IPL 2024: ප්‍රබල ක්‍රීඩකයින් වෙනුවෙන් වැය කළ කෝටි ගණන් සල්ලි මෙවර 'වතුරේ යයි ද?'

ලෝකයේ වැඩි ම අවධානයට පාත්‍ර වූ ක්‍රිකට් තරගාවලියක් ලෙස සැලකෙන ඉන්දීය ප්‍රිමියර් ලීග් (IPL) තරගාවලියේ 17 වන අදියරේ සමස්ත තරග 74න් 41ක් මේ වන විට අවසන් වී තිබේ.

මෙවර තරගාවලියේ විශේෂත්වයක් වන්නේ, අධික මුදල්වලට මිල දී ගැනුණු ජ්‍යෙෂ්ඨ ක්‍රීඩකයින් වෙනුවට අත්දැකීම් අඩු නවක ක්‍රීඩකයින් විශිෂ්ට දක්ෂතා දැක්වීම ය.

අධික මුදලකට වෙන්දේසි වූ ජ්‍යෙෂ්ඨ ක්‍රීඩකයින් රැසක් මේ වන විට අසාර්ථකත්වයට පත්ව සිටිති.

ඒ සම්බන්ධයෙන් ඔවුන්ට ඉන්දීය මාධ්‍ය මෙන් ම සමාජ මාධ්‍ය ඔස්සේ ද විවිධ විවේචන එල්ල වෙමින් පවතී.

ඒ අතරින්, අසාර්ථකත්වයට පත්ව සිටින අධික මිල ගණන්වලට අලෙවි වූ ක්‍රීඩකයින් කිහිප දෙනෙකු පිළිබඳ සටහනකි, මේ.

මිචෙල් ස්ටාර්ක්

2024 ඉන්දීය ප්‍රිමියර් ලීග් තරගාවලිය වෙනුවෙන් වැඩි ම මිලක් නියම වූ ක්‍රීඩකයා වූයේ, ඔස්ට්‍රේලියානු වේග පන්දු යවන ක්‍රීඩක මිචෙල් ස්ටාර්ක් ය.‍‍

ක්‍රීඩක වෙන්දේසියේදී ඉන්දීය රුපියල් කෝටි 24.75කට ඔහු මිල දී ගනු ලැබුවේ, කොල්කටා නයිට් රයිඩර්ස් කණ්ඩායම වෙනුවෙනි.

2008 වසරේ ආරම්භ කළ ඉන්දීය ප්‍රිමියර් ලීග් ඉතිහාසයේ ක්‍රීඩකයෙකු වෙනුවෙන් ගෙවන ලද වැඩි ම මුදල එය වීම විශේෂත්වයකි.

එවැනි අධික මුදලක් ගෙවා මිල දී ගත්ත ද, මිචෙල් ස්ටාර්ක්ගෙන් කොල්කටා නයිට් රයිඩර්ස් කණ්ඩායමට මෙතෙක් සැලකිය යුතු සේවයක් ඉටුවී නොමැති බව විශ්ලේෂකයින්ගේ අදහස වී තිබේ.

ඔහු මේ වන විට තරග 7කට ක්‍රීඩා කර ඇති අතර, ප්‍රතිවාදීන් ඔහු යැවූ පන්දු 150කට ලකුණු 287ක් රැස් කර ඇත.

මෙතෙක් ඔහු දවාගෙන ඇත්තේ, කඩුලු 6ක් පමණි. ඔහුගේ ලකුණු ලබා දීමේ සාමාන්‍යය පන්දු වාරයකට ලකුණු 11.48ක් තරම් ඉහළ අගයක පවතී.

පැට් කමින්ස්

ඔස්ට්‍රේලියානු කණ්ඩායමේ නායක පැට් කමින්ස් සන්රයිසර්ස් හයිදරාබාද් කණ්ඩායම විසින් මිල දී ගනු ලැබුවේ, ඉන්දීය රුපියල් කෝටි 20.50කට ය.

එය, IPL ඉතිහාසයේ මෙතෙක් ක්‍රීඩකයෙකු වෙනුවෙන් ගෙවනු ලැබූ දෙවන වැඩි ම මුදල වේ.

හයිදරාබාද් කණ්ඩායමේ නායකත්වය ද ඔහුට පැවරූ අතර පන්දු යවන්නෙකු ලෙස ඔහු මෙතෙක් සාර්ථක වී නොමැත.

ඔහු අප්‍රේල් 25 වන දා අවසන් වරට සහභාගි වූ තරගයේදී රෝයල් චැලෙන්ජර්ස් බෙන්ගලූරු කණ්ඩායමේ පිතිකරුවෝ ඔහු යැවූ පන්දු වාර 4 තුළ ලකුණු 55ක් රැස් කළහ. එහි සාමාන්‍යය පන්දු වාරයකට ලකුණු 13.75ක් විය.

