Kundi la Islamic State ladai kushambulia kanisa Katoliki nchini Burkina Faso
Kundi la Islamic State (IS) ladai kutekeleza shambulio la Februari 25 dhidi ya kanisa la Kikatoliki kaskazini mashariki mwa Burkina Faso.
Moja kwa moja
Lizzy Masinga and Asha Juma
Iran ilisababisha kifo cha Mahsa Amini - UN
Chanzo cha picha, FAMILIA YA MAHSA AMINI
Iran inahusika na "unyanyasaji wa kimwili" kulikosababisha kifo cha Mahsa Amini, ujumbe wa Umoja wa Mataifa wa kutafuta ukweli unasema.
Mwanamke huyo mwenye umri wa miaka 22 alifariki akiwa chini ya ulinzi wa polisi mwaka wa 2022 baada ya kukamatwa kwa madai ya kukiuka sheria zinazowataka wanawake kuvaa hijabu.
Kifo chake kilizua maandamano ambayo hayajawahi kushuhudiwa hapo awali.
Ujumbe wa Umoja wa Mataifa pia ulibaini "matumizi yasiyolingana ya nguvu ya mauaji" na vikosi vya usalama dhidi ya waandamanaji.
Ukandamizaji huo ulisababisha vifo vya zaidi ya watu 500, mashirika ya kutetea haki za binadamu yanasema.
Hakukuwa na maoni ya mara moja kuhusu ripoti hiyo kutoka Iran, ambayo mara kwa mara imekanusha kuhusika na kifo cha Bi Amini.
Ripoti ya Umoja wa Mataifa inasema Mahsa Amini aliletwa katika kizuizi cha Iran cha Vozara ili kufanyiwa "darasa la kuelimishwa upya", lakini alianguka baada ya dakika 26 na kupelekwa hospitalini dakika 30 baadaye.
Wakati huo, mtaalam wa haki za binadamu wa Umoja wa Mataifa alisema ushahidi ulionyesha Amini alifariki "kwa sababu ya kupigwa".
Hata hivyo, mamlaka ilikataa hili na mchunguzi wa maiti wa Iran alihusisha kifo chake na hali ya kiafya aliyokuwa nayo hapo awali.
Sasa tume ya kutafuta ukweli inasema "imethibitisha kuwepo kwa ushahidi wa Bi Amini kudhurika kimwili akiwa chini ya ulinzi wa polisi wa maadili".
Hii pamoja na "mifumo ya unyanyasaji wa polisi wa maadili" iliridhisha ujumbe wa UN kwamba Bi Amini alifanyiwa ukatili wa kimwili ambao ulisababisha kifo chake.
Maandamano yalizuka baada ya mazishi ya Bi Amini katika mji wa magharibi wa Saqqez, wakati wanawake waliporarua hijabu zao kwa mshikamano.
Maandamano yalienea kote Iran, huku wanawake wakichoma hijabu zao, na waandamanaji wakitaka kupinduliwa kwa mfumo wa utawala wa Iran.
Soma zaidi:
Kundi la Islamic State ladai kushambulia kanisa Katoliki nchini Burkina Faso
Chanzo cha picha, Getty Images
Kundi linalojiita Islamic State (IS) limechelewa kusema lilitekeleza shambulio la Februari 25 dhidi ya kanisa la Kikatoliki kaskazini mashariki mwa Burkina Faso, ambapo takriban watu 15 waliuawa.
IS ilitoa madai hayo tarehe 7 Machi kupitia gazeti lake la kila wiki la al-Naba, na kuelezea shambulizi hilo la hivi karibuni walilotekeleza katika eneo la Sahel.
Ilisema kuwa wanamgambo wa IS waliokuwa wamejihami kwa bunduki walishambulia kanisa katika kijiji cha Essakane katika jimbo la Oudalan, karibu na mpaka na Mali, wakati wa ibada ya Jumapili.
"Mujahidin walipoingia kwenye lango la kanisa, waliwafyatulia risasi Wakristo na kuwaua zaidi ya 15," kundi hilo lilisema.
Ingawa IS huwalenga Wakristo mara kwa mara na mahali pao pa ibada nchini Jamhuri ya Kidemokrasia ya Kongo na Msumbiji, ambako ina matawi yanayoendelea, mashambulizi kama hayo yanayofanywa na kundi hilo huko Burkina Faso si ya kawaida.
