Hii ni tovuti ya maandishi pekee ambayo inatumia data kidogo. Tazama toleo kuu la tovuti likijumuisha picha na video zote.
Pata maelezo zaidi kuhusu toleo hili la linalotumia kiasi kidogo cha data
Serikali ya Israel yatambua mwili wa mwanafunzi wa Tanzania aliyekuwa mateka Gaza
Utambulisho huo umefanywa na Kituo cha Kitaifa cha Tiba ya Uchunguzi wa Vifo kwa ushirikiano na Polisi ya Israel na Jeshi la Ulinzi la Israel (IDF).
Muhtasari
- Kilimo cha opium nchini Afghanistan chapungua mwaka 2025, utafiti wa UN
- Waziri wa masuala ya kigeni wa Iran aunga mkono 'mazungumzo sawa' na Marekani
- Kimbunga Kalmaegi chatua Vietnam
- Rais wa Mexico amshtaki mwanamume aliyempapasa barabarani
- Wafungwa kadhaa huachiliwa kimakosa Uingereza kila wiki, waziri anasema
- Hezbollah yakataa kufanya mazungumzo na Israel
- Serikali ya Israel yatambua mwili wa mwanafunzi wa Tanzania aliyekuwa mateka Gaza
- Afrika Kusini kuchunguza jinsi raia wake 17 walivyoishia kupigania Ukraine
- Ukraine yaishambulia Volgograd ya Urusi kwa kutumia ndege zisizo na rubani, mtu mmoja auawa
- Wakenya wanaoishi Tanzania watakiwa kuripoti matukio ya hatari kwa ubalozi wa Kenya
- Marekani yapanga kupunguza safari za ndege ikiwa kufungwa kwa serikali kutaendelea
- Uchaguzi Tanzania 2025 ulikiuka maadili ya kidemokrasia - Waangalizi wa AU
Moja kwa moja
Na Mariam Mjahid & Asha Juma
Kilimo cha opium nchini Afghanistan chapungua mwaka 2025, utafiti wa UN
Jumla ya eneo la ardhi nchini Afghanistan ambalo linafanya kilimo cha afyuni yaani (opium) kimepungua kwa 20% mwaka huu, kulingana na makadirio ya Umoja wa Mataifa yaliyotolewa Alhamisi, ikiwa ni kupungua zaidi tangu kilimo cha malighafi ya heroin kupungua mwaka 2023 baada ya Taliban kupiga marufuku.
Ofisi ya Umoja wa Mataifa ya Kupambana na Dawa za Kulevya na Uhalifu (UNODC) imesema utafiti wake wa kila mwaka wa kilimo cha opium nchini Afghanistan, ambayo ni mzalishaji mkubwa duniani, umegundua mavuno yamepungua kwa kasi zaidi, na kushuka kwa wastani wa 32% hadi tani 296.
Kupungua kwa asilimia 20 katika eneo linalolimwa kunafuatia kupungua kwa asilimia 19 mwaka wa 2024. Mabadiliko hayo ni sehemu ndogo tu ya kushuka kwa kiasi kikubwa mnamo 2023 kufuatia tangazo la Taliban mnamo 2022 kwamba ilikuwa ikiharamisha uzalishaji wa mihadarati.
"Jumla ya eneo lililokuwa chini ya kilimo cha opium mwaka 2025 lilikadiriwa kuwa hekta 10,200, 20% chini kuliko mwaka 2024 (hekta 12,800) na sehemu ya viwango vya kabla ya kupiga marufuku vilivyorekodiwa mwaka 2022, wakati wastani wa hekta 232,000 zililimwa," taarifa ya UNODC ilisema nchi nzima.
Wakati huo huo, pamoja na mavuno madogo, bei ya opium kavu ilipungua kutoka 27% hadi $570 kwa kilo, iliongeza.
Uzalishaji wa dawa za sanisi, hasa methamphetamine, umeendelea kuongezeka tangu kupigwa marufuku, UNODC ilisema.
