ даст дошта, аммо давлати Чин ҳар гуна дахолат дар ҳамалоти ҳакерӣ ва ҷосусии сойбериро рад кард.
Ширкати Мондиёнт дар гузорише воҳиди низомии 61938 мутаъаллиқ ба Артиши озоди халқи Чинро, ки маркази он дар Шонхой аст, ба унвони яке аз муҳтамилтарин авомили ин ҳамалоти ҳакерӣ шиносоӣ кард.
Бар асоси ин гузориш воҳиди низомии 61398 садҳо теробойт иттилоъотро аз шумори зиёде аз саноеъ, ки аксари онҳо дар Омрико ва теъдоде аз онҳо дар Конодо ва Бритониё мустақар ҳастанд, ба сирқат бурдааст.
Дар он замон вазорати умури хориҷаи Чин зимни ибрози тардид нисбат ба сиҳҳати шавоҳиди ироашуда дар ин гузориш эълом кард, ки давлати Чин қаввиян бо чунин иқдомоте мухолиф аст .