Mashambulizi ya IS huko yamezoeleka kulenga vikosi vya jeshi.
Siku hiyo hiyo ya shambulio la kanisa, washambuliaji wasiojulikana walishambulia msikiti mmoja mashariki mwa Burkina Faso, katika mji wa Natiaboani, wakiripotiwa kuua makumi ya watu.
Ingawa hakuna kundi lililodai kuhusika na shambulio hilo, mpinzani wa IS, al-Qaeda, alidai kushambulia jeshi katika mji huo huo siku hiyo.
Soma zaidi:
Ukanda wa bahari kuelekea Gaza unaweza kufunguliwa wikendi - Von der Leyen
Chanzo cha picha, Getty Images
Ukanda wa misaada ya baharini kwenda Gaza unaweza kuanza kufanya kazi wikendi hii na usafirishaji wa majaribio ukiondoka Cyprus mapema Ijumaa, Ursula von der Leyen amesema.
Tangazo la Mkuu wa Tume ya Ulaya linawadia baada ya Marekani kusema kuwa itaanzisha bandari ya muda huko Gaza.
Umoja wa Mataifa unasema robo ya wakazi wa Gaza wako kwenye hatari ya kukumbwa na njaa huku watoto wakifariki kwa njaa.
Israel inakanusha kuzuia misaada na inashutumu mashirika ya misaada kwa kushindwa kuisambaza.
Akizungumza huko Cyprus, Bi von der Leyen alisema Gaza "inakabiliwa na janga la kibinadamu" na ukanda wa bahari utawezesha utoaji wa kiasi kikubwa cha misaada ya ziada.
Usafirishaji wa majaribio wa misaada utafanyika kwa uratibu na Umoja wa Falme za Kiarabu na shirika la misaada la World Central Kitchen, alisema.
Siku ya Alhamisi Bw Biden alisema jeshi la Marekani litaunda gati ya kusafirisha vifaa kutoka kwa meli baharini hadi ufukweni, lakini maafisa wa Marekani walisema itachukua "takriban wiki kadhaa" kuanzisha.
Soma zaidi:
Visa vya ukeketaji vyaongezeka hadi milioni 230
Chanzo cha picha, Getty Images
Idadi ya wanawake na wasichana wanaokeketwa (FGM) imeongezeka kwa asilimia 15 katika kipindi cha miaka minane iliyopita, kulingana na shirika la Umoja wa Mataifa la kuhudumia watoto Unicef.
Sasa kuna wanawake na wasichana milioni 230 duniani kote ambao wamekeketwa sehemu za siri, inasema Unicef, ambayo ni milioni 30 zaidi ya takwimu za awali.
Wengi wao wako barani Afrika, na zaidi ya kesi milioni 144, ikifuatiwa na Asia (milioni 80) na Mashariki ya Kati (milioni sita).
Takriban 40% ya wasichana na wanawake ambao wamekeketwa wanaishi katika nchi zilizoathiriwa na migogoro au ukosefu wa utulivu, ikiwa ni pamoja na Ethiopia, Nigeria na Sudan.
Lakini Unicef pia inasema kuwa kumekuwa na kushuka kwa kasi kwa wengine.
Baadhi ya nchi ambazo kesi za ukeketaji zimepungua ni Sierra Leone, Ethiopia, Burkina Faso na Kenya.
Hata hivyo, Somalia, Guinea, Djibouti na Mali bado zina idadi kubwa, na angalau 89% ya wanawake huko kati ya miaka 15 na 49 wamepitia ukeketaji.
"Pia tunaona hali inayotia wasiwasi kwamba wasichana wengi zaidi wanafanyiwa mazoezi hayo katika umri mdogo, wengi kabla ya siku yao ya kuzaliwa ya kutimiza miaka mitano," Mkurugenzi Mtendaji wa Unicef Catherine Russell anasema.
Soma zaidi:
Uuzaji wa nyama wapigwa marufuku mjini Kampala - ripoti
Chanzo cha picha, Getty Images
Mamlaka ya wanyama nchini Uganda imeripotiwa kupiga marufuku uuzaji wa nyama katika mji mkuu, Kampala, kama sehemu ya vikwazo vya kukabiliana na mlipuko wa ugonjwa wa kimeta, unaoathiri wanyama.