Soma zaidi:
Waziri wa masuala ya kigeni wa Iran aunga mkono 'mazungumzo sawa' na Marekani
Katika kipindi cha maswali na majibu na wanafunzi wa Chuo Kikuu cha Bu Ali Sina, Waziri wa Mambo ya Nje Abbas Araghchi alisema kuwa Iran iko tayari kwa "mazungumzo sawa na ya heshima" na Marekani lakini haina "uzoefu mzuri" katika mazungumzo na nchi hiyo.
Waziri alisema kuwa mazungumzo na Marekani lazima yahakikishe kuwa na "manufaa kwa pande zote".
Akizungumzia uzoefu mbaya wa mazungumzo na Marekani, alisema kwamba wakati wa utawala wa Ebrahim Raisi, "mpango ulifikiwa katika mazungumzo na Marekani kuwaachilia Wamarekani kadhaa waliokuwa wamefungwa nchini Iran kwa mabadilishano na dola bilioni saba.
Pesa hizo zilihamishwa kutoka Korea hadi Qatar. Bilioni saba ziligeuka kuwa dola bilioni sita. Tukawaachia wafungwa. Lakini fedha zilizuiwa tena".
Bwana Araqchi aliendeleza mkutano kwa kusema, "Kila mahali wanapendelea mazungumzo isipokuwa mazungumzo yana gharama kubwa kuliko vita."
Kauli hizi zinakuja siku tatu baada ya Rais wa Marekani Donald Trump kusema katika mahojiano na mtandao wa Marekani wa CBS kwamba Iran inataka kufikia makubaliano na Marekani."
Katika siku za hivi karibuni, ripoti zimechapishwa kuhusu uwezekano wa kuanza tena mazungumzo kati ya Iran na Marekani.
Soma zaidi:
Kimbunga Kalmaegi chatua Vietnam
Kimbunga Kalmaegi kimetua katikati mwa Vietnam.
Kimbunga Kalmaegi kimetua katika ufuo wa Vietnam, na kusababisha upepo wa hadi kilomita 149 (maili 92) kwa saa, kulingana na ripoti katika gazeti la mtandaoni la VnExpress la Vietnam.
Miti imeanguka kwenye barabara kuu na kuziba njia, huku madirisha katika hoteli kwenye eneo la Quy Non yakivunjika.
"Dhoruba imetua katika majimbo ya Dak Lak na Gia Lai," wizara ya mazingira imesema katika taarifa iliyonukuliwa na vyombo mbalimbali, likiwemo shirika la habari la AFP.
Kimbunga hicho hicho kimesababisha maafa nchini Ufilipino na mafuriko katika miji yote na kuua takriban watu 114.
Rais wa Mexico amshtaki mwanamume aliyempapasa barabarani
Rais wa Mexico Claudia Sheinbaum amefungua mashtaka dhidi ya mwanamume aliyempapasa hadharani.
Picha za simu za rununu za tukio la Jumanne zinaonyesha Sheinbaum akizungumza na kundi la wafuasi kwenye barabara karibu na Ikulu ya Kitaifa huko Mexico City.
Katika video hiyo, mwanamume alimkaribia kwa nyuma na kujaribu kumbusu shingoni na kuanza kumpapasa mwili wake.
Sheinbaum aliondoka haraka na mshiriki wa timu yake akaingia kati, lakini alishtuka sana. Mhalifu amekamatwa.
Kutokana na tukio hilo, Rais Sheinbaum ametoa wito wa unyanyasaji wa kijinsia kufanywa uhalifu wa jinai kote nchini humo.
Mashirika ya kutetea haki za wanawake na wachambuzi wa masuala ya wanawake wamesema tukio hilo linaonyesha ukubwa wa kiburi cha wanaume uliokita mizizi katika jamii ya Mexico, ambapo mwanamume anaamini ana haki ya kumdhulumu hata rais ikiwa ni mwanamke.
