Иттиҳодияи Урупо хостори таҷдиди назар дар лағви таҳрими бонки эронӣ шуд

Иттиҳодияи Урупо дар робита бо ҳукми қуззоти додгоҳи умумии ин иттиҳодия мабнӣ бар лағви таҳримҳои ин иттиҳодия алайҳи бонки "Миллат" и Эрон тақозои таҷдиди назар кардааст.

Ин тақозо рӯзи сешанбеи 19 фарвардин (9 апрел) ва дар охирини рӯзи муҳлат барои тақозои таҷдиди назар ба додгоҳ ироа шудааст.

Додгоҳи умумии Иттиҳодияи Урупо дар авосити баҳманмоҳи соли гузаштаи хуршедӣ (авоили марти имсол) эълом кард, ки мақомоти ин иттиҳодия натавонистаанд мадорик ва шавоҳиди қонеъкунандае ироа кунанд, ки нишондиҳандаи даст доштани бонки "Миллат" дар барномаи атумии Эрон бошад.

Чанд рӯз баъд ин додгоҳ ҳукми мушобеҳе барои лағви таҳримҳое алайҳи бонки Содирот низ содир кард.

Ҳанӯз мушаххас нест, ки оё мақомҳои Иттиҳодияи Урупо тавонистаанд, мадорики ҷадиде ба додгоҳ ироа кунанд ё бар асоси ҳамон мадорики қаблӣ тақозои таҷдиди назар кардаанд.

Аҳкоми қуззоти урупоӣ дар лағви таҳрими бонкии Эрон муҷиби нигаронии шадиди мақомоти омрикоӣ шуд.

Ҳамон замон як мақоми вазорати умури хориҷаи Омрико гуфт, ки тарҳи даъвои муассисоти эронӣ дар додгоҳҳои таҷдиди назари урупоӣ алайҳи таҳримҳои Иттиҳодияи Урупо мумкин аст боъиси тазъифи таҳримҳои тиҷорӣ ва молӣ алайҳи ин кишвар шавад.

Ин мақоми омрикоӣ аз кишварҳои узви Иттиҳодияи Урупо хоста буд, ки роҳе биёбанд то битавон "асноди маҳрамонаи иттилоъотии" марбут ба барномаи атумии Эронро дар ихтиёри қуззоти маҳокими расидагӣ ба шикоёти муассисоти эронӣ қарор дод.

Ба гуфтаи нозирон ин имкон вуҷуд дорад, ки Иттиҳодияи Урупо ин "асноди маҳрамонаи иттилоъотӣ"-ро ҳамроҳи тақозои таҷдиди назар ба додгоҳ ироа карда бошад.

Пас аз эъломи раъйи додгоҳи Иттиҳодияи Урупо гуфта мешуд, ки маҳалли ихтилофи назари ин додгоҳ ва давлатҳои узви иттиҳодия дар ин замина вуҷуди мадорики мааҳрамонаи иттилоъотӣ дар мавриди доманаи фаъъолиятҳои атумии Эрон аст, ки ба далели нигаронӣ дар мавриди ба мухотира афтодани манобеъи касби ин иттилоъот қобили тарҳ дар ҷаласоти додгоҳ нест.

Бонкҳои эронӣ аз ҷумлаи муассисоте ҳастанд, ки алайҳи таҳримҳои Иттиҳодияи Урупо ба додгоҳи урупоӣ шикоят кардаанд.

Мақомоти омрикоӣ аз кишварҳои урупоӣ хостаанд, ки роҳе биёбанд, ки битавон ин мадорикро дар ихтиёри қуззоти додгоҳ қарор дод ва ҳамзамон итминон дошт, ки муҳтавои онҳо ҳамчунон маҳрамона боқӣ хоҳад монд.

Меҳрдод Имодӣ, коршиноси иқтисодӣ дар гуфтугӯ бо бахши форсии Би-би-сӣ иртиботи тасмими Иттиҳодияи Урупо барои тақозои таҷдиди назар бо музокиротро муҳтамил донист.

Ба гуфтаи оқои Имодӣ умедҳое, ки дар раванди музокироти Эрон ва шаш қудрати ҷаҳонӣ (мавсум ба 5+1) бар сари барномаҳои ҳастаии Эрон дар нахустин нишасти Олмотӣ дар исфандмоҳ ба даст омада буд, дар дувумин нишасти Олмотӣ камранг шуд.

Оқои Имодӣ гуфт: "Агар нишасти Олмотӣ 2 таври дигаре ва дар ростои нишасти Олмотӣ 1 пеш мерафт, замина барои боз шудани гиреҳҳои кучак миёни Эрон ва ҷомеъаи ҷаҳонӣ муҳайё мешуд ва шояд Иттиҳодияи Урупо барои лағви таҳрими бонки Миллат тақозои таҷдиди назар намекард."

Котрин Эштун, масъули сиёсати хориҷии Иттиҳодияи Урупо дар поёни нишасти Олмотӣ 2, ки ҳафтаи гузашта баргузор шуд, гуфт, ки ду тараф ба тавофуқ нарасидаанд.

Омрико ва Иттиҳодияи Урупо, ки Ҷумҳурии Исломиро ба талош барои дастёбӣ ба силоҳҳои ҳастаӣ дар пӯшиши барномаҳои сулҳомези ҳастаӣ муттаҳам мекунанд, таҳрими молӣ ва бонкии Эронро барои водор кардани ин кишвар ба қабули қатъномаҳои байналмилалӣ дар ин замина зарурӣ медонанд.

Иттиҳодияи Урупо бо истинод ба чунин иртиботе гуфта буд, ки ин ду бонк мусавваботи Иттиҳодияи Урупо дар таҳрими барномаҳои атумии Эронро нақз карда ва дар натиҷа бояд машмули таҳрим қарор гиранд.

Эрон ҳамвора талош барои дастёбӣ ба силоҳҳои ҳастаиро рад карда ва гуфта, ки барномаи ҳастаиаш сирфан аҳдофи сулҳомез дорад.