"Usafirishaji wa ng'ombe, mbuzi, kondoo, nguruwe na bidhaa zitokanazo na nyama zao, kupitia au ndani ya Mamlaka ya Mji Mkuu wa Kampala, Wilaya ya Kampala, ni marufuku hadi itakapotangazwa tena," Wizara ya Kilimo, Sekta ya Wanyama na Uvuvi ilisema katika barua iliyotajwa na vyombo vya habari kadhaa vya ndani.
"Masoko ya mifugo, sehemu za vichinjio, ikiwemo kunakouzwa nyama, viwanja vya kupakia na maonyesho ya wanyama katika wilaya nzima yanafungwa mara moja."
Barua hiyo ni ya tarehe 1 Machi lakini ilipokelewa na mamlaka ya Kampala siku ya Alhamisi, kulingana na ripoti za gazeti la kibinafsi la Daily Monitor.
Afisa mmoja wa jiji aliliambia gazeti hili kwamba watafanya kazi na mashirika mengine kutekeleza hatua za karantini, lakini vyombo vya habari vya ndani vinasema sehemu za kuuza nyama za jijini bado zinaendesha shughuli zake.
Ugonjwa unaoambukiza sana wa mguu na mdomo husababisha homa na malengelenge yenye uchungu ndani ya mdomo na chini ya kwato - na unaweza kusababisha kifo kwa wanyama wadogo.
Pia unaweza kusoma zaidi:
Mfadhili wa kituo cha watoto yatima anahisi 'alitapeliwa' na shirika moja la kutoa msaada
Mwanamke ambaye alitoa pauni 40,000 kwa shirika la misaada kujenga kituo cha watoto yatima, anasema anahisi "alidanganywa" kwa sababu, miaka saba baadaye, kazi bado kituo hicho hakijakamilika.
Ishrat Baig anasema aliambiwa na shirika la Penny Rufaa mwaka 2017 kwamba makazi hayo - sehemu ya jengo kubwa nchini Pakistani - ingechukua takriban mwaka mmoja kujengwa.
Hata hivyo, timu ya BBC iligundua mwezi Februari mwaka huu kwamba kituo cha watoto yatima kilikuwa hakijafunguliwa.
Shirika husika la kutoa msaada limelaumu ucheleweshaji huo kutokana na janga la Covid.
Kwa zaidi ya muongo mmoja, Ishrat Baig alikuwa na ndoto ya kujenga kituo cha watoto yatima. Meneja wa akaunti ya Birmingham anasema hakujali ni wapi kingejengwa - nia yake ilikuwa kuwaheshimu wazazi wake wanaozeeka kwa kuyapa makazi hayo jina lao.
Mnamo mwaka wa 2017, Ishrat alifikiri kwamba hatimaye amepata njia ya kufanya ndoto yake kuwa kweli. Alikuwa ameweka akiba ya pauni 40,000 na akawasiliana na shirika la kutoa msaada liitwalo Penny Appeal.
Katika tovuti yake, Penny Appeal inasema inatoa misaada kwa watu maskini katika bara la Asia, Mashariki ya Kati na Afrika kwa "kutoa suluhisho la maji, kuandaa chakula cha ajili ya watu wengi, kusaidia matunzo ya watoto yatima na kutoa chakula cha dharura na msaada wa matibabu".
Shirika hilo la misaada lenye makao yake makuu mjini West Yorkshire - ambalo linalenga wafadhili Waislamu - lilichangisha £20.6m mwaka 2022, kulingana na Tume ya Msaada ya Uingereza na Wales.
Shirika hilo Penny Rufaa lilimuambia Ishrat kuwa linaendesha vituo vya watoto yatima nchini Pakistan na Gambia. Baada ya mikutano kadhaa na shirika hilo la kutoa msaada, Ishrat alishawishiwa kwamba pesa zake zingetumika vizuri.
Alitoa mchango wake wakati wa Ramadhani 2017.
Ishrat anasema shirika la Penny Rufaa lilimwambia kituo cha watoto yatima kitakamilika ndani ya mwaka mmoja. Lakini mwaka ulipita bila dalili ya maendeleo ya kweli.
Hata hivyo, wakati huu, picha ya Ishrat ilitumiwa kwa madhumuni ya utangazaji kwenye tovuti ya Penny Rufaa kuhimiza michango kutoka kwa wengine - jambo ambalo alihisi lilikuwa likimsumbua, ikizingatiwa kuwa mradi wake haujakamilika.