Mauaji ya wanawake pia ni tatizo kubwa nchini Mexico, huku asilimia 98 ya mauaji ya kijinsia yakikadiriwa kutoadhibiwa.
Wafungwa kadhaa huachiliwa kimakosa Uingereza kila wiki, waziri anasema
Wafungwa kadhaa huachiliwa kimakosa kutoka magereza ya Uingereza kila wiki, waziri mmoja alisema siku ya Alhamisi, akifichua ukubwa wa tatizo lililojitokeza kwa kuachiliwa kimakosa kwa mhamiaji mtenda uhalifu wa kingono ambaye makosa yake yalisababisha maandamano ya wiki kadhaa.
Kuachiliwa kwa bahati mbaya kwa mtafuta hifadhi wa Ethiopia Hadush Gerberslasie Kebatu mwezi uliopita kuliongeza shinikizo kwa serikali ambayo inatatizika na magereza yenye msongamano mkubwa na mfumo mbovu wa uhamiaji.
Kukamatwa kwake mwezi Julai tayari kulisababisha maandamano nje ya hoteli ya watu wanaotafuta hifadhi huko Epping, kaskazini mwa London, ambayo baadaye yaligeuka na kuwa maandamano ya kupinga uhamiaji.
Alifukuzwa nchini humo kufuatia msako wa siku tatu.
Wiki hii, kuachiliwa kwa wafungwa wengine wawili kimakosa - ikiwa ni pamoja na raia wa Algeria kwenye sajili ya wahalifu wa kingono ambaye alikuwa amepitisha muda wa kukaa nchini humo - kumezua wasiwasi zaidi kuhusu mfumo wa magereza, ambao umekuwa ukikabiliana na msongamano baada ya idadi ya wafungwa nchini Uingereza na Wales kuongezeka maradufu katika miaka 30 iliyopita.
Serikali inakadiria kuwa wafungwa 262 waliachiliwa kimakosa katika kipindi cha miezi 12 hadi Machi 2025 - ikiwa ni mwaka wa nne mfululizo wa ongezeko hilo na zaidi ya mara mbili ya 115 walioripotiwa mwaka uliopita.
"Mfumo hauko vizuri," Alex Davies-Jones, waziri katika idara ya sheria, aliiambia Redio ya Times.
"Tunafukuza wafungwa wengi wa kigeni kuliko hapo awali," alisema. "Pia tutakuwa tunawafukuza baada ya kuhukumiwa, badala ya kuwasubiri kutumikia kifungo katika magereza yetu."
Kuachiliwa kimakosa pia kumeongeza shinikizo kwa David Lammy, waziri wa sheria wa Uingereza na naibu waziri mkuu, ambaye aliliambia bunge siku ya Jumatano kwamba aliimarisha sheria ili kurekebisha tatizo hilo, bila kufichua kwamba alikuwa anajua kuhusu makosa ya hivi majuzi.
Pia unaweza kusoma:
Hezbollah yakataa kufanya mazungumzo na Israel
Kundi la Hezbollah nchini Lebanon limesema siku ya Alhamisi kwamba "lina haki halali ya kupinga uvamizi wa (Israeli)", na kuongeza kuwa linaunga mkono jeshi la Lebanon, shirika la habari la Reuters limeripoti.
Hezbollah pia ilisema kuwa, wakati Lebanon iko kwenye mazungumzo ya usitishaji vita, nchi hiyo haiko kwenye ulazima wa kushiriki katika mazungumzo ya kisiasa na Israel.
Wiki iliyopita, Rais wa Lebanon Joseph Aoun aliagiza jeshi lake kukabiliana na uvamizi wowote wa Israel kusini mwa Lebanon baada ya vikosi vya Israel kuvuka mpaka usiku kucha na kumuua mfanyakazi wa manispaa, licha ya usitishaji mapigano uliosimamiwa na Marekani.
"Tunathibitisha haki yetu halali ya kupinga uvamizi na kusimama na jeshi letu na watu wetu kulinda uhuru wa nchi yetu," kundi hilo lilisema.
Hezbollah pia ilisema ilikuwa ikitumia haki yake ya kujilinda dhidi ya "adui anayeleta vita dhidi ya nchi yetu, ambaye hatasitisha mashambulizi yake, na anataka kunyakua nchi yetu".
Marekani ilianzisha mapatano Novemba 2024 kati ya Lebanon na Israel baada ya zaidi ya mwaka mmoja wa mzozo uliosababishwa na vita huko Gaza, lakini mashambulizi ya Israel kuvuka mpaka yameendelea mara kwa mara.
Soma zaidi:
Serikali ya Israel yatambua mwili wa mwanafunzi wa Tanzania aliyekuwa mateka Gaza
Serikali ya Israel imethibitisha kuwa mwili wa marehemu Joshua Luito Mollel, mwanafunzi kutoka Tanzania aliyechukuliwa mateka katika Ukanda wa Gaza tarehe 7 Oktoba 2023, umetambuliwa rasmi.
Utambulisho huo umefanywa na Kituo cha Kitaifa cha Tiba ya Uchunguzi wa Vifo kwa ushirikiano na Polisi ya Israel na Jeshi la Ulinzi la Israel (IDF).
Familia ya marehemu imejulishwa rasmi, na mwili wake umerejeshwa nchini Israel.
Serikali ya Israel imetoa salamu za rambirambi kwa familia ya Mulal na kwa familia zote za mateka waliopoteza maisha.
Serikali na Jeshi la Ulinzi la Israel wamesisitiza kuwa wanaendelea kufanya kila juhudi kuhakikisha kuwa miili ya mateka wote inarejeshwa kwa maziko yenye heshima.
Vilevile, serikali imeitaka Hamas kutekeleza makubaliano na kurejesha miili ya mateka waliobaki.
Wamesema hawatapumzika hadi kila mmoja arejeshwe nyumbani.
Soma pia:
Maandalizi ya kongamano la COP 30 yaendelea mjini Belem, Brazil
Viongozi wa dunia wameanza kuwasili mjini Belém, Brazili, kwa mkutano wao wa kila mwaka wa kukabiliana na mabadiliko ya hali ya hewa.
Baadhi ya viongozi wametemmbela msitu wa Amazon wakisubiri kikao cha awali kabla ya kongamano kuu kuanza Jumatatu ijayo.
COP30 inafanyika miaka 10 baada ya makubaliano ya hali ya hewa ya Paris, ambapo nchi ziliahidi kujaribu kuzuia kupanda kwa joto duniani hadi 1.5C.
Hata hivyo, mkuu wa Umoja wa Mataifa (UN) anasema "kupindua" lengo la 1.5C sasa ni jambo lisiloepukika na Rais wa Marekani Donald Trump ni miongoni mwa viongozi wasiotarajiwa kuhudhuria.
COP30 ni nini na inawakilisha nini?
COP30 ni mkutano wa 30 wa Umoja wa Mataifa wa hali ya hewa.
COP inasimama kwa "Mkutano wa Vyama". "Vyama" inarejelea karibu nchi 200 ambazo zilitia saini makubaliano ya asili ya hali ya hewa ya Umoja wa mataifa UN mnamo 1992.
Kongamano la COP30 linaanza lini?
COP30 inaanza rasmi Jumatatu Novemba 10 hadi Ijumaa Novemba 21.
Mara nyingi muda wa kikao huongezeka kwa sababu ya mazungumzo ya dakika za mwisho ili kupata makubaliano.
Kwa nini COP30 inafanyika nchini Brazil?
Taifa mwenyeji huchaguliwa na nchi zinazoshiriki baada ya uteuzi kutoka eneo la mwenyeji. Ni mara ya kwanza mkutano huo unafanyika nchini Brazil.
Uchaguzi wa Belém, katika msitu wa Amazon, umesababisha changamoto kubwa.
Baadhi ya wajumbe wametatizika kupata malazi ya bei nafuu, na kusababisha wasiwasi kwamba mataifa maskini yanaweza kutomudu gharama.