ඔහු මේ වන විට තරග 8ක පන්දු යවමින් ලකුණු 279ක් ලබා දී තිබේ.

කෙසේ වෙතත්, මේ වන විට කඩුලු 10ක් දවාගෙන ඇති ඔහු ලබා දී ඇති ලකුණු සාමාන්‍යය පන්දු වාරයකට ලකුණු 8.72කි.

ග්ලෙන් මැක්ස්වෙල්

මෙවර ඉන්දීය ප්‍රිමියර් ලීග් තරගාවලියේදී කිසිවෙකු අපේක්ෂා නොකළ පරිදි බෙහෙවින් අසාර්ථකත්වයට පත්වූ ක්‍රීඩකයෙකු වූයේ, ඔස්ට්‍රේලියානු ක්‍රීඩක ග්ලෙන් මැක්ස්වෙල් ය.

ඔහු රෝයල් චැලෙන්ජර්ස් බෙංගලූරු කණ්ඩායම විසින් මිල දී ගනු ලැබුවේ, පදනම් මුදල වූ ඉන්දීය රුපියල් කෝටි 2කට ය.

ඔහු මෙවර සහභාගි වූ තරග 6කදී රැස් කිරීමට සමත් වූයේ, ලකුණු 32ක් පමණි.

පන්දු යැවීමේදී ඔහු කඩුලු 4ක් දවා ගත්තේ ය.

මේ අතර, පසුව ඔහු තීරණය කර තිබුණේ තරගාවලිය අතරතුර ඉන් ඉවත්වීමට ය. තමන්ට ශාරීරික මෙන් ම මානසිකව ද විවේකයක් අවශ්‍ය හෙයින් වෙනත් ක්‍රීඩකයෙකුට අවස්ථාව දී ඉන්දීය ප්‍රිමියර් ලීග් තරගාවලියෙන් ඉවත් වන බව ඔහු කණ්ඩායමේ කළමනාකාරීත්වය දැනුම් දී තිබිණි.

ඩැරල් මිචල්

නවසීලන්ත ක්‍රීඩක ඩැරල් මිචල් චෙන්නායි සුපර් කිංග්ස් කණ්ඩායම විසින් මිල දී ගනු ලැබුවේ, ඉන්දීය රුපියල් කෝටි 14ක මුදලකට ය.

පන්දු වාර 20 ලෝක කුසලාන තරගාවලියේදී නවසීලන්තය වෙනුවෙන් දැක්වූ දක්ෂතා සැලකිල්ලට ගෙන මිල දී ගනු ලැබූ මෙම තුන් ඉරියව් දක්ෂතා සහිත ක්‍රීඩකයා මෙතෙක් සහභාගි වූ තරග හතේදී රැස් කර ඇත්තේ, ලකුණු 146ක් පමණි.

තරග හතේදී ම එක් අර්ධ ශතකයක් හෝ රැස් කිරීමට ඔහු සමත් වූයේ නැත.

මෙතෙක් ඔහු එක් ඉනිමකදී රැස් කළ වැඩි ම ලකුණු සංඛ්‍යාව ලෙස සටහන් වන්නේ, ලකුණු 37කි. ඔහුගේ ලකුණු ලබා ගැනීමේ සාමාන්‍යය 24.33කි.

හර්ෂල් පටෙල්

පන්ජාබ් කිංග්ස් කණ්ඩායම විසින් හර්ෂල් පටෙල් මිල දී ගනු ලැබුවේ, ඉන්දීය රුපියල් කෝටි 11.75ක මුදලකට ය.

එහෙත්, ඔහුගෙන් අපේක්ෂා කළ සේවය මෙතෙක් එම කණ්ඩායමට හිමි වී ඇති බවක් දක්නට නැත.

මේ වසරේ මෙතෙක් ක්‍රීඩා කළ තරග 8 තුළදී ඔහු ප්‍රතිවාදී පිතිකරුවන්ට ලකුණු 278ක් ලබා දී තිබේ.

ඔහු පන්දු වාරයකදී ලබා දුන් ලකුණු සාමාන්‍යය 9.59කි.

කෙසේ වෙතත්, මේ වන විට ඔහු කඩුලු 13ක් දවා ගැනීමට සමත්ව සිටී.

අල්සාරි ජෝසෆ්

බටහිර ඉන්දීය කොදෙව් පන්දු යවන්නෙකු වන අල්සාරි ජෝසෆ් රෝයල් චැලෙන්ජර්ස් බෙන්ගලූරු කණ්ඩායමට මිල දී ගනු ලැබුවේ, ඉන්දීය රුපියල් කෝටි 11.50ක මුදලකට ය.

එහෙත්, ඔහු මෙතෙක් ක්‍රීඩා කර ඇත්තේ, තරග 3කට පමණි.

එම තරග තුනේදී ඔහුගේ පන්දු හමුවේ ප්‍රතිවාදී පිතිකරුවෝ ලකුණු 115ක් රැස් කළහ.