Pia unaweza kusoma:
Mwanaume mfupi aliyekatazwa kuwa daktari sasa aweka rekodi ya dunia
Chanzo cha picha, ALPESH DABHI/BBC
Dk. Ganesh Baraiya ana umri wa miaka 23 na alifanikiwa kuwa daktari mfupi zaidi duniani.
Ndoto ya Ganesh ya kuwa daktari ilizimika baada ya Baraza la Madaktari la India kumtangaza kuwa hastahili kusomea udaktari baada ya kuhitimu na kuwa daktari kutokana na kimo chake kifupi miaka iliyopita.
Aliamriwa kubadili kozi aliyokuwa akisoma na kuchagua kitu kingine, kwani ilizingatiwa kwamba katika kesi za dharura za matibabu, hawezi kumudu.
Uongozi wa shule aliyokuwa akisoma ulimtia moyo asikate tamaa na kushtaki Baraza la Matibabu la India.
‘’Nilikumbana na matatizo katika mtihani wa mwaka wa kwanza, nilisaidiwa na mkuu wa chuo, na msaada wa pekee ulipatikana kwa ajili yangu nilipokuwa nafanya mitihani ya vitendo.’’
Chanzo cha picha, ALPESH DABHI/BBC
Mwanaume huyu mfupi amealikwa kwenye hafla katika taifa la India na nje ya nchi, na amepewa tuzo - anatambuliwa sio tu kama daktari mfupi zaidi nchini India lakini ulimwenguni kote.
Alisema ilikuwa ndoto yake kuwa daktari.
"Niliambiwa nikiwa shuleni nifanye kazi kwa bidii, na nikawa daktari ndani ya muda mfupi na kuambiwa nitaingia kwenye rekodi ya dunia, jambo hilo lilinitia moyo na kufanya kazi kwa bidii, tumefikia nafasi hii," alisema.
Pia waweza kutazama:
India yabaini mtandao unaoshawishi vijana kwenda vitani Urusi kwa kisingizio cha kazi
Chanzo cha picha, Getty Images
Shirika la uchunguzi la India linasema kuwa limebaini mtandao wa maajenti wanaowatuma watu kwenda Urusi nchi yenye vita kwa kisingizio cha kuwapa kazi.
Mawakala hao walikuwa wakiwashawishi watu kupitia mitandao ya kijamii, Ofisi Kuu ya Upelelezi imesema.
Mtandao huo unaenea katika majimbo kadhaa na takriban watu 35 wamekuwa waathirika katika ulaghai huo, shirika hilo lilisema.
Haya yanajiri baada ya Wahindi wawili, ambao walidanganywa kusafiri kwenda Urusi, kuuawa katika vita hivyo.
CBI ilisema katika taarifa kwamba wasafirishaji hao walikuwa wakifanya kazi chini ya "mtandao uliopagwa vizuri".
Ilisema kuwa maajenti walikuwa wakitumia chaneli za mitandao ya kijamii kama vile YouTube na anwani zao za ndani yan chi kuwarubuni vijana kwa njia ya "udanganyifu" ili kuwasafiri hadi Urusi kwa kuwaahidi "kazi nzuri".
Pia unaweza kusoma:
Tyla aahirisha ziara ya dunia kutokana na jeraha
Chanzo cha picha, Getty Images
Nyota wa muziki wa Afrika Kusini, Tyla ameghairi ziara yake ya kwanza ya dunia iliyokuwa ikisubiriwa kwa hamu wiki mbili kabla ya kuanza, kwa sababu ya jeraha.
"Kwa mwaka uliopita nimekuwa nikiugua kimyakimya kutokana na jeraha ambalo limezidi," aliandika kwenye Instagram siku ya Alhamisi, bila kufichua chanzo cha jeraha hilo.
"Nimewaona madaktari na wataalamu lakini maumivu yamezidi kuwa makali," aliongeza.
Tyla, ambaye mwezi uliopita alishinda Grammy kwa wimbo wake maarufu wa Water, alipangiwa kuanza ziara yake tarehe 21 Machi katika mji mkuu wa Norway, Oslo.
Lakini alisema katika chapisho lake kwamba "kuendelea na tamasha au tarehe zozote za ziara kunaweza kuhatarisha afya na usalama wangu ".
Jeraha hilo pia limemlazimu kughairi kuonekana kwake Aprili katika tamasha la muziki la Coachella, ripoti ya vyombo vya habari vya Marekani imeeleza.
Aliongeza kuwa wale walionunua tiketi za tamasha huko Amerika Kaskazini watarejeshewa pesa, huku tarehe zake za ziara nchini Uingereza na Ulaya zikipangwa upya.
Mkuu wa UN atoa wito wa kusitishwa kwa mapigano wakati wa Ramadhani huko Sudan,
Chanzo cha picha, AFP
Katibu Mkuu wa Umoja wa Mataifa ametoa wito wa kusitishwa mara moja mapigano nchini Sudan.
Baada ya takribani mwaka mmoja wa mapigano kati ya jeshi la Sudan na Vikosi vya Msaada wa Haraka vya kijeshi, Antonio Guterres alizitaka pande zinazozozana kusitisha mapigano wakati wa mwezi mtukufu wa Ramadhani ujao.
Wito wake unakuja wakati wajumbe wa Baraza la Usalama la Umoja wa Mataifa wanajadili rasimu ya azimio la Uingereza linalotaka kusitishwa mara moja kwa mapigano na ufikiaji usiozuiliwa wa kibinadamu, ambao unaweza kupigiwa kura siku ya Ijumaa.
Katibu Mkuu wa Umoja wa Mataifa alisema kusitishwa kwa uhasama lazima kutasababisha kunyamaza kabisa kwa bunduki na kuweka njia thabiti kuelekea amani ya kudumu.
Alionya kwamba mzozo wa kibinadamu nchini Sudan unafikia kiwango kikubwa na kwamba hali ya haki za binadamu inaendelea kudorora.
Baada ya karibu mwaka mmoja, watu wasiopungua 14,000 wameuawa.
Vita hivyo vinahatarisha kuzusha mzozo mkubwa zaidi wa njaa duniani, kukiwa na ripoti za watoto wanaokufa kutokana na utapiamlo, na tayari ndio limekuwa janga kubwa zaidi la watu kuhama makazi yao duniani.
DRC yakanusha kutia saini makubaliano ya kijeshi na Urusi
Chanzo cha picha, AFP
Serikali ya Jamhuri ya Kidemokrasia ya congo imekanusha ripoti kwamba imetia saini mkataba wa ushirikiano wa kijeshi na Urusi.
"Hadi sasa, hakuna makubaliano ya ushirikiano wa kijeshi yaliyotiwa saini hivi karibuni kati ya Urusi na Jamhuri ya Kidemokrasia ya Congo," wizara ya mawasiliano na vyombo vya habari ilisema katika taarifa siku ya Alhamisi.
Kanusho hilo linafuatia makala iliyochapishwa na shirika la habari la serikali ya Urusi TASS siku ya Jumanne, ambalo lilisema kuwa serikali ya Urusi iliidhinisha rasimu ya makubaliano ya ushirikiano wa kijeshi na DR Congo.
TASS, ikitoa mfano wa hati ya serikali, iliripoti kwamba makubaliano hayo yalihusisha mazoezi ya pamoja , mafunzo ya kijeshi na "kutembelewa na meli za kivita na ndege za kivita kwa mwaliko au ombi".
DR Congo inasema rasimu ya makubaliano husika ilianzishwa na nchi hizo mbili mwaka 1999, lakini bado haijatiwa saini.
"Kwa sasa, hakuna mjadala wa pande hizo mbili kwa ajili ya utekelezaji mzuri wa rasimu hii ya makubaliano.
Katika hali ya sasa, Jamhuri ya Kidemokrasia ya Congo haizingatii lolote pia," wizara ya mawasiliano iliongeza.
Urusi imekuwa ikikuza mikataba yake ya kijeshi na nchi za Kiafrika huku ikijaribu kupanua ushawishi wake wa kisiasa katika bara hilo.
Kupitia kundi la mamluki la Wagner, Urusi imekuwa ikitoa msaada wa kijeshi kwa Jamhuri ya Afrika ya Kati na serikali zinazoongozwa na serikali za Mali, Niger na Burkina Faso.
Unaweza kusoma;
Mtaalamu wa masuala ya kijasusi wa Jeshi la Marekani ashtakiwa kwa kuuza taarifa za siri za kijeshi kwa China
Chanzo cha picha, CBS
Mchambuzi wa Jeshi la Marekani amekamatwa na kushtakiwa kwa kuuza siri za kijeshi kwa mtu aliyeko China.