Uamuzi wa kusafisha sehemu ya msitu wa Amazon ili kujenga barabara kwa ajili ya mkutano huo pia umeonekana kuwa na utata.
Brazili pia imeendelea kutoa leseni mpya kwa mafuta na gesi ambayo, pamoja na makaa ya mawe, ni nishati ya mafuta, sababu kuu ya ongezeko la joto duniani.
Nini kitajadiliwa katika COP30?
1.Nishati ya Kisukuku
Katika COP28 (2023), nchi zilikubaliana kuachana na nishati za kisukuku, lakini makubaliano hayo hayakuimarishwa katika COP29 (2024) kama ilivyotarajiwa.
2. Fedha
COP29 ilishuhudia nchi tajiri zikiahidi kutoa dola bilioni 300 kila mwaka hadi 2035 kusaidia mataifa maskini kukabiliana na mabadiliko ya tabianchi ikiwa ni kiwango kidogo ikilinganishwa na mahitaji halisi.
Pia walipendekeza kuongeza hadi dola trilioni 1.3, lakini mpango huo hauna maelezo ya utekelezaji.
3. Nishati Mbadala
COP28 ilikubaliana kuongeza mara tatu uzalishaji wa nishati mbadala kama upepo na jua ifikapo 2030, lakini Shirika la Kimataifa la Nishati (IEA) linasema dunia bado haiko kwenye mwendo wa kufikia lengo hilo.
4. Mazao ya Asili
Inawezekana COP30 ikazindua mfuko mpya wa “Tropical Forests Forever Facility” kusaidia kuhifadhi misitu ya kitropiki.
Rais wa Marekani Donald Trump mapema mwaka huu aliuita mabadiliko ya tabia nchi ''udanganyifu mkubwa kufanya duniani''na kuahidi kuongeza uzalishaji wa mafuta na gesi.
Juhudi nyingine za kimataifa kama makubaliano ya plastiki na kupunguza hewa chafu kutoka usafirishaji zimeshindwa kufikia muafaka.
Soma pia:
Afrika Kusini kuchunguza jinsi raia wake 17 walivyoishia kupigania Ukraine
Serikali ya Afrika Kusini imesema Alhamisi ya Novemba 6, 2025 kwamba imepokea simu za dharura kutoka kwa raia wake 17 waliokuwa wamejiunga na vikosi vya wapiganaji wa kulipwa katika mzozo wa Urusi-Ukraine na kwamba inafanya kazi kuwatafutia njia ya kurudishwa nyumbani.Haya ni kwa mujibu wa shirika la Reuters.
Tume ya taifa ilisema kuwa wanaume hao walishawishiwa kushiriki mapigano kwa kudanganywa na mikataba ya ajira yenye faida kubwa.
Wote wako kati ya umri wa miaka 20 na 39 na wamesalia katika eneo la Donbas lililoharibiwa na vita nchini Ukraine.
“Rais Cyril Ramaphosa ametoa agizo la kufanya uchunguzi kuhusu hali zilizosababisha kuajiriwa kwa vijana hawa katika shughuli hizi za wapiganaji wa kulipwa,” ilisema taarifa hiyo.
Taarifa hiyo haikufafanua upande gani wa mzozo wananchi hao wa Afrika Kusini walikuwa wanapigania.
Kulingana na sheria za Afrika Kusini, ni kinyume cha sheria kwa raia kutoa msaada wa kijeshi kwa serikali za kigeni au kushiriki katika majeshi ya serikali za kigeni isipokuwa iwapo wameidhinishwa na serikali ya Afrika Kusini, iliongeza taarifa hiyo.
Mnamo Agosti, serikali ya Afrika Kusini iliwatahadharisha vijana kuhusu ofa za kazi za uongo nchini Urusi, ambazo zilienea kwenye mitandao ya kijamii, baada ya ripoti kuwa baadhi ya wanawake wa Afrika Kusini walidanganywa kushiriki katika utengenezaji wa ndege zisizo na rubani.