ඔහුගේ පන්දු යැවීමේ ලකුණු සාමාන්‍යය පන්දු වාරයකට ලකුණු 11.90කි.

හර්දික් පාණ්ඩ්‍යා

මෙවර ඉන්දීය ප්‍රිමියර් ලීග් කණ්ඩායමේ වඩාත් කතාබහට ලක්වූ ක්‍රීඩකයින් අතර හර්දික් පාණ්ඩ්‍යා ඉදිරියෙන් ම සිටී.

මුම්බායි ඉන්ඩියන්ස් කණ්ඩායම ඉන්දීය රුපියල් කෝටි 15ක මුදලකට ඔහු මිල දී ගත්තේ, කණ්ඩායමේ නායකත්වය ද ඔහුට පවරමිනි.

පස් වරක් IPL ශූරතාව හිමි කර දීමට මුම්බායි කණ්ඩායම මෙහෙයවූ රෝහිත් ෂර්මා සිටියදී හර්දික් පාණ්ඩ්‍යාට නායකත්වය පැවරීම සම්බන්ධයෙන් විවිධ විවේචන එල්ල විය.

මේ අතර, මුල් තරග අතරතුර ඔහු රෝහිත් ෂර්මා සහ ලසිත් මාලිංග සමග ද මතභේද ඇති කර ගත් බව මාධ්‍යවල පළ විය.

මේ අතර, ඔහුගෙන් මුම්බායි ඉන්ඩියන්ස් කණ්ඩායම අපේක්ෂා කළ සේවය ඉටු වී නැතැයි විශ්ලේෂකයින්ගේ අදහස වී තිබේ.

මේ වන විට තරග 8කට ක්‍රීඩා කළ ඔහු රැස් කර ඇත්තේ, ලකුණු 151ක් පමණි. එහිදී ඔහු අර්ධ ශතකයක් හෝ රැස් කිරීමට මෙතෙක් සමත් වී නැත.

පන්දු යැවීමේදී ඔහු ලකුණු 186ක් ප්‍රතිවාදී පිතිකරුවන්ට ලබා දී ඇති අතර, පන්දු වාරයක ලකුණු සාමාන්‍යය 10.94කි.

කණ්ඩායමක් ලෙස ද සාර්ථකත්වයට පත් නොවූ මුම්බායි ඉන්ඩියන්ස් කණ්ඩායම හර්දික් පාණ්ඩ්‍යා යටතේ පැවති තරග 8කින් ජයගෙන ඇත්තේ, තරග 3ක් පමණි.

ප්‍රසාද ලකුණු සටහනේ ඔවුන් පසුවන්නේ, 8 වන ස්ථානයේ ය.

ඩේවිඩ් වෝර්නර්

ඔස්ට්‍රේලියානු ප්‍රවේගකාරී ආරම්භක පිතිකරුවෙකු වන ඩේවිඩ් වෝර්නර් මෙවර ඉන්දීය ප්‍රිමියර් ලීග් තරගාවලිය සඳහා දිල්ලි කැපිටල්ස් කණ්ඩායම වෙනුවෙන් මිල දී ගනු ලැබුවේ, ඉන්දීය රුපියල් කෝටි 6.25කට ය.

ඩේවිඩ් වෝර්නර් මෙතෙක් සහභාගි වූ තරග 7කදී රැස් කර ඇත්තේ, ලකුණු 167ක් පමණි.

ඔහු තරග 7දී ම අර්ධ ශතකයක් රැස් කළේ, එක් තරගයකදී පමණි.

ඔහුගේ ලකුණු සාමාන්‍යය 23.86කි.

ඩේවිඩ් මිලර්

දකුණු අප්‍රිකානු ප්‍රවේගකාරී පිතිකරුවෙකු වන ඩේවිඩ් මිලර් ඉන්දීය රුපියල් කෝටි 3ක මුදලකට ගුජරාට් ටයිටන්ස් කණ්ඩායම විසින් මිල දී ගන්නා ලදී.

ඔහු සහභාගි වූ තරග 6 තුළදී ඔහු රැස් කර ඇත්තේ, ලකුණු 138ක් පමණි.

ඔහු තරග 6 තුළදී ම එක් අර්ධ ශතකයක් පමණක් රැස් කළ අතර, ලකුණු රැස් කිරීමේ සාමාන්‍යය 27.6කි‍.

රචින් රවීන්ද්‍ර

චෙන්නායි සුපර් කිංග්ස් කණ්ඩායම සඳහා නවසීලන්ත නවක ක්‍රීඩක රචින් රවීන්ද්‍ර මිල දී ගනු ලැබුවේ ඉන්දීය රුපියල් කෝටි 1.8ක මුදලකට ය‍

තරග 7කදී ඔහු රැස් කර ඇත්තේ, ලකුණු 133ක් පමණි. ලකුණු රැස් කිරීමේ සාමාන්‍යය 19.00කි.