Haweeneey u shaqayn jiray shirkadda iska leh Facebook oo fashilisay faafreebyo loo sameeyay dowladda Shiinaha

Qofkaan u shaqayn jiray Meta ayaa u sheegay senetarada Mareykanka Arbacadii in shirkadu ay wiiqday amniga qaranka si ay Shiinaha ugu dhisto ganacsi dhan $18 bilyan.

Intii lagu guda jiray dhegeysiga aqalka Kongareeska ee Sarah Wynn-Williams, oo hore u ahaan jirtay agaasimaha siyaasadda guud ee Facebook, ayay sheegtay in ay ogayd markii ay maamulayaashu go'aansadeen in ay siiyaan xisbiga Shuuciga Shiinaha xogta isticmaaleyaasha Meta, oo ay ku jiraan kuwa Mareykanka.

Meta ayaa waxba kama jiraan ku tilmaantay hadalada Wynn-Williams.

"Warka Sarah Wynn-Williams waa uu ka fogyahay xaqiiqada oo waxaa ka buuxa sheegashooyin been ah," ayuu yiri afhayeenka Meta Ryan Daniels.

Daniels waxa uu sheegay in maamulaha guud ee Mark Zuckerberg uu si guud uga hadlay xiisaha shirkad ay u leedahay in ay adeegyadeedu ay gaaraan Shiinaha, balse waxa uu intaa ku daray. "Xaqiiqdu waa tan: kama hawlgalaan adeegyadeena Shiinaha maanta."

Meta, si kastaba ha ahaatee, waxay dakhli xayaysiis ah ka soo saartaa xayaysiisyo fadhigoodu yahay Shiinaha.

Intii lagu guda jiray marag-furka haweeneydaan ee guddi-hoosaadka garsoorka ee Senate-ka, waxay sidoo kale ku eedaysay shirkadda Meta ee iska leh Facebook iyo Instagram inay "gacmo daboolan" kula shaqeysay Beijing si ay u dhisto qalab faafreeb oo loogu talagalay in lagu aamusiyo dhaleeceynta Xisbiga Bulshada Shiinaha.

Si gooni ah, waxay sheegtay in Meta ay u hoggaansameen dalabaadka Shiinaha ee ah in la tirtiro akoontiga Facebook ee Guo Wengui, mucaarid Shiinees ah oo ku nool Mareykanka.

Meta waxa ay ku adkaysanaysaa in uu hawada ka maqnaado bogga Mr Guo oo ay sheegtay in ay u hakisay boggiisa sababo la xiriira in uu ku xad gudubay Xeerarka Bulshada ee shirkadda.

"Hal shay oo ay wadaagaan xisbiga Shuuciga Shiinaha iyo Mark Zuckerberg ayaa ah inay rabaan inay aamusiyaan kuwa dhaleeceeya. Taas waxaan u leeyahay khibrad shakhsi ahaaneed," Wynn-Williams ayaa tiri intii ay hadlaysay.

Bishii Maarso, Wynn-Williams waxay soo saartay xusuus-qor loogu magac daray "Dadka Aan waxba kala jeclayn" oo ku saabsan khibradeeda shirkadda, oo markaa loo yaqaanay Facebook.

Meta ayaa ku guulaysatay xukun degdeg ah oo ka dhacay dalka Maraykanka kaas oo si ku meel gaar ah uga horjoogsaday haweyneydaan xayaysiinta buugeeda, kaas oo ay ku jiraan dhawr dacwadood oo muhiim ah oo ku saabsan wakhtigeedii shirkada.

"Buugga beenta iyo sumcad-dilka ah waligiis lama daabicin," Meta ayaa markaas tiri.

Dhageysiga Arbacada oo la horgeeyay xubnaha senate-ka Mareykanka ayaa waxaa hogaaminayay Senator Josh Hawley, oo ka tirsan xisbiga Jamhuuriga ee Missouri

Sanatar Hawley ayaa furay dhagaysiga isagoo sheegay in Meta "ay gabi ahaanba sameynin waxba si ay uga hortagto" marqaatiga Arbacadii ay bixisay Wynn-Williams, oo ku biirtay Frances Haugen iyo Arturo Béjar oo ah shaqaalihii hore ee ka hadlay warbaahintan bulshada.

"Waa maxay sababta ay Facebook-ga uga quusatay inay ka ilaaliso markhaatigan inay sheegto waxay ogtahay?" Ayuu yiri Hawley.

Dhageysi kulul oo Jannaayo 2024 ka dhacay golaha Congresska oo uu Zuckerberg sidoo kale ka hor hadlay golaha, ayuu Senatar Hawley ayaa ka dalbaday maamulaha guud inuu raali gelin siiyo qoysaska sheegay in caruurtooda ay waxyeelo ka soo gaartay barihiisa bulshada.

Zuckerberg gadaashiisa ayaa waxaa xilligaas fadhiyey qoysas badan oo sheegay in caruurtooda ay is-waxyeeleeyeen ama ay is dileen sababo la xiriira baraha bulshada.

Zuckerberg ayaa soo jeestay oo u sheegay qoysaskii ka soo qeyb galay kulanka in "qofna uusan ahayn in uu maro" waxa uu maqlay.

Intii lagu guda jiray dhageysiga Arbacada, ayaa Hawley wuxuu sheegay in Meta ay soo jeedisay in Wynn-Williams ay wajihi karto ganaax lacageed markay hadasho.