Ukraine yaishambulia Volgograd ya Urusi kwa kutumia ndege zisizo na rubani, mtu mmoja auawa
Ukraine imeshambulia Urusi kwa angalau ndege zisizo na rubani 75 Alhamisi ya Novemba 6,2025 ikisababisha moto katika eneo la viwandani mjini Volgograd kusini mwa nchi hiyo, na kuua angalau mtu mmoja na kusitisha ndege kadhaa kote nchini, wanasema maafisa wa Urusi.
Kwa miezi kadhaa, Ukraine imekuwa ikishambulia viwanda vya mafuta, maghala na mabomba ya mafuta ya Urusi katika juhudi za kudhoofisha uchumi wa Urusi huku nguvu za Urusi zikiendelea kusonga mashariki mwa Ukraine.
Gavana wa Volgograd, Andrei Bocharov, alisema kuwa mwanaume mwenye umri wa miaka 48 aliuwawa na mabaki ya mlipuko na kwamba moto ulizuka katika eneo la viwandani katika wilaya ya Krasnoarmeysk ya jiji hilo, ambalo hapo awali lilijulikana kama Stalingrad.
Wilaya hiyo ina kiwanda kikuu cha mafuta cha Lukoil, ambacho kimekuwa kikilengwa mara kwa mara na Ukraine.
Mnamo 2024, kiwanda cha Volgograd kilichakata tani milioni 13.7 za mafuta, sawa na 5.1% ya jumla ya mafuta yaliyokatwa katika viwanda vya Urusi.
Wizara ya Ulinzi ya Urusi ilisema ndege zisizo na rubani 75 za Ukraine ziliangushwa usiku kucha, ikiwa ni pamoja na 49 katika mkoa wa Volgograd.
Vyombo vya habari vya Urusi viliripoti kuwa viwanja 13 vya ndege kote Urusi vilisimamisha safari za ndege kutokana na shambulio hilo la ndege zisizo na rubani.Hya ni kwa mujibu wa shirika la Reuters.
Urusi ilisema Jumatano kuwa majeshi yake yanapanuka kaskazini ndani ya Pokrovsk katika jitihada za kudhibiti jiji lote la Ukraine.
Jeshi la Urusi linasema sasa lina udhibiti wa zaidi ya asilimia 19% ya Ukraine, sawa na kilomita za mraba 116,000 (maili za mraba 44,800).
Kulingana na ramani zinazounga mkono Ukraine zilizotolewa na Reuters, Urusi imechukua zaidi ya kilomita za mraba 3,400 za ardhi ya Ukraine hadi sasa mwaka huu ramani hizo hizo zinaonyesha kwamba mwishoni mwa 2023, Urusi ilidhibiti asilimia 18% ya Ukraine.
Soma Pia:
Wakenya wahakikishwa usalama wao Tanzania
Ubalozi wa Kenya nchini Tanzania umewaomba Wakenya waliopo nchini humo kuendelea na shughuli zao za kila siku kwa mujibu wa sheria bila hofu, ukibainisha kuwa hakuna tukio lolotea dhidi ya raia wa Kenya liliripotiwa hadi sasa, ilisema katika taarifa.
“Tunawahimiza Wakenya wote kuwa watulivu na kuzingatia sheria za ndani, na kuripoti mara moja matukio yoyote yatakayohatarisha usalama wao kwa ubalozi wetu jijini Dar es Salaam,” iliongeza taarifa hiyo.
Wakenya pia wameshauriwa kuwasiliana na Ubalozi huo kupitia nambari ya simu +255 22 2668285/6.
Ubalozi huo pia umeahidi kutoa taarifa za mara kwa mara kupitia njia rasmi za mawasiliano na mitandao ya jamii, ili kuhakikisha Wakenya wanapata taarifa sahihi kuhusu usalama na ustawi wao nchini Tanzania.