Sajenti Korbein Schultz alikamatwa siku ya Alhamisi, Fort Campbell huko Kentucky kufuatia uchunguzi wa FBI na Jeshi la Marekani la kukabiliana na ujasusi.
Kulingana na mashtaka hayo, alilipwa $42,000 (£33,000) badala ya rekodi kadhaa nyeti za usalama.
Maafisa wanasema njama hiyo ya uhalifu ilianza Juni 2022 na iliendelea hadi kukamatwa kwake.
Sgt Schultz anashtakiwa kwa njama ya kupata na kufichua taarifa za ulinzi wa taifa, kusafirisha data za kiufundi zinazohusiana na makala za ulinzi bila leseni, njama ya kuuza nje makala za ulinzi bila leseni, na hongo.
Haijabainika ikiwa ameajiri wakili mtetezi dhidi ya mashtaka dhidi yake.
"Tabia inayodaiwa katika mashtaka ya leo inawakilisha usaliti mkubwa wa kiapo kilichoapa kutetea nchi yetu," Larissa Knapp wa Tawi la Usalama wa Kitaifa la FBI alisema.
"Badala ya kulinda taarifa za ulinzi wa taifa, mshtakiwa alikula njama na raia wa kigeni kuziuza, jambo ambalo linaweza kuhatarisha usalama wa taifa letu."
Mmiliki tajiri wa vyombo vya habari Robert Murdoch achumbia kwa mara ya sita
Mmiliki tajiri wa vyombo vya habari Robert Murdoch amemchumbia mpenzi wake, timu yake imethibitisha.
Mzee huyo mwenye umri wa miaka 92 ameripotiwa kuwa anachumbiana na mwanabiolojia mstaafu wa Urusi Elena Zhukova, 67.
Ndoa hiyo inayotarajiwa kufungwa katika shamba lake la Moraga huko California mwaka huu, itakuwa ni uchumba wa tano lakini wa sita kwa Bw.Murdoch.
Alijiuzulu kama mwenyekiti wa Fox na News Corp mwaka jana.
Kulingana na gazeti la New York Times, ambalo lilitoa habari hiyo, harusi hiyo imepangwa kufanyika Juni na mialiko tayari imetumwa.
Wawili hao wanasemekana kukutana kwenye tafrija iliyoandaliwa na mmoja wa wake zake, mjasiriamali mzaliwa wa China Wendi Deng.
Wenzi wengine wa zamani wa Bwana Murdoch walikuwa mhudumu wa ndege wa Australia Patricia Booker, mwandishi wa habari mzaliwa wa Scotland Anna Mann, Bi Deng na mwanamitindo na mwigizaji wa Marekani Jerri Hall.
Marekani kuanzisha bandari ya muda kwenye pwani ya Gaza kwa ajili ya utoaji wa misaada
Chanzo cha picha, Getty Images
Rais Joe Biden anatarajiwa kutangaza kwamba jeshi la Marekani litajenga bandari huko Gaza ili kupata misaada zaidi ya kibinadamu katika eneo hilo kwa njia ya bahari, maafisa wakuu wa Marekani wanasema.
Bandari hiyo ya muda itaongeza kiwango cha usaidizi wa kibinadamu kwa Wapalestina kwa "mamia ya mizigo ya ziada" kwa siku, maafisa wanasema.
Hatahivyo, haitajumuisha wanajeshi wa Amerika ardhini huko Gaza, walisema.
Umoja wa Mataifa unaonya kuwa robo ya watu wanakabiliwa na njaa.
Bandari hiyo itachukua "wiki kadhaa" kuanzishwa, maafisa walisema, na itaweza kupokea meli kubwa zinazobeba chakula, dawa za maji, na makazi ya muda. Usafirishaji wa awali utawasili kupitia Cyprus, ambapo ukaguzi wa usalama wa Israeli utafanyika.
Bw.Biden anatarajiwa kutoa tangazo hilo wakati wa hotuba yake hapo baadaye.
Jeshi la Israel lilianzisha kampeni ya anga na ardhini huko Gaza baada ya mashambulizi ya Hamas dhidi ya Israel tarehe 7 Oktoba, ambapo takriban watu 1,200 waliuawa na wengine 253 walichukuliwa mateka.
Zaidi ya watu 30,800 wameuawa huko Gaza tangu wakati huo, wizara ya afya ya eneo hilo inayoendeshwa na Hamas inasema.
Habari za asubuhi, karibu katika taarifa zetu za moja kwa moja