Haya yanajiri baada ya ripoti zinazoashiria kuwa Wakenya wanaoishi Tanzania wanahofia usalama wao kusambaa mitandaoni.
Mamlaka nchini Tanzania zilisema raia kuwa raia wa mataifa jirani (bila kutaja ni wa taifa gani) walichagia vurugu zilizokumba nchini hiyo wakati wa uchaguzi.
Kundi la kutetea haki za binadamu, likiongozwa na Vocal Africa, pia liliitaka serikali ya Kenya kufuatilia hali ya Wakenya nchini Tanzania baada ya ghasia za uchaguzi.
Hii ni baada ya Mkenya John Okoth Ogutu, mwalimu wa Sky Schools Dar es Salaam, kupigwa risasi na kuawa Oktoba 29, 2025.
Familia ilisema mwili wake ulipelekwa katika makafani ya Hospitali ya Mwananyamala lakini haujapatikana.
Mbunge wa Embakasi Mashariki nchini Kenya, Babu Owino, ameandika barua kwa Waziri wa Mambo ya Nje wa Kenya, Musalia Mudavadi, kuelezea wasiwasi wake kuhusu ripoti za mauaji ya Ogutu.
Babu Owino anaitaka Wizara hiyo kuwasilisha taarifa bungeni ikieleza hatua zinazochukuliwa kuwalinda raia wa Kenya wanaoishi na kufanya kazi nje ya nchi, hasa ndani ya Jumuiya ya Afrika Mashariki.
Soma zaidi:
Marekani yapanga kupunguza safari za ndege ikiwa kufungwa kwa serikali kutaendelea
Waziri wa uchukuzi wa Marekani, Sean Duffy, amewaonya kuwa, kuanzia asubuhi ya Ijumaa, kutakuwa na upungufu wa asilimia 10% katika uwezo wa usafirishaji wa anga katika viwanja 40 vikuu vya ndege endapo kufungwa kwa serikali kutaendelea.
Kupunguzwa kwa safari za ndege kutakuwa kwa awamu,kuanzia 4% ya safari za ndani siku ya Ijumaa, kisha kupanda hadi 5% Jumamosi na 6% Jumapili, kabla ya kufikia 10% kamili wiki ijayo, Reuters iliripoti baada ya tangazo hilo, ikinukuu vyanzo vinne ambavyo havikutajwa.
Kufutwa kwa safari za ndege kutaathiri kati ya safari za ndege 3,500 na 4,000 kwa siku.
Uamuzi huu umetokana na ripoti zinazotolewa na wadhibiti wa trafiki ya anga, alisema Bryan Bedford, mkuu wa Utawala wa Serikali wa Anga (FAA), wakati wa mkutano na Duffy Jumatano.
“Hili ni jambo lisilo la kawaida, kama vile kufungwa kwa serikali ni jambo lisilo la kawaida, na kama vile ukweli kwamba wadhibiti wetu hawajalipwa kwa mwezi mzima ni jambo lisilo la kawaida pia,” alisema Bedford.
Wakati huu wa kufungwa kwa serikali, ambao ni mrefu zaidi katika historia ya Marekani, wadhibiti wameendelea kufanya kazi bila malipo, jambo lililosababisha baadhi yao kudai likizo za ugonjwa au kuchukua kazi za ziada.
Mara tu baada ya serikali kufungwa, viwanja vya ndege vilianza kuathirika.
Baadhi vililazimika kusimamisha ndege kwa saa kadhaa baada ya wadhibiti kudai likizo ya ugonjwa, huku wengine wakitegemea wadhibiti kutoka viwanja vingine.
Nick Daniels, rais wa chama cha wafanyakazi kinachowakilisha zaidi ya wafanyakazi 20,000 wa anga, alielezea hali hiyo kwa maneno makali: “Wadhibiti wa trafiki ya anga wanatuma ujumbe wa maandishi wakisema, ‘Sina hata pesa za kununua mafuta ya gari ili kuja kazini.’”
Duffy alionya mwanzoni mwa wiki kuwa kusitishwa kwa safari za ndege kunaweza kuanza, kwani nusu ya viwanja vikuu 30 vya ndege nchini vina uhaba wa wafanyakazi.
Aidha, aliashiria kuwa kuchukua kazi za ziada na wadhibiti wa trafiki ya anga wakati wa kufungwa kwa serikali kunaleta hatari, na aliwatishia kuwafukuza waliokosa kufika kazini.
“Wadhibiti wanapaswa kufanya uamuzi: je, ninaenda kazini bila mshahara na bila kuweka chakula mezani, au naendesha Uber, DoorDash, au kusubiri wageni mezani?” alisema Duffy katika kipindi cha ABC Jumapili.
Soma pia:
Uchaguzi Tanzania 2025 ulikiuka maadili ya kidemokrasia - waangalizi wa AU
Uchaguzi wa Tanzania haukikidhi kanuni na viwango vya demokrasia, waangalizi wa Umoja wa Afrika walisema katika taarifa siku ya Jumatano.
Waangalizi wa AU walishuhudia kanuni za uchaguzi zikikiukwa katika vituo kadhaa vya kupigia kura, ambapo baadhi ya wapiga kura walipatikana na zaidi ya karatasi moja ya kupigia kura.
Mawakala wa vyama vya kisiasa hawakuwepo katika baadhi ya vituo vilivyokumbwa na dosari hizo.
Wakati wa kuhesabu kura, waangalizi wengine waliamriwa kuondoka vituoni, taarifa hiyo iliongeza. Haya yanajiri siku kadhaa baada ya Ujumbe wa Waangalizi wa Uchaguzi wa Jumuiya ya Maendeleo Kusini mwa Afrika (SADC) pia kutoa taarifa sawia na hiyo kuhusu uchaguzi Mkuu wa Tanzania.
Serikali ya Tanzania imesisitiza kuwa uchaguzi huo ulikuwa huru na wa haki.
Ujumbe wa Waangalizi wa Umoja wa Afrika (AU) uliongeza kuwa: “Tanzania inapaswa kutoa kipaumbele kwa mageuzi yanayopendekezwa na upinzani ili kushughulikia changamoto za zilizoibuka kabla, wakati na baada ya uchaguzi wa wiki iliyopita.”Marekebisho haya ni pamoja na:
- Uwajibikaji na uwazi wa taasisi za serikali;
- Ujumuishwaji na kuheshimu maoni tofauti ya wadau wa kisiasa na wananchi;
- Ushiriki wa wananchi katika michakato ya kisiasa na ya uchaguzi; na
- Ulinzi na heshima kwa haki za binadamu katika ngazi zote za utawala.
Ujumbe huo wa AU pia imeeleza kutamaushwa na vifo vilivyotokana na maandamano ya baada ya uchaguzi, na kutoa rambirambi kwa familia zote zilizoondokewa na wapendwa wao.
Umetoa wito kwa mamlaka husika kuchunguza matukio hayo kwa uwazi, na kuhakikisha haki inatendeka kwa wote walioathirika.
Hapo jana Jumanne Novemba tarehe 4, Tume ya Haki za Binadamu na Utawala Bora Nchini Tanzania (THBUB) imesema itaanzisha uchunguzi wa kina kufuatia maandamano yalioshuhudiwa wakati wa Uchaguzi Mkuu uliofanyika Oktoba 29, 2025, na kusababisha uharibifu wa mali na vifo vya raia.
Rais Samia Suluhu alitangazwa mshindi katika uchaguzi wa Tarehe 29 Oktoba 2025, lakini Chama cha Demokrasia na Maendeleo, CHADEMA ambaye kiongozi wake Tundu Lussi anazuiliwa jela kwa tuhuma za uhaini, kilipinga matokeo hayo na kudai kuwa uchaguzi huo kama kejeli kwa demokrasia.
Soma pia:
Hujambo na karibu katika matangazo ya moja kwa moja ya tarehe 06/11/2025